ວັນທີ 11 ພຶດສະພາ 2026, ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີ ກະຊວງການຕ່າງປະເທດ, ທັງເປັນຮອງປະທານ ຜູ້ປະຈໍາການຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ພ້ອມດ້ວຍຄະນະ, ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານການແກ້ໄຂບັນຫາລະເບີດບໍ່ທັນແຕກ ຢູ່ແຂວງຫົວພັນ.

ໃນການເຄື່ອນໄຫວຄັ້ງນີ້, ທ່ານ ຮອງລັດຖະມົນຕີ ພ້ອມດ້ວຍຄະນະ ໄດ້ເຂົ້າພົບການນຳແຂວງຫົວພັນ ເພື່ອແຈ້ງຈຸດປະສົງໃນການມາເຄື່ອນໄຫວວຽກງານ ແລະ ຮັບຟັງສະພາບການແກ້ໄຂບັນຫາລະເບີດບໍ່ທັນແຕກ ຢູ່ແຂວງຫົວພັນ ຕິດພັນກັບການພັດທະນາເສດຖະກິດ-ສັງຄົມ ຢູ່ພາຍໃນແຂວງຈາກ ທ່ານ ພອນສຸກ ອິນທະວົງ ປະທານຄະນະກຳມະການປົກຄອງແຂວງ.

ຈາກນັ້ນທ່ານ ຮອງລັດຖະມົນຕີພ້ອມດ້ວຍຄະນະໄດ້ລົງຕິດຕາມເບິ່ງໜ້າວຽກຕົວຈິ່ງຢູ່ພາກສະໜາມໃນການເກັບກູ້ລະເບີດ ທີ່ບ້ານເອິນ ເມືອງວຽງໄຊ ໂດຍມີ ທ່ານ ບຸນເພັງ ສີສະຫັວດ ຫົວໜ້າຫ້ອງການ ຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປລ , ທ່ານ ພັອ ນາງພວງທອງ ສຸຍະວົງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ່ 8 ແຂວງຫົວພັນ, ມີການນໍາເມືອງວຽງໄຊກໍ່ໄດ້ເຂົ້າຮ່ວມການເຄື່ອນໄຫວໃນຄັ້ງນີ້ ແລະ ພ້ອມທັງໄດ້ຮັບຟັງການລາຍງານໂດຍຫຍໍ້ການປະຕິບັດໜ້າທີ່ວຽກງານຢູ່ພາກສະໜາມຈາກທ່ານ ບຸນຍືນ ເຢຍໂປຊົງ ຮັກສາການຫົວໜ້າຫ້ອງການເກັບກູ້ລະເບີດແຂວງ. ເຊິ່ງແຂວງຫົວພັນທຸກຕົວເມືອງແມ່ນຖືກຜົນກະທົບຈາກລະເບີດບໍ່ທັນແຕກ ໃນລະດັບແຕກຕ່າງກັນ, ໃນນີ້ມີ 5 ຕົວເມືອງ ທີ່ໄດຮັບຜົນກະທົບໜັກ ໜ່ວງທີ່ສຸດຄື: ເມືອງວຽງໄຊ, ເມືອງຊໍາເໜືອ, ເມືອງຊ່ອນ, ເມືອງຫົວເມືອງ ແລະ ເມືອງຮ້ຽມ. ໃນ 4 ເດືອນຕົ້ນປີ 2026 ສາມາດທໍາລາຍລະເບີດບໍ່ທັນແຕກໄດ້ທັງໝົດ 1.044 ໜ່ວຍ, ໃນນັ້ນເປັນລະເບີດລູກຫວ່ານ ( ລະເບີດບົ່ມບີ່ ) ທັງໝົດ 544 ໜ່ວຍ ຫຼື ເທົ່າກັບ 52% ຂອງລະເບີດທັງໝົດທີ່ໄດ້ທໍາລາຍ. ໂອກາດນີ້ທ່ານ ຮອງລັດຖະມົນຕີກະຊວງການຕ່າງປະເທດຍັງໄດ້ເບິ່ງການສາທິດທໍາລາຍລະເບີດຕົວຈິ່ງຕື່ມອີກ.

ພ້ອມນີ້, ຄະນະຍັງໄດ້ໄປຢ້ຽມຢາມອະດີດໂຮງໝໍມິດຕະພາບ ທີ່ບ້ານຊຽງລວງ, ຖໍ້າທ່ານຜູ້ນໍາ, ຫໍວາງສະແດງມູນເຊື້ອກອງທັບ, ຫ້ອງການໂຄງການເກັບກູ້ລະເບີດຫຼັງໃໝ່ ແລະ ສະຖານທີ່ອື່ນໆ.

ການລົງເຄື່ອນໄຫວໃນຄັ້ງນີ້, ແມ່ນເພື່ອແນໃສ່ຊຸກຍູ້ການຈັດຕັ້ງປະຕິບັດແຜນງານແກ້ໄຂບັນຫາລະເບີດບໍ່ທັນແຕກຢູ່ທ້ອງຖິ່ນທີ່ຖືກກະທົບໃຫ້ມີຄວາມຄືບໜ້າ, ຮັບປະກັນຄວາມປອດໄພໃຫ້ແກ່ປະຊາຊົນໃນການທຳມາຫາກິນ ແລະ ການພັດທະນາເສດຖະກິດ-ສັງຄົມ ຢູ່ພາຍໃນແຂວງຫົວພັນ ໃຫ້ມີປະສິດທິພາບສູງຂຶ້ນເລື້ອຍໆ.