ທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ ຫົວຫນ້າຄະນະໂຄສະນາອົບຮົບສູນກາງພັກ, ປະທານສະພາທິດສະດີສູນກາງພັກ, ຮອງຫົວຫນ້າອານຸກໍາມະການເນື້ອໃນກອງປະຊຸມໃຫຍ່ ຄັ້ງທີ XII ຂອງພັກ ພ້ອມດ້ວຍຄະນະລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງຫົວພັນ.

ເວລາ 13:30 ຂອງວັນທີ 20 ພະຈິກ 2024 ຢູ່ທີ່ຫ້ອງປະຊຸມຊັ້ນ V ຕືກສຳນັກງານຫ້ອງວ່າການແຂວງຫົວພັນ. ໄດ້ຈັດກອງປະຊຸມຕິດຕາມຊຸກຍູ້ການດໍາເນີນກອງປະຊຸມ 3 ຂັ້ນ ແລະ ແນະນໍາການກະກຽມສະເຫຼີມສະຫຼອງ 3 ວັນປະຫວັດສາດຄື: ວັນສ້າງຕັ້ງພັກຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດຂອງ ປະທານ ໄກ່ສອນ ພົມວິຫານ ຄົບຮອບ 105 ປີ ພາຍໃຕ້ການເປັນປະທານຂອງ ທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ ຫົວຫນ້າ ຄະນະໂຄສະນາອົບຮົບສູນກາງພັກ, ປະທານສະພາທິດສະດີສູນກາງພັກ, ຮອງຫົວ ຫນ້າອານຸກໍາມະການເນື້ອໃນກອງປະຊຸມໃຫຍ່ ຄັ້ງທີ XII ຂອງພັກພ້ອມດ້ວຍຄະນະ, ທ່ານ ປອ ຄໍາແພງ ໄຊສົມແພງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງຫົວພັນ, