ເມືອງວຽງໄຊ ແຂວງຫົວພັນ ປາຖະກະຖາ ວັນຊາດທີ 2 ທັນວາ ແລະ ວັນຄ້າຍວັນເກີດປະທານ ໄກສອນ ພົມວິຫານ

ໃນຕອນເຊົ້າຂອງວັນທີ 29 ພະຈິກ 2024 ນີ້ ຢູ່ທີ່ຫໍວັດທະນະທໍາເມືອງວຽງໄຊ ໄດ້ຈັດພິທີປາຖະກະຖາ ວັນ ສະຖາປະນາ ສປປ ລາວ ຄົບຮອບ 49 ປີ (2 ທັນວາ 1975- 2 ທັນວາ 2024) ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920-13 ທັນວາ 2024) ໃຫ້ກຽດເຂົ້າຮ່ວມເປັນປະທານ ຂອງສະຫາຍ ສິງ ພອນ ທິດສະຫວັນ ຮອງເລຂາພັກເມືອງ ເມືອງວຽງໄຊ, ມີຄະນະປະຈໍາ, ກໍາມະການພັກເມືອງ, ອະນຸ ສອນສະຖານ ໄກສອນ ພົມວິຫານ ວຽງໄຊ, ໂຮງຮຽນທິດສະດີການເມືອງ ແລະ ການປົກຄອງແຂວງຫົວພັນ, ໂຮງຮຽນເຕັກນິກວິຊາຊີບ ແຂວງຫົວພັນ, ໂຮງຮຽນກິນນອນ ຊົນເຜົ່າ ແຂວງຫົວພັນ, ໂຮງຮຽນ ມສ ວຽງໄຊ,ສະມາຊິກພັກ, ພະນັກງານ-ລັດຖະກອນ ລັດວິສາຫະກິດ, ທະນາຄານ, ພະນັກງານອາວຸໂສບໍານານ, ປະຊາຊົນ 5 ບ້ານເທດສະບານອ້ອມຂ້າງເມືອງຈໍານວນຫນຶ່ງເຂົ້າ ຮ່ວມ ທັງຫມົດ 197 ທ່ານ, ຍິງ 89 ທ່ານ.

ໃນພິທີ ສະຫາຍ ສິງພອນ ທິດສະຫວັນ ຮອງເລຂາພັກເມືອງ ໄດ້ໃຫ້ກຽດຂຶ້ນບັນຍາຍເອກະສານ ວັນຊາດທີ 2 ທັນວາ ຄົບຮອບ 49 ປີ, ເຊິ່ງເປັນວັນທີ່ມີຄວາມຫມາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວ ທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ກູ້ຊາດຂອງຊາດລາວເຮົາ, ແມ່ນວັນທີ່ປະຊາຊົນລາວ ບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ທັງເປັນວັນແຫ່ງການກ້າວໄປສູ່ຍຸກສະໄຫມ ໃຫມ່ແຫ່ງສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ ແລະ ຕໍ່ຈາກນັ້ນ ສະຫາຍ ນ. ອ່າງທອງ ເລື້ອງສີຈັນທອງ ຮອງຫົວຫນ້າອະນຸສອນສະຖານໄກສອນ ພົມວິຫານວຽງໄຊ ຍັງໄດ້ຂຶ້ນຜ່ານປະຫວັດການກໍາເນີດ, ການ ເຄື່ອນໄຫວ ກໍຄືຜົນງານອັນໃຫຍ່ຫຼວງຂອງ ປະທານໄກສອນ ພົມວິຫານ ທີ່ຕິດພັນກັບພາລະກິດການປະຕິວັດໃນແຕ່ລະ ໄລຍະ, ຍົກໃຫ້ເຫັນຄຸນງາມຄວາມດີ ແລະ ແບບຢ່າງໃນພາລະກິດຕໍ່ສູ້ອັນພິລະອາດຫານ ບໍ່ຍອມຈໍານົນຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກປະຊາຊົນປະຕິວັດລາວ ໃນຂະບວນການຕໍ່ສູ້ປົດປ່ອຍຊາດ ກໍ່ຄືພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດໃນລະບອບໃຫມ່. ເພື່ອລະນຶກເຖິງຜົນງານ, ຄຸນງາມຄວາມດີ, ຄຸນສົມ ບັດສິນທໍາປະຕິວັດ, ເປັນແບບຢ່າງທີ່ດີຂອງປະທານ ໄກສອນ ພົມວິຫານ ທີ່ແສນເຄົາລົບຮັກທີ່ມີຕໍ່ພັກ, ຕໍ່ປະເທດຊາດ ພວກເຮົາທຸກຄົນໃນນາມເປັນຄົນລາວຜູ້ຮັກເຊື້ອແພງຊາດ ຈົ່ງພ້ອມກັນເສີມຂະຫຍາຍມູນເຊື້ອ, ຮ່ໍາຮຽນເອົາຄຸນ ສົມບັດ, ທັດສະນະປະຕິວັດ ແບບແຜນໃນການນໍາພາ, ແບບແຜນວິທີເຮັດວຽກ, ແບບແຜນດໍາລົງຊີວິດ ແລະ ແບບຢ່າງທີ່ ດີເລີດຂອງປະທານ ໄກສອນ ພົມວິຫານ, ເສີມຂະຫຍາຍມູນເຊື້ອວັນຊາດ ທີ 2 ທັນວາ ໃຫ້ມີຜົນສໍາເລັດໃຫມ່ ໄດ້ຢ່າງຕັ້ງ ຫນ້າ ສ້າງສາພັດທະນາປະເທດລາວເຮົາໃຫ້ນັບມື້ຮັ່ງມີ, ເຂັ້ມແຂງ ພາຍໃຕ້ການນໍາພາຂອງພັກປະຊາຊົນປະຕິວັດລາວຕະ ຫຼອດໄປ