ວັນທີ 27 ມີນາ 2026, ຄະນະໂຄສະນາອົບຮົມແຂວງຫົວພັນ (ຄອຂ) ໄດ້ຈັດຕັ້ງການຮຽນສະໜັບສະໜູນພັກ ໃຫ້ແກ່ມະຫາຊົນຜູ້ທີ່ມີຄວາມກ້າວໜ້າ ຂື້ນຢູ່ຫ້ອງປະຊຸມຫ້ອງວ່າການແຂວງ, ໂດຍການເຂົ້າຮ່ວມເປັນປະທານ ແລະ ນຳສະເໜີເນື້ອໃນເອສານໂດຍ ສະຫາຍ ເພັດ ມະນີພອນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີນັກວິທະຍາກອນຈາກຄະນະໂຄສະນາອົບຮົມແຂວງ ແລະ ມະຫາຊົນກ້າວໜ້າຈາກພະແນກການ, ກົມກອງ, ອົງການຈັດຕັ້ງ ແລະ ໂຮງຮຽນເຂົ້າຮ່ວມ ທັງໝົດ 12 ສະຫາຍ.

     ການຮຽນສະໜັບສະໜູນພັກ ໃຫ້ແກ່ມະຫາຊົນຜູ້ທີ່ມີກ້າວໜ້າ ແມ່ນຂັ້ນຕອນໜຶ່ງໃນການຂະຫຍາຍມະຫາຊົນເຂົ້າເປັນສະມາຊິກພັກປະຊາຊົນປະຕິວັດລາວ ແນໃສ່ເຮັດໃຫ້ເຂົາເຈົ້າໄດ້ຮັບຮູ້ເຂົ້າໃຈເບື້ອງຕົ້ນກ່ຽວກັບ ພັກປະຊາຊົນປະຕິວັດລາວ ໂດຍສະເພາະແມ່ນປະຫວັດການກຳເນີດ, ວັດຖຸປະສົງ, ອຸດົມຄະຕິ, ທາດແທ້ ແລະ ຫຼັກການຂອງພັກ. ຄຽງຄູ່ກັນນັ້ນ, ຍັງໄດ້ສ້າງເງື່ອນໄຂໃຫ້ມະຫາຊົນກ້າວໜ້າຮັບຮູ້ກ່ຽວກັບມາດຖານ, ເງື່ອນໄຂຂອງຜູ້ຈະເຂົ້າເປັນສະມາຊິກພັກປະຊາຊົນປະຕິວັດລາວ, ຄຸນທາດການເມືອງ, ຄຸນສົມບັດສິນທຳປະຕິວັດ, ໜ້າທີ່ຂອງສະມາຊິກພັກ, ຂໍ້ຫ້າມສຳລັບສະມາຊິກພັກ, ແລະ ການຕີຕ້ານລະບອບອາດຍາສິດ, ສໍ້ລາດບັງຫຼວງ ແລະ ບັນດາປະກົດການຫຍໍ້ທໍ້ທີ່ເກີດຂື້ນໃນສັງຄົມ ແລະ ໃນພັກ.

     ໂອກາດນີ້, ບັນດາມະຫາຊົນກ້າວໜ້າທີ່ໄດ້ຮໍ່າຮຽນສະໜັບສະໜູນຍັງໄດ້ຮັບໃບຢັ້ງຢືນ ໂດຍໃຫ້ກຽດມອບໂດຍ ສະຫາຍ ເພັດ ມະນີພອນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ເພື່ອເປັນຫຼັກຖານໃນການຕິດຕາມເຂົ້າຮຽນກົດລະບຽບຂອງພັກຕໍ່ໄປ.