ວັນທີ 21 ມີນາ 2024 ນີ້, ຢູ່ສວນແກ້ວຫຼັກເມືອງ, ເມືອງຊຳເໜືອ, ແຂວງຫົວພັນ, ສປປ ລາວ, ໄດ້ມີພິທີເປີດງານບຸນທ່ອງທ່ຽວວັດທະນະທຳ ເຊີນລາ – ຫົວພັນ 2024 ຂື້ນຢ່າງເປັນທາງການ. ເຂົ້າຮ່ວມພິທີ ມີ ສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຫົວພັນ; ສະຫາຍ ຫງວຽນຮຸຍດົງ, ກໍາມະການສູນກາງພັກ, ເລຂາຄະນະພັກແຂວງ, ປະທານຄະນະສະມາຊິກສະພາແຫ່ງຊາດແຂວງເຊີນລາ. ມີບັນດາທ່ານການນຳສອງແຂວງ, ພາກສ່ວນກ່ຽວຂ້ອງຂັ້ນກະຊວງ, ພະແນກການ, ກົມກອງ ແລະ ຫົວໜ່ວຍທຸລະກິດ. ເຂົ້າຮ່ວມພິທີເປີດຄັ້ງນີ້ຍັງມີຜູ້ຕາງໜ້າສະຖານທູດຫວຽດນາມ ປະຈຳລາວ ແລະ ສະຖານທູດລາວ ປະຈຳຫວຽດນາມ ພ້ອມດ້ວຍປະຊາຊົນຈາກເມືອງຊຳເໜືອ ແລະ ແຂວງຫົວພັນເປັນຈຳນວນຫຼວງຫຼາຍ.
ກ່າວຄຳເຫັນຕ້ອນຮັບເຫດການພິເສດນີ້, ສະຫາຍ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບການນຳແຂວງເຊີນລາ ແລະ ຄະນະຈັດຕັ້ງ “ງານບຸນທ່ອງທ່ຽວວັດທະນະທຳ ຫົວພັນ-ເຊີນລາ 2024” , ນັກສິລະປິນ, ນັກສິລະປະກອນ ຈາກແຂວງເຊີນລາ. ນີ້ກໍ່ແມ່ນໂອກາດເພື່ອໃຫ້ພະນັກງານ ແລະ ປະຊາຊົນບັນດາເຜົ່າຂອງສອງແຂວງໄດ້ແລກປ່ຽນ, ຮ່ຳຮຽນໃນຂົງເຂດຕ່າງໆ, ປະກອບສ່ວນເພີ່ມພູນຄູນສ້າງນ້ຳໃຈສາມັກຄີແບບພິເສດ ລາວ-ຫວຽດນາມ ເວົ້າລວມ ແລະ ແຂວງຫົວພັນ-ແຂວງເຊີນລາ ເວົ້າສະເພາະ ໃຫ້ຂຽວສົດງົດງາມຕະຫຼອດໄປ.
ສະຫາຍ ຫງວຽນຮຸຍດົງ ໄດ້ກ່າວວ່າ: ວັນບຸນຄັ້ງນີ້ແມ່ນໜຶ່ງໃນບັນດາການເຄື່ອນໄຫວສຳຄັນເພື່ອປະຕິບັດວຽກງານການຕ່າງປະເທດໃນປີ 2024 ຢ່າງມີປະສິດທິຜົນ; ແມ່ນການເຄື່ອນໄຫວສະແດງໃຫ້ເຫັນການພົວພັນທາງການທູດ, ມິດຕະພາບ ແລະ ການຮ່ວມມືລະຫວ່າງ ຫວຽດນາມ – ລາວ ເວົ້າລວມ ແລະ ເຊີນລາ – ຫົວພັນ ເວົ້າສະເພາະ. ເປັນໂອກາດເຊື່ອມໂຍງ ແລະ ຊຸກຍູ້ການເຊື່ອມໂຍງເພື່ອພັດທະນາການທ່ອງທ່ຽວ ເຊີນລາ – ຫົວພັນ ກັບບັນດາແຂວງ, ນະຄອນໃນທົ່ວປະເທດ ແລະ ສາກົນ; ສົມທົບກັນແບ່ງປັນ ແລະ ສົມທົບກັນພັດທະນາບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະ, ສ້າງວຽກເຮັດງານທຳ ແລະ ເພີ່ມລາຍຮັບໃຫ້ປະຊາຊົນສອງແຂວງ, ພິເສດແມ່ນບັນດາຊົນເຜົ່າສ່ວນໜ້ອຍ ແລະ ປະຊາຊົນເຂດຊາຍແດນ; ຊຸກຍູ້ການແລກປ່ຽນ ແລະ ການຮ່ວມມືໃນຂະບວນການເຊື່ອມໂຍງເຂົ້າກັບສາກົນ.
