ເມືອງຮ້ຽມ ແຂວງຫົວພັນ ຈັດພິທີ ປາຖະກະຖາ ວັນສ້າງຕັ້ງກໍາມະບານລາວ ຄົບຮອບ 67 ປີ ແລະ ວັນສ້າງພັກກອມມູນິດຫວຽດນາມ ຄົບຮອບ 93 ປີ.

ລາຍລະອຽດ

ສ້າງຂື້ນເມື່ອ ວັນອັງຄານ, 07 ກຸມພາ 2023 02:03

ຂຽນໂດຍ ອານຸສັກ

ເມືອງ​ຮ້ຽ​ມ ແຂວງ​ຫົວ​ພັນ ຈັດພິທີ ປາຖະກະຖາ ວັນສ້າງຕັ້ງກໍາມະບານລາວ ຄົບຮອບ 67 ປີ ແລະ ວັນສ້າງພັກກອມມູນິດຫວຽດນາມ ຄົບຮອບ 93 ປີ.

        ວັນ​ທີ 01 ກຸມພາ 2023 ທີ່ຜ່ານມານີ້ ເມືອງ​ຮ້ຽມ ແຂວງ​ຫົວ​ພັນ​ໄດ້​ຈັດ​ພິ​ທີ​ປາ​ຖະ​ກະ​ຖາ 02 ວັນປະຫວັດສາດສໍາຄັນຂອງພັກ, ຂອງຊາດ ແລະ ສາກົນ ຄືຶ: ວັນສ້າງຕັ້ງກໍາມະບານລາວ ຄົບຮອບ 67 ປີ ແລະ ວັນສ້າງພັກກອມມູນິດຫວຽດນາມ ຄົບຮອບ 93 ປີ ຂື້ນ​ຢູ່​ທີ່​ສະ​ໂມ​ສອນ​ຂອງ​ເມືອງ ເປັນ​ກຽດ​ເຂົ້າ​ຮ່ວມ​ພິ​ທີ​ຂອງ​ ທ່ານ ໄຫວທອງ ບຸນມະນີວັນ ຮອງເລຂາພັກເມືອງ ຜູ້ປະຈໍາການ ຊີ້ນໍາວຽກງານ ແນວຄິດ - ທິດສະດີຂັ້ນເມືອງ, ມີບັນດາ ທ່ານຄະນະປະຈຳພັກເມືອງ, ກຳມະການພັກເມືອງ, ສະພາປະຊາຊົນແຂວງປະຈໍາເມືອງຮ້ຽມ, ແລະ ສະມາຊິກກໍາມະບານອ້ອມຂ້າງເທດສະບາງເມືອງຮ້ຽມ ເຂົ້າຮ່ວມ ລວມທັງໝົດ 131 ຄົນ, ຍິງ 72 ຄົນ.

     ພິ​ທີ​ດັ່ງ​ກ່າວ​​ທ່ານ ສອນເພັງ ຄໍາມະວັນ ຄະນະປະຈໍາພັກເມືອງ ປະທານແນວລາວສ້າງຊາດເມືອງຮ້ຽມ ຜູ້ຊີ້ນໍາຂົງເຂດອົງການຈັດຕັ້ງມະຫາຊົນ ໄດ້ໃຫ້ກຽດເລົ່າມູນເຊື້ອປະຫວັດຄວາມເປັນມາ   ວັນສ້າງຕັ້ງກໍາມະບານລາວ ຄົບຮອບ 67 ປີ ເຊິ່ງໄດ້ຍົກໃຫ້ເຫັນມູນການກໍາເນີດ ແລະ ເຕີບໃຫຍ່ຂະຫຍາຍຕົວຂອງກໍາມະບານລາວແຕ່ເຊີ່ງຈຸດພິເສດສະເພາະຊາວລາວເເມ່ນເຄີຍມີມູນເຊື້ອ ດຸໝັ່ນຂະຫຍັ່ນພຽນໃນການອອກແຮງງານ, ມູນເຊື້ອສາມັກຄີປອງດອງ, ຮັກເຊື້ອແພງຊາດ, ມູນເຊື້ອວັດທະນະທໍາທີ່ເປັນເອກະລັກອັນດີງາມ ແລະ ອັນທີ່ພົ້ນເດັ່ນກວ່າໝູ່ແມ່ນ ມູນເຊື້ອແຫ່ງການຕໍ່ສູ້ບໍ່ຍອມຈໍານົນຕ້ານການຮຸກຮານຂອງສັດຕູຢ່າງເດັດດ່ຽວໜ່ຽວແໜ້ນ ຂອງບັນດາບັນພະບູລຸດລາວ ແລະ ຊົນຊັ້ນກໍາມະກອນຊາວຜູ້ອອກແຮງງານລາວບັນດາເຜົ່າ ໃນການປົກປົກຮັກສາ ແລະ ພັດທະນາປະເທດຊາດ ເພື່ອຄວມຢູ່ເຢັນເປັນສຸກຂອງປະຊາຊົນລາວໃນແຕ່ລະຍຸກ, ແຕ່ລະສະໄໝ ສືບທອດກັນມາເຖິງປັດຈຸບັນ.

   ຈາກນັ້ນ ຍັງໄດ້ຮັບຟັງການເລົ່າມູນເຊື້ອປະຫວັດຄວາມເປັນມາ ວັນສາດຕັ້ງພັກກອມມູນິດຫວຽດນາມຄົບຮອບ 93 ປີ ເຊິ່ງໄດ້ກໍາເນີດເກີດຂື້ນໃນຕົ້ນສະຕະວັດທີ 20 ບັນດາປະເທດຈັກກະພັດໄດ້ດໍາເນີນການຮຸກຮານ, ຍຶດຄອງເອົາປະເທດຫວຽດນາມເປັນຫົວເມືອງຂື້ນໃນປີ 1884 ປະຊາຊົນຊາວຫວຽດນາມໄດ້ເສຍສິດເປັນເຈົ້າ, ບໍ່ມີສິດເສລີພາບ, ຖືກກົດຂີຂູດຮີດຢ່າງໜັກໜ່ວງ ແລະ ປາເຖືອນ ໂດຍນໍາໃຈຮັກຊາດ ແລະ ຄຽດແຄ້ນຕໍ່ພວກລາເມືອງຂື້ນຜູ້ຮຸກຮານ ປະຊາຊົນຊາດຫວຽດນາມໄດ້ຈັດອາວຸດລຸກຂື້ນຕໍ່ສູ້ບໍ່ຍອມຈໍານົນຈົນສາມາດໄດ້ຮັບໄຊຊະນະຢ່າງສົມບູນ ໂດຍພາຍໃຕ້ການ ຊີ້ນໍາ ຂອງປະທານ ໂຮຈີມິນ. ພ້ອມກັນນັ້ນຍັງໄດ້ຢົກໃຫ້ເຫັນຄວາມສາມັກຄີຮ່ວມມືແບບພິດເສດ ລະຫວ່າງລາວກັບ ຫວຽດນາມ ໃນຫຼາຍໆດ້ານ, ເຄີຍຕໍ່ສູ້ ຄຽງບ່າ, ຄຽງໄຫຼ່, ຮ່ວມທຸກ ແລະ ສຸກ ດ້ວຍກັນມາເພື່ອຄວາມຢູ່ເຢັນເປັນສຸກຂອງປະຊາຊົນຫວຽດນາມ-ລາວ. ພ້ອມກັນປົກປ້ອງພື້ນແຜ່ນດິນອັນຄົບຖ້ວນຂອງສອງຊາດ ຫວຽດນາມ-ລາວ ໄວ້ໄດ້ຢ່າງໝັ້ນຄົງ.

     ໂອກາດທີ່ສໍາຄັນດັ່ງກ່າວຍັງໄດ້ມອບໃບຍ້ອງຍໍໃຫ້ສະມາຊິກກໍາມະບານເປັນຜູ້ທີມີ່ພົນງານດີເດັ່ນໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນຂອງກໍາມະບານຕື່ມອີກ.

       ການຈັດພິທີປາຖະກະຖາສອງວັນປະຫວັດສໍາຄັນໃນຄັ້ງນີ້ ກໍເພື່ອເຮັດໃຫ້ພະນັກງານ - ລັດຖະກອນ, ທະຫານ - ຕໍາຫຼວດ ແລະ ປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະ ກໍາແໜ້ນມູນເຊື້ອວັນສໍາຄັນດັ່ງກ່າວ, ນໍາໄປຈັດຕັ້ງປະຕິບັດ ແລະ ເປັນບົດຮຽນເຂົ້າໃນການຈັດຕັ້ງປະຕິບັດໜ້າທີ່ວຽກງານໃຫ້ມີການພັດທະນາຂື້ນເລື້ອຍໆ.

• ຕໍ່ໄປ >