ປະຫວັດຄວາມເປັນມາ

ຫົວຂໍ້ຂ່າວ:

ຍິນດີຕ້ອນຮັບເຂົ້າສູ່ເວັບໄຊສ໌ຄະນະໂຄສະນາອົບຮົມແຂວງຫົວພັນ

ປະຫວັດຄວາມເປັນມາຂອງຄະນະໂຄສະນາອົບຮົມແຂວງຫົວພັນ.

ລາຍລະອຽດ: ສ້າງຂື້ນເມື່ອ ວັນພະຫັດ, 15 ຕຸລາ 2020 04:26; ຂຽນໂດຍ ຄອຂ ຫົວພັນ

ປະຫວັດຄວາມເປັນມາຂອງຄະນະໂຄສະນາອົບຮົມແຂວງຫົວພັນ.

I. ຄະນະໂຄສະນາອົບຮົມແຂວຫົວພັນໄດ້ເຕີບໃຫຍ່ຂະຫຍາຍຕົວໃນແຕ່ລະໄລຍະຂອງການປະຕິວັດ.

ຄະນະໂຄສະນາອົບຮົມແຂວງຫົວພັນ, ຂຽນຫຍໍ້ດ້ວຍຕົວອັກສອນ “ຄ.ອ.ຂ” ແມ່ນອົງການຈັດຕັ້ງໜຶ່ງຂອງພັກຂັ້ນແຂວງທີ່ມີຖານະເທົ່າກັນກັບບັດາພະແນກການ ແລະ ອົງການຕ່າງໆຂັ້ນແຂວງ. ຄະນະໂຄສະນາອົບຮົມແຂວງຫົວພັນມີບົດບາດເປັນເສນາທິການ ແລະ ເປັນອົງການວິຊາສະເພາະໃຫ້ຄະນະບໍລິຫານງານພັກແຂວງ ໃນຂົງເຂດວຽກງານການເມືອງ - ແນວຄິດ, ຊີ້ແຈງອະທິບາຍໂຄສະນາເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ - ສັງຄົມ, ລະບຽບກົດໝາຍຂອງລັດ ແລະ ເຫດການສຳຄັນຕ່າງໆທີ່ກະທົບໃສ່ແນວຄິດ; ສຶກສາອົບຮົມການເມືອງ-ແນວຄິດ; ຄົ້ນຄ້ວາ ແລະ ເຜີຍແຜ່ທິດສະດີການເມືອງ.

ຄະນະໂຄສະນາອົບຮົມແຂວງຫົວພັນຈິ່ງໄດ້ຮັບການສ້າງຕັ້ງຂຶ້ນໃນຕົ້ນ ປີ1961. ກົງຈັກການຈັດຕັ້ງໃນເວລານັ້ນລວມຢູ່ນໍາ ພະແນກຖະແຫຼງຂ່າວ-ວັດທະນະທໍາ ເຊິ່ງຂຽນຫຍໍ້ດ້ວຍຕົວອັກສອນ (ຄສວ), ນັບແຕ່ມີການສ້າງຕັ້ງຂຶ້ນມາ ຄະນະໂຄສະນາອົບຮົມໄດ້ປະຕິບັດໜ້າທີ່ອັນມີກຽດຂອງຕົນ, ເຮັດໜ້າທີໂຄສະນາປຸກລະດົມແນວຄິດ, ວັດ ທະນະທໍາຜ່ານສື່ມ່ວນຊົນຕ່າງໆໂດຍ ຖືເອົາການໂຄສະນາເຜີຍແຜ່ແນວທາງແຜນນະໂຍບາຍຂອງພັກ, ນໍາໃຊ້ການໂຄສະ ນາເຄື່ອນທີ່ລົງສູ່ຮາກຖານທ້ອງຖິ່ນຕ່າງໆ, ນໍາເອົາແນວທາງແຜນນະໂຍບາຍຂອງພັກສົມທົບກັບການນໍາເອົາສາລະຄະດີ, ຮູບ ເງົາໃນຂະບວນການຕໍ່ສູ້ຢູ່ບັ້ນຮົບຕ່າງໆ ກໍ່ຄືໄຊຊະນະຂອງກອງທັບ ແລະ ປະຊາຊົນທີ່ຍາດມາໄດ້.. ການເຄື່ອນໄຫວດັ່ງກ່າວໄດ້ກາຍເປັນການປຸກລະດົມແນວຄິດ, ທັດສະນະຫຼັກໝັ້ນ, ນໍ້າໃຈຄຽດແຄ້ນຕໍ່ການຮຸກຮານຂອງຈັກກະພັດນັບ ມື້ນັບສູງຂຶ້ນ, ນັບມື້ນັບເຫັນແຈ້ງຜົນຮ້າຍຂອງສົງຄາມ, ປະຊາຊົນບັນດາເຜົ່າໄດ້ຍົກສູງນໍ້າໃຈຮັກຊາດອັນສູງສົ່ງລຸກຂຶ້ນຕໍ່ສູ້ຢ່າງເນື່ອງນິດ, ສາມາດຕີເອົາຊະນະຈັກກະພັດຜູ້ຮຸກຮານດິນແດນຂອງແຂວງຫົວພັນໄດ້ກາຍເປັນຖານທີ່ໝັ້ນຂອງການປະຕິວັດລາວ, ເປັນບ່ອນບໍາລຸງສ້າງຖັນແຖວຂອງພະນັກງານປະຕິວັດ, ເປັນສູນລວມທາງດ້ານຈິດໃຈເພື່ອຢຶດອໍານາດທົ່ວປະເທດ ໃນວັນທີ 2 ທັນວາ 1975 ໄດ້ຢ່າງຈົບງາມ.

