ຄະນະໂຄສະນາອົບຮົມສູນກາງພັກຈັດກອງປະຊຸມຮັບສ່ອງແສງລາຍງານສະພາບ ຫາງສຽງ-ສັງຄົມ ຢູ່ ແຂວງຫົວພັນ

ໃນຕອນເຊົ້າເວລາ 8:00  ຂອງວັນທີ 3  ທັນວາ ປີ 2024 ນີ້ ສະຫາຍ ລາວປາວຊົ່ງ ນະວົງໄຊ, ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະໄດ້ລົງເຄື່ອນໄຫວເຮັດວຽກຢູ່ແຂວງຫົວພັນ ເຊິ່ງໄດ້ເຂົ້າພົບປະຢ້ຽມຂໍ່ານັບການນໍາແຂວງຫົວພັນ  ທີ່ຫ້ອງຮັບຮອງຫ້ອງວ່າການແຂວງ ແລະ ຈັດກອງປະຊຸມຮັບສ່ອງແສງລາຍງານສະພາບແນວຄິດຫາງສຽງສັງຄົມຂຶ້ນຢູ່ທີ່ຫ້ອງປະຊຸມຊັ້ນ 5 ຫ້ອງວ່າການປົກຄອງແຂວງຫົວພັນ ໂດຍການຕ້ອນຮັບ ແລະ ເປັນປະທານຮ່ວມຂອງ ສະຫາຍ ນ ລ້ອງຄໍາ ພອນມີໄຊ  ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ຜູ້ຮັບຜິດຊອບວຽກງານແນວຄິດທິດສະດີຂັ້ນແຂວງ, ໂດຍການເຂົ້າຮ່ວມຍັງມີ ສະຫາຍ  ຕົງລີ ເຕັ່ງ  ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ, ບັນດາສະຫາຍຄະນະກໍາມະການ ຄົ້ນຄ້ວາ, ວິເຄາະວິໄຈ, ຕິດຕາມເກັບກໍາສະພາບແນວຄິດຫາງສຽງສັງຄົມຂັ້ນແຂວງ ຕະຫຼອດຮອດພະນັກງານວິຊາການຈາກຄະນະໂຄສະນາອົບຮົມສູນກາງພັກ ແລະ ໂຄສະນາອົບຮົມແຂວງເຂົ້າຮ່ວມຢ່າງພ້ອມພຽງ.

ໃນໂອກາດນີ້ ສະຫາຍ  ລ້ອງຄໍາ ພອນມີໄຊ  ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງຍັງໄດ້ລາຍງານສະພາບວຽກງານພົ້ນເດັ່ນຂອງແຂວງຫົວພັນ  ເປັນຕົ້ນແມ່ນສະພາບ ການພັດທະນາເສດຖະກິດສັງ-ຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບແລະ ວຽກງານວັດທະນະທໍາ-ສັງຄົມ.

ໃນວາລະກອງປະຊຸມ ສະຫາຍ ລາວປາວຊົ່ງ ນະວົງໄຊ  ໄດ້ມີຄໍາເຫັນກ່າວຈຸດປະສົງຂອງການຈັດກອງປະຊຸມສ່ອງແສງລາຍງານ, ຊີ້ນໍາໃຫ້ບັນດາສະຫາຍຄະນະກໍາມະການ ແລະ ຜູ້ເຂົ້າຮ່ວມຍົກສູງຄວາມຮັບຜິດຊອບລາຍງານການເຄື່ອນໄຫວຕິດຕາມເກັບກໍາສະພາບແນວຄິດຫາງສຽງສັງຄົມໃນໄລຍະ 1 ປີຜ່ານມາ ໂດຍສະເພາະແມ່ນຍົກເອົາບັນຫາສະພາບແນວຄິດ-ຫາງສຽງສັງຄົມດ້ານຕັ້ງໜ້າ ແລະ ດ້ານຫຍໍ້ທໍ້ຂອງພະນັກງານ, ສະມາຊິກພັກ, ທະຫານດ ຕໍາຫຼວດ ແລະ ປະຊາຊົນ, ນັບທັງຖ້ອຍທໍານອງບິດເບືອນຂອງກຸ່ມຄົນບໍ່ດີ ທີ່ເປັນການໂຄ່ນລົ້ມໂຈມຕີ, ໃສ່ຮ້າຍປ້າຍສີ ພັກ-ລັດ, ຫາງສຽງທີ່ກະທົບເຖິງແນວຄິດຈິດໃຈ ແລະ ສິດທິມະນຸດອື່ນໆ ມາປະກອບຄໍາຄິດ – ຄໍາເຫັນ, ປຶກສາຫາລື.

ເພື່ອຮັບປະກັນໃຫ້ກອງປະຊຸມດໍາເນີນໄປດ້ວຍຜົນສໍາເລັດ ແລະ ມີເນື້ອໃນຄົບຖ້ວນຈາກນັ້ນ, ສະຫາຍ ປທ  ອົ້ມ ອິນທະລາ ຮອງຫົວໜ້າຄະນະໂຄສະນາອົບຮົມແຂວງ ໄດ້ຜ່ານບົດລາຍງານຫຍໍ້ ກ່ຽວກັບສະພາບແນວຄິດ-ຫາງສຽງສັງຄົມ ທີ່ພົ້ນເດັ່ນປະຈຳປີ 2024 ແລະ ທິດທາງການເຄື່ອນໄຫວວຽກງານຫາງສຽງສັງຄົມປະຈໍາປີ 2025; ຈາກນັ້ນ, ບັນດາຄະນະກໍາມະການຄົ້ນຄ້ວາວິເຄາະວິໄຈສະພາບແນວຄິດ-ຫາງສຽງສັງຄົມ ແຕ່ລະຂະແໜງການ ແລະ ແຕ່ລະຂົງເຂດວຽກງານ ແລະຜູ້ທີ່ໄດ້ເຂົ້າຮ່ວມ ໄດ້ພັດປ່ຽນກັນຂຶ້ນລາຍງານຕາມວາລະ ແລະຫົວຂໍ້ເຈາະຈິ້ມຂອງປະທານກອງປະຊຸມຢ່າງກົງໄປກົງມາ ເພື່ອຖອດຖອນບົດຮຽນ ແລ ແລກປ່ຽນຄໍາຄິດເຫັນເຊິ່ງກັນ ແລະ ກັນ ລະຫວ່າງສູນກາງ ກັບທ້ອງຖິ່ນ.

