ຕອນເຊົ້າ ຂອງວັນ 27 ກຸມພາ 2024 ຄະນະໂຄສະນາອົບຮົມແຂວງຫົວພັນໄດ້ເປີດຊຸດຝຶກອົບຮົມວຽກງານໂຄສະນາ-ປະຖະກະຖາ ຂຶ້ນຢູ່ທີ ຫ້ອງປະຊຸມຊັ້ນ 5 ຕືກສຳນັກງານອົງການປົກຄອງແຂວງ, ໂດຍໃຫ້ເຂົ້າຮ່ວມເປັນປະທານຂອງ ທ່ານ ເພີດ ມາປັນຍາ ຮອງເລຂາພັກແຂວງ ຜູ້ຊີ້ນຳແນວຄິດທິດສະດີຂັ້ນແຂວງ, ມີ ທ່ານ ໂພເມກ ວິໄລສັກ ຫົວໜ້າກົມໂຄສະນາ ຂອງຄະນະໂຄສະນາອົບຮົມສູນກາງພັກ, ທ່ານ ຕົງລີ ເຕັ່ງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ມີນັກສຳມະນາກອນ, ພະນັດງານຫຼັກແຫຼ່ງ ທີ່ມາຈາກພະແນກການ ກົມກອງອອ້ມຂ້າງແຂວງ ແລະ 10 ເມືອງທົ່ວແຂວງ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວ ທ່ານ ຕົງລີ ເຕັ່ງ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ມີຄໍາເຫັນກ່າວເປີດຊຸດຝຶກອົບຮົມ, ການຈັດຝຶກອົບຮົມໃນຄັ້ງນີ້ ກໍເພື່ອແນໃສ່ຍົກລະດັບຄວາມຮູ້, ຄວາມສາມາດ, ທັກສະໃນການໂຄສະນາ-ປາຖະກະຖາ ກໍຄື ວິທີ ແລະ ຂັ້ນຕອນໃນການຂຽນເອກະສານສໍາຄັນຕ່າງໆ ໃຫ້ແກ່ພະນັກງານຫຼັກແຫຼ່ງ ຂອງແຂວງຫົວພັນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກວ່າເກົ່າ. ພ້ອມດຽວກັນນີ້ ກໍໄດ້ຮຽກຮ້ອງໃຫ້ນັກສໍາມະນາກອນທຸກທ່ານ ຈົງພ້ອມກັນຍົກສູງຄວາມຮັບຜິດຊອບຂອງຕົນ ໃນການປະຕິບັດໂມງເວລາ, ສຸມໃສ່ຄົ້ນຄວ້າ, ແລກປ່ຽນ ແລະ ຍາດແຍ່ງເອົາບົດຮຽນຕ່າງໆ ຈາກວິທະຍາກອນໃຫ້ຫຼາຍທີ່ສຸດ ເພື່ອມາໝູນໃຊ້ເຂົ້າໃນວຽກງານຈິງ ໃຫ້ເກີດຜົນປະໂຫຍດສູງສຸດ.
ການຝຶກອົບຮົມໃນຄັ້ງນີ້ແມ່ນຈະໄດ້ດໍາເນີນເປັນເວລາ 3 ວັນເຕັມ ນັນແຕ່ (27 – 29 ກຸມພາ 2024) ແລະ ຕະຫຼອດໄລຍະຂອງການຝຶກອົບຮົມ, ຜູ້ເຂົ້າຮ່ວມຈະໄດ້ຮັບຟັງການບັນຍາຍ ດ້ານທິດສະດີ ຂອງວຽກງານໂຄສະນາ ຈາກວິທະຍາກອນຂອງ ຄະນະໂຄສະນາອົບຮົມແຂວງ ແລະ ກົມໂຄສະນາ, ຄະນະໂຄສະນາອົບຮົມສູນກາງພັກ ຈໍານວນ 04 ບົດຄື: ບົດທີ1, ບັນຫາພື້ນຖານ ຂອງວຽກງານໂຄສະນາ – ປຸກລະດົມ; ບົດທີ 2, ຝຶກຝົນຄວາມສາມາດໃນການຂຽນເອກະສານ; ບົດທີ 3, ຄຸນລັກສະນະ, ສິລະປະ ແລະ ວາທະສິນໃນການໂຄສະນາ – ປາຖະກະຖາ; ບົດທີ 4 ຄື: ໂຄສະນາຜ່ານສື່. ນອກຈາກນັ້ນ ຜູ້ທີ່ເຂົ້າຮ່ວມຝຶກອົບຮົມໃນຄັ້ງນີ້ ຍັງຈະໄດ້ຜັດປ່ຽນກັນຂຶ້ນສາທິດການເປັນພິທີກອນ ,ການເຜີຍແຜ່ເອກະສານ ແລະ ການຂື້ນ ປາຖະກະຖາຕົວຈີງຕື່ມອີກ.
