ຕອນເຊົ້າຂອງວັນທີ 16 ກຸມພາ 2024 ທີ່ຜ່ານມາ. ຄະນະໂຄສະນາອົບຮົມແຂວງຫົວພັນໄດ້ເປີດກອງປະຊຸມໃຫຍ່ IV ຂອງກຳມະບານຮາກຖານ ຄະນະໂຄສະນາອົບຮົມແຂວງຫົວພັນ ໂດຍການເປັນປະທານຮ່ວມຂອງ ສະຫາຍ ນາງ ຄຳພວງ ຄຳບຸດດາພັນ ຮອງປະທານກຳມະບານຮາກຖານຄະນະໂຄສະນາອົບຮົມແຂວງຫົວພັນ, ມີ ສະຫາຍ ນາງ ພອງທຳ ທຳມະທອງ ກຳມະການພັກແຂວງ ປະທານສະຫະພັນກຳມະບານແຂວງ, ເປັນກຽດເຂົ້າຮ່ວມຂອງ ສະຫາຍ ຕົງລີ ເຕັ່ງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງຫົວພັນ, ບັນດາທ່ານ ແຂກຖືກເຊີນຕ່າງໜ້າຮາກຖານກຳມະບານຂອງພະແນກການອ້ອມຂ້າງແຂວງ ຕະຫລອດຮອດສະມາຊິກກຳມະບານພາຍໃນຄະນະໂຄສະນາອົບຮົມແຂວງເຂົ້າຮ່ວມທັງໝົດ 22 ສະຫາຍ, ຍິງ 10 ສະຫາຍ.
ກອງປະຊຸມຄັ້ງນີ້; ໄດ້ຮັບຟັງການລາຍງານຮ່າງບົດລາຍງານການເມືອງທັງ 2 ພາກ ແລະ ບົດສຳຫຼວດການນຳພາ-ຊີ້ນຳ ຈາກຮອງປະທານກຳມະບານຮາກຖານ ໃນການຈັດຕັ້ງປະຕິບັດວຽກງານ ຂອງກຳມະບານຮາກຖານ ໃນໄລຍະ 5 ປີຜ່ານມາ ແລະ ທິດທາງ 5 ປີຕໍ່ໜ້າ. ພ້ອມນັ້ນ; ຜູ້ແທນກອງປະຊຸມ ໄດ້ປະກອບຄຳຄິດຄຳເຫັນໃສ່ຮ່າງບົດລາຍງານການເມືອງທັງ 2 ພາກ ແລະ ບົດສຳຫຼວດການນຳພາ-ຊີ້ນຳ ໃຫ້ມີເນື້ອໃນຄົບຖ້ວນ ສາມາດຈັດຕັ້ງປະຕິບັດໄດ້ໃນຕໍ່ໜ້າ. ພ້ອມກັນນັ້ນ ກອງປະຊຸມຍັງໄດ້ຮັບຟັງການຜ່ານມາດຖານ ແລະ ເງື່ອນໄຂຂອງຜູ້ສະໝັກເລືອກຕັ້ງ, ພ້ອມທັງປ່ອນບັດຄັດເລືອກເອົາຄະນະກໍາມະບານຮາກຖານ ຂອງຄະນະໂຄສະນາອົບຮົມແຂວງຊຸດໃໝ່ ເຊິ່ງໃນນັ້ນ ມີຜູ້ຮັບສະໝັກການເລືອກຕັ້ງທັງໝົດ 5 ສະຫາຍ, ຍິງ 2 ສະຫາຍ, ຜ່ານການລົງຄະແນນສຽງ ແລະ ຕົກລົງເຫັນດີເປັນເອກະພາບກັນ ຢູ່ໃນກອງປະຊຸມຄັ້ງປະຖົມມະລືກຂອງກຳມະບານຮາກຖານຄະນະໂຄສະນາອົບຮົມແຂວງ ໄດ້ຕົກລົງຄົ້ນຄ້ວາຮັບຮອງເອົາ ຄະນະກຳມະບານຮາກຖານ ໂຄສະນາອົບຮົມແຂວງ ຊຸດໃໝ່ ເຊິ່ງຄັດເລືອກໄດ້ 4 ສະຫາຍຄື:
- ສະຫາຍ ຕົງ ເຍຍບີທໍ່ ເປັນປະທານກໍາມະບານຮາກຖານ,
- ສະຫາຍ ນາງ ອານັດ ເພັດສົມພອນ ຮອງປະທານກໍາມະບານຮາກຖານ, ທັງເປັນປະທານກວດກາ
- ນາງ ສຸກ ກັນຍາວົງ ຮອງປະທານກໍາມະບານຮາກຖານ
- ສະຫາຍ ເພັງສີ ທິບພະວົງ ເປັນຮອງປະທານກວດກາ.
ໃນຕອນທ້າຍ ສະຫາຍ ນາງ ພອງທຳ ທຳມະທອງ ກຳມະການພັກແຂວງ ປະທານສະຫະພັນກຳມະບານແຂວງ ຍັງໄດ້ໃຫ້ກຽດໂອ້ລົມ ແລະ ສະແດງຄວາມຍ້ອງຍໍຊົມເຊີຍ ຕໍ່ຜົນງານດ້ານດີ ແລະ ຜົນສໍາເລັດໃນການຈັດຕັ້ງປະຕິບັດວຽກງານຂອງຕົນ ທີ່ກຳມະບານຮາກຖານໂຄສະນາອົບຮົມແຂວງ ທີ່ສາມາດຍາດມາໄດ້ໃນໄລຍະຜ່ານມາ ແລະ ສືບຕໍ່ຈັດຕັ້ງປະຕິບັດວຽກງານໃນຕໍ່ໜ້າ, ກຳແໜ້ນຄຳຂວັນ 5 ເປັນເຈົ້າ ເພື່ອເປັນບັນທັດຖານໃນການຈັດຕັ້ງປະຕິບັດ ແລະ ສຶກສາອົບຮົມການເມືອງແນວຄິດ ຂອງສະມາຊິກກຳມະບານ ໃຫ້ມີແນວຄິດຫລັກໝັ້ນ, ການເມືອງໜັກແໜ້ນ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກລັດ ເປັນເຈົ້າການປະກອບສ່ວນເຂົ້າໃນວຽກງານກໍາມະບານ ປົກປ້ອງຜົນປະໂຫຍດຂອງຜູ້ອອກແຮງງານໃນຂອບເຂດຄວາມຮັບຜິດຊອບຂອງຕົນໃຫ້ດີຂຶ້ນ