ຈຸດພົ້ນເດັ່ນທີ່ປະທັບໃຈໃນຄ່ຳຄືນເປີດແມ່ນລາຍການສິລະປະໃນຫົວຂໍ້ “ບົດເພງແຫ່ງຄວາມຮັກ ຫົວພັນ-ເຊີນລາ” ເປັນການສະແດງຮ່ວມກັນຂອງບັນດານັກສິລະປິນ, ນັກສະແດງຈາກແຂວງເຊີນລາ ແລະ ແຂວງຫົວພັນ. ລາຍການສິລະປະລວມມີບັນດາລາຍການສະແດງທີ່ເປັນເອກະລັກສະເພາະ, ຂັບຮ້ອງມ່ວນຊື່ນ, ຍ້ອງຍໍມູນເຊື້ອປະຕິວັດ, ຮີດຄອງປະເພນີມິດຕະພາບ, ຄວາມສາມັກຄີແບບພິເສດລະຫວ່າງ 2 ແຂວງ ຫົວພັນ-ເຊີນລາ ເວົ້າສະເພາະ ແລະ 2 ປະເທດ ລາວ-ຫວຽດນາມ ເວົ້າລວມ, ໃນການປົກປັກຮັກສາ ແລະ ສ້າງສາບ້ານເກີດເມືອງນອນ. ພ້ອມກັນນັ້ນ, ໄດ້ສັນລະເສີນບັນດາຮີດຄອງປະເພນີວັດທະນະທຳທີ່ເປັນເອກະລັກສະເພາະຂອງບັນດາເຜົ່າຂອງສອງແຂວງ, ໄດ້ຍົກໃຫ້ເຫັນຄວາມຄ້າຍຄືກັນ ແລະ ການປະຍຸກດ້ານວັດທະນະທຳ, ສິລະປະ; ສັນລະເສີນຄວາມງາມຂອງຈິດວິນຍານ, ຄວາມຮັກຂອງປະຊາຊົນ ແລະ ບ້ານເກີດເມືອງນອນ; ຄວາມງາມທາງທຳມະຊາດ, ຮູບລັກສະນະ, ຮູບລັກສະນະນະວັດຕະກຳ ແລະ ການພັດທະນາຂອງສອງແຂວງ, ສອງປະເທດ.
ວັນບຸນທ່ອງທ່ຽວວັດທະນະທຳ ຫົວພັນ-ເຊີນລາ 2024 ດໍາເນີນໄປແຕ່ວັນທີ 21 – 22 ມີນາ 2024, ຢູ່ສວນແກ້ວຫຼັກເມືອງ ແຂວງຫົວພັນ ດ້ວຍບັນດາກິດຈະກຳການເຄື່ອນໄຫວວັດທະນະທຳ ແລະ ທ່ອງທ່ຽວທີ່ເປັນເອກະລັກສະເພາະຄື: ການວາງສະແດງຮູບພາບທີ່ສວຍງາມຂອງແຂວງ, ປະຊາຊົນ, ທ່າແຮງດ້ານການທ່ອງທ່ຽວ, ການທ່ອງທ່ຽວ, ຜະລິດຕະພັນສິນຄ້າ, ເອກະລັກວັດທະນະທຳ ແລະ ມິດຕະພາບແບບພິເສດ ລາວ-ຫວຽດນາມ, ຫົວພັນ-ເຊີນລາ; ວາງສະແດງ ແລະ ແນະນຳການທ່ອງທ່ຽວ, ວັດທະນະທຳ ແລະ ຜະລິດຕະພັນທ້ອງຖິ່ນຂອງ 2 ແຂວງ ຫົວພັນ-ເຊີນລາ; ສຳຫຼວດເຂດທ່ອງທ່ຽວ, ສະຖານທີ່ທ່ອງທ່ຽວ, ສະຖານທີ່ບໍລິການທ່ອງທ່ຽວ, ສ້າງຮູບແບບທ່ອງທ່ຽວ ຫົວພັນ-ເຊີນລາ; ກອງປະຊຸມເຊື່ອມໂຍງການພັດທະນາການທ່ອງທ່ຽວ ຫົວພັນ-ເຊີນລາ; ການເຈລະຈາລະຫວ່າງຄະນະຜູ້ແທນຂັ້ນສູງແຂວງ ແລະ ໄດ້ລົງນາມໃນບົດບັນທຶກຊ່ວຍຈຳການຮ່ວມມືໄລຍະ 2024-2026 ລະຫວ່າງສອງແຂວງ.