ພາຍຫຼັງປະເທດຊາດໄດ້ຮັບການປົດປ່ອຍ ແລະ ສະຖາປານາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນທ່າມກາງສະ ພາບແວດລ້ອມທັງພາຍໃນປະເທດ, ໃນໂລກມີຂໍ້ຫຍຸ້ງຍາກ ແລະ ສິ່ງທ້າທາຍຫຼາຍຢ່າງແຕ່ໂດຍສືບຕໍ່ມູນເຊື້ອ ແລະ ບົດຮຽນໃນປະຫວັດສາດ ຄະນະໂຄສະນາອົບຮົມແຕ່ລະລຸ່ນຄົນໄດ້ເອົາໃຈໃສ່ເປັນພິເສດ ການສຶກສາອົບຮົມ ໂຄສະນາແນວທາງແຜນນະໂຍບາຍຂອງພັກຕໍ່ທຸກເປົ້າໝາຍຢູ່ໃນສັງຄົມ ເພື່ອເຮັດໃຫ້ບັນດາຊັ້ນຄົນ ເຂົ້າໃຈແຈ້ງຕໍ່ເຈດຈໍານົງຂອງພັກ ເພື່ອສ້າງຄວາມສາມັກຄີປອງດອງພັດທະນາແຂວງຫົວພັນ ໃຫ້ປະ ຊາຊົນຢູ່ດີກິນດີ, ໃນໄລຍະທີ່ສະພາບການຂອງໂລກມີການຫັນປ່ຽນພັກເຮົາໄດ້ສະດຸງໄວ ແລະ ໄດ້ມີການວາງແນວທາງປ່ຽນ ແປງໃໝ່, ໃນເວລານີ້ຄະນະໂຄສະນາອົບຮົມໄດ້ປຸກລະດົມທຸກກໍາລັງຮາກຖານ, ໂຄສະນາສຶກສາອົບຮົມປະຊາຊົນທຸກຊັ້ນຄົນ, ທຸກເຜົ່າໃຫ້ເຂົ້າໃຈແນວທາງປ່ຽນ ແປງໃໝ່ຂອງພັກຢ່າງມີຫຼັກການ, ແນວທາງປ່ຽນແປງໃໝ່ໄດ້ ນໍາເອົາຜົນປະໂຫຍດອັນແທ້ຈິງມາໃຫ້ປະຊາຊົນ.

ຜ່ານການເຄື່ອນໄຫວເປັນໄລຍະເວລາຫຼາຍປີ ໂດຍຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການ ເມືອງໃນໄລຍະໃໝ່ ມາ ເຖິງປີ 1995 ຄະນະໂຄສະນາອົບຮົມຈິ່ງໄດ້ຖືກແຍກອອກເປັນສອງພາກສ່ວນຄື: ຄະນະໂຄສະ ນາອົບຮົມແຂວງ ແລະ ພະແນກຖະແຫຼງຂ່າວ-ວັດທະນະທໍາແຂວງເປັນເອກະລາດໃຜມັນ, ແຕ່ດ້ານວິຊາການກໍຍັງມີການປະສານສົມທົບນໍາກັນເປັນຕົ້ນແມ່ນດ້ານຂ່າວຕ່າງໆໃນແຕ່ລະໄລຍະ.