ຊຶ່ງຕະຫຼອດໄລຍະຜ່ານມາ  ຄະນະໂຄສະນາອົບຮົມແຂວງ, ເມືອງ ແລະ ຄະນະພັກແຕ່ລະຂັ້ນ, ຄະນະກໍາມະການຄົ້ນຄ້ວາ, ວິເຄາະ, ວິໄຈສະພາບແນວຄິດ-ຫາງສຽງສັງຄົມຂັນແຂວງ  ໄດ້ເອົາໃຈໃສ່ເປັນເສນາທິການໃຫ້ແກ່ຄະນະປະຈໍາພັກແຂວງ, ຄະນະໂຄສະນາອົບຮົມສູນກາງພັກ ໃນການຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ດ້ານຕັ້ງໜ້າ ແລະ ດ້ານຫຍໍ້ທໍ້ ທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ, ນັບທັງຖ້ອຍທໍານອງບິດເບືອນໃສ່ຮ້າຍປ້າຍສີ ຈາກກຸ່ມຄົນບໍ່ຫວັງດີຕໍ່ປະເທດຊາດ, ຕໍ່ການນໍາພາຂອງພັກ-ລັດ ກໍຄືຕໍ່ການນໍາພາ-ຊີ້ນໍາຂອງຄະນະບໍລິຫານງານພັກ ແຂວງຫົວພັນ ໃນປີ 2024 ຜ່ານມາ ມີຫຼາຍບັນຫາທີ່ເກັບກໍານໍາມາວິເຄາະວິໄຈ ແລະ ມອບໝາຍໃຫ້ຄະນະພັກຂັ້ນເທິງ, ຄະນະພັກ-ຄະນະນໍາຂະແໜງການກ່ຽວຂ້ອງດໍາເນີນການກວດກາ, ແກ້ໄຂ ແລະ ໄດ້ຊີ້ແຈງໃຫ້ສັງຄົມຮັບຊາບສໍາເລັດຫຼາຍກໍລະນີ. ນອກນີ້ ກໍຍັງມີບາງຫາງສຽງທີ່ເປັນດ້ານຫຍໍ້ທໍ້ທີ່ບໍ່ທັນໄດ້ຮັບການແກ້ໄຂສໍາເລັດນັ້ນ, ຄະນະກໍາມະການທີ່ເຮັດວຽກງານເກັບກໍາຫາງສຽງສັງຄົມຈະສືບຕໍ່ຊຸກຍູ້ຄະນະພັກ ແລະ ຂະແໜງການກ່ຽວຂ້ອງເຮັດວຽກງານສຶກສາອົບຮົມການເມືອງ-ແນວຄິດ, ແກ້ໄຂ ແລະ ຊີ້ແຈງໃຫ້ສັງຄົມຮັບຮູ້ເປັນຕົ້ນແມ່ນ ສະພາບແນວຄິດຄວາມບໍ່ເປັນແບບຢ່າງຂອງສະມາຊິກພັກ, ພະນັກງານ-ລັດຖະກອນ ແລະ ປະຊາຊົນຈໍານວນໜຶ່ງ, ຜົນກະທົບດ້າລົບບັນດາໂຄງການທົດລອງສໍາຫຼວດ, ຂຸດຄົ້ນແຮ່ທາດ, ການຂຸດຄົ້ນແຮ່ຄໍາຕົກຂ້ອນຕາມສາຍນໍ້າມ່າ ແລະ ອື່ນໆ.

ຕອນທ້າຍ, ສະຫາຍ ລາວປາວຊົ່ງ ນະວົງໄຊ, ກຳມະການສູນກາງພັກ,  ຮອງຫົວໜ້າຄະນະໂຄສະນາອົບຮົມສູນກາງພັກໄດ້ເໜັ້ນໜັກຕໍ່ກັບບັນຫາດັ່ງກ່າວຄື: ພາກສ່ວນທີ່ກ່ຽວຂ້ອງຕ້ອງໄດ້ວາງທິດທາງແຜນການໃນຕໍ່ໜ້າໃຫ້ລະອຽດ, ສືບຕໍ່ຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ຢູ່ຂັ້ນແຂວງ ແລະ ເມືອງ ເພື່ອຂໍທິດຊີ້ນໍາແກ້ໄຂຈາກຂັ້ນເທິງໃຫ້ທັນກັບເວລາ, ໂຄສະນາສຶກສາອົບຮົມການເມືອງ-ແນວຄິດໃຫ້ທຸກເປົ້າໝາຍແນໃສ່ຕ້ານການໂຄສະນາ ໃສ່ຮ້າຍປ້າຍສີທັບຖົມໂຈມຕີ ຂອງກຸ່ມຄົນບໍ່ຫວັງດີ ແລະ ສືບຕໍ່ແກ້ໄຂບັນຫາຫາງສຽງສັງຄົມໃນໄລຍະຜ່ານມາ ໃຫ້ສອດຄ່ອງກັບສະພາບຄວາມເປັນຈີງແຕ່ລະໄລຍະ, ວ່ອງໄວ ແລະ ທັນເວລາ.