II.ຫົວໜ້າ ຄະນະໂຄສະນາອົບແຂວງຫົວພັນໃນແຕ່ລະໄລຍະປະກອບມີບັນດາທ່ານຄື:

+ ທ່ານ ຄໍາສິງ ຫອມສົມບັດ (1961-1963) ວຽກງານການເມືອງໃນໄລຍະນີ້ແມ່ນ:

1 ຍົກສູງຈິດໃຈເປັນເຈົ້າການຕີສັດຕູ ເພີ່ມຄວາມສາມາດໃນການຕໍ່ສູ້ຂອງກໍາ ລັງປະປະກອບ ອາວຸດ ແລະ ເຄິ່ງອາວຸດ, ຊຸກຍູ້ສົງຄາມປະຊາຊົນຢ່າງແຂງແຮງ.

2. ດັບສູນ ແລະ ຂົນຂວາຍພວກກອງປຸ້ນໃຫ້ຫັນມາຫາການປະຕິວັດ, ຕີຕ້ານພວກຈັກກະພັດ ອາເມລິກາ ແລະ ພວກຫຸ່ນຂາຍຊາດໃຫ້ປະລາໄຊ.

3. ສ້າງພັກ, ພະນັກງານເພື່ອຕອບສະໜອງຄວາມຮຽກຮ້ອງ ຕ້ອງການຂອງການປະຕິວັດຂົນ ຂວາຍປະຊາຊົນ, ສ້າງແຂວງຫົວພັນໃຫ້ເປັນເຂດປົດປ່ອຍຢ່າງໜັກ ແໜ້ນ.

+ ທ່ານ ໄຊຍະວົງ ( 1963- 1974 ) ວຽກງານການເມືອງໃນໄລຍະນີ້ແມ່ນ:

ຄສະນາສຶກສາອົບຮົມປູກຈິດສໍານຶກໃຫ້ທຸກຄົນມີນໍ້າໃຈຮັກຊາດ-ຮັກບ້ານເກີດເມືອງນອນ, ເຜີຍແຜໂທດກໍາຂອງສັດຕູ, ສ້າງຄວາມຄຽດແຄ້ນສັດຕູ, ພ້ອມກັນລຸກຂຶ້ນປະກອບ ສ່ວນພາລະກິດ ປະຕິວັດຊາດ, ກໍ່ສ້າງຮາກຖານ, ນໍາເອົາທິດສະດີມາກ-ເລນິນທີ່ເປັນທິດເຍືອງທາງຂອງພັກມາເຜີຍແຜ່, ສ້າງພະນັກງານຫຼັກແຫຼ່ງຢູ່ຮາກຖານ, ປະຕິບັດຄໍາສັ່ງແນະນໍາຂອງຄະນະໂຄສະນາອົບຮົມສູນກາງພັກ, ໂຄສະນາເຜີຍແຜ່ ແລະ ດູດດຶງເອົາກໍາລັງຂອງສັດຕູ, ຈັດຊຸດອົບຮົມດັດສ້າງໃຫ້ພວກສະ ເລີຍເສິກ ທີ່ຈັບມາໄດ້ສ້າງໃຫ້ເຂົາເຈົ້າເປັນກໍາລັງປະຕິວັດ.

+ ທ່ານ ຄໍາພູ ( 1974 - 1981 ) ວຽກງານການເມືອງໃນໄລຍະນີ້ແມ່ນ:

ສ້າງພັກ - ພະນັກງານ ໃຫ້ມີຄຸນນະພາບ, ມີຄວາມຮູ້, ມີຄຸນສົມບັດ ແລະ ມີຄວາມສາມາດ, ປຸກລະດົມມູນເຊື້ອຮັກຊາດ, ຮັກລະບອບໃໝ່ ແລະ ເລີກຮື້ກົກຮາກຂອງປະຕິການເກົ່າ, ປົວແປງຮໍາບາດແຜສົງຄາມ.

+ ທ່ານ ບຸນເພັງ ( 1981 - 1985 ) ວຽກງານການເມືອງໃນໄລຍະນີ້ແມ່ນ:

ປະຕິບັດມະຕິຄໍາສັ່ງຂອງຂັ້ນເທິງ, ປຸກລະດົມຄວາມສາມັກຄີພາຍໃນຊາດ, ສ້າງໃຫ້ຊັ້ນຄົນຕ່າງໆຢູ່ໃນສັງຄົມໃຫ້ຮັກລະບອບໃໝ່, ພ້ອມກັນປົກປັກຮັກສາໝາກຜົນຂອງການປະຕິບັດໃຫ້ຍືນຍົງ, ຍົກສູງສະຕິລະວັງຕົວກຽມພ້ອມສູ້ຮົບເພື່ອທັບມ້າງກົນອຸ ບາຍຂອງສັດຕູໃນທຸກກໍລະນີ, ປຸກລະດົມ ແລະ ຍູ້ແຮງວຽກງານສຶກສາ-ວັດທະນະທໍາ, ສາທາລະນະສຸກໃຫ້ຂະຫຍາຍຕົວ.

+ ທ່ານ ທອງຜີວ ແຈ້ງມີໄຊ ( 1985 - 1988 ) ວຽກງານການເມືອງໃນໄລຍະນີ້ແມ່ນ:

ສ້າງພັກ, ພະນັກງານ ໃຫ້ມີຄຸນທາດການເມືອງໃຫ້ສົມກຽດກັບພັກກໍາອໍານາດ, ປຸກລະດົມນໍ້າໃຈຮັກຊາດ, ຮັກລະບອບໃໝ່ທົ່ວປວງຊົນ, ຫັນລົງຮາກຖານ, ປັບ ປຸງລະບົບປະຊາທິປະໄຕປະຊາຊົນ, ປັບປຸງລະບົບການເມືອງໃຫ້ມີຄວາມ ໜັກແໜ້ນ, ສ້າງຄວາມເຊື່ອຫມັ້ນຕໍ່ການນໍາພາຂອງພັກ, ປັບປຸງລະບົບກົງຈັກການຈັດຕັ້ງໃນ ທຸກລະບົບເພື່ອຮັບປະກັນຄວາມສາມັກຄີເປັນເອກະພາບພາຍໃນພັກ.

+ ທ່ານ ຊົວຢາເຮີ ( 1988 - 1996 ) ວຽກງານການເມືອງໃນໄລຍະນີ້ແມ່ນ:

ສຸມໃສ່ປົວແປງແນວຄິດ - ການເມືອງຂອງຄະ ນະພັກ, ສະມາຊິກພັກແຕ່ແຂວງເຖິງຮາກຖານ ໃຫ້ກັບຄືນສູ່ສະພາບປົກກະຕິ ເນື່ອງມາຈາກ ການຍຸບຄະນະພັກແຂວງ - ເມືອງ - ຮາກຖານ ດ້ວຍຮູບການດໍາເນີນຊີວິດການເມືອງ, ເປີດ ກອງປະຊຸມພັກແຕ່ຫນ່ວຍ ຮາກຖານ-ອົງຄະນະພັກເມືອງ ແລະ ອົງຄະນະພັກແຂວງ.

+ ທ່ານ ບຸນຍົງ ຊາຍລີຈັນ ( 1996 - 1999 ) ວຽກງານການເມືອງໃນໄລຍະນີ້ແມ່ນ:

ສຸມໃສ່ສ້າງພັກ - ພະນັກງານ ແລະ ປະຊາຊົນໃຫ້ຮັບຮູ້, ເຊື່ອມຊຶມແນວທາງປ່ຽນແປງໃໝ່ຂອງພັກ ແລະ ປຸກລະດົມຄະນະພັກ - ສະມາຊິກພັກໃນທົ່ວແຂວງໃຫ້ມີສະຕິພັກຄືນອີກ.

+ ທ່ານ ດຣ ອິນພອນ ແກ້ວຄໍາລຽງ (1999 - 2004 ) ວຽກງານການເມືອງໃນໄລຍະນີ້ແມ່ນ:

ສຸມໃສ່ເຊື່ອມຊຶມມະຕິຕ່າງໆຂອງພັກ, ຕ້ານກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກ, ປຸກລະດົມມູນເຊື້ອຄວາມສາມັກຄີຕ້ານການກະບົດຕໍ່ຊາດ-ຕໍ່ປະຊາຊົນ.

+ ທ່ານ ອິນພອນ ດິດປັນຍາ ຮັກສາການຫົວໜ້າຄະນະ ( 2004-2005 ) ວຽກງານການເມືອງໃນໄລຍະນີ້ແມ່ນ:

ສຸມໃສ່ປັບປຸງກົງຈັກຄະນະໂຄສະນາອົບຮົມຂັ້ນແຂວງ ແລະ ໂຄສະນາເຜີຍແຜໝາກຜົນການເຕີບໃຫຍ່ຂະຫຍາຍຕົວຂອງການປະຕິວັດຕໍ່ໂລກ ໂດຍພາຍໃຕ້ການ ນໍາພາຂອງພັກ ແລະ ຫັນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດຫມາຍ ໃນການກໍ່ສ້າງຮາກຖານການເມືອງຂອງພັກ.

+ ທ່ານ ຍິ່ງເລົ່າ ສຸເກີທອງ ( 2005 - 2010 ) ວຽກງານການເມືອງໃນໄລຍະນີ້ແມ່ນ:

ປຸກລະດົມຄວາມສາມັກຄີ ທົ່ວປວງຊົນເພື່ອ ພ້ອມກັນແກ້ໄຂປະກົດການຫຍໍ້ທໍ້ໃນສັງຄົມເປັນຕົ້ນ ແມ່ນພວກຄົນບໍ່ຫວັງດີກໍ່ຂຶ້ນໃນປີ 2003 ( ກຸ່ມຂອງໄມເຮີ ), ປັບປຸງວຽກງານກໍ່ສ້າງຮາກຖານການເມືອງ ໃນທົ່ວແຂວງ, ປັບປຸງວຽກງານໂຄສະນາອົບຮົມແຕ່ຂັ້ນແຂວງລົງຮອດຂັ້ນເມືອງໃຫ້ມີຮູບຮ່າງ ແລະ ແບບແຜນທີ່ໜັກແໜ້ນ, ເປີດຮຽນທິດສະດີຊັ້ນຕົ້ນຂັ້ນເມືອງ, ເປີດຮຽນບັນດາເອກະສານຕ່າງໆທີ່ມີຄວາມຈໍາເປັນໃຫ້ພະນັກງານພື້ນຖານຢູ່ບັນດາເມືອງ ໂດຍສະເພາະແມ່ນເມືອງ ແລະ ບ້ານລຽບສາຍແດນລາວ - ຫວຽດນາມ.

+ ທ່ານ ຄໍາວອນ ເພັງສະຫວັດ ( 2010 - 2015 ) ວຽກງານການເມືອງໃນໄລຍະນີ້ແມ່ນ:

ດໍາເດີນວຽກງານໂຄສະນາອົບຮົມໃຫ້ເລິກເຊິ່ງທົ່ວເຖິງທຸກເປົ້າຫມາຍເພື່ອ ສ້າງຄວາມ ຮັບຮູ້ເຂົ້າໃຈ ແລະ ຄວາມເຊື່ອຫມັ້ນຕໍ່ແນວທາງ ແລະ ການນໍາພາຂອງພັກ, ສຸກຍູ້ປຸກລະດົມນໍ້າໃຈຮັກຊາດ ແລະ ຄວາມເປັນເຈົ້າການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ.

+ ທ່ານ ຄໍາເຜີຍ ວົງສະຫັວນ ວ່າການຫົວໜ້າ ຄອຂ (2014-2016)

ບົ່ມສອນນໍ້າໃຈຮັກຊາດ, ເອກະພາບກັບແນວທາງຂອງພັກ, ທຸກຄົນມີຄວາມຮັກໄຄ່ໄມຕີສາມັກຄີປອງດອງທຸກເຜົ່າ, ເຄົາລົບປະຕິບັດກົດໝາຍ ເສີມຂະ ຫຍາຍຫົວຄິດປັນຍາ ພັດທະນາຕົນເອງໃຫ້ມີຄວາມສຸກ ປະເທດຊາດມັ່ງຄັ້ງເຂັ້ມ ແຂງ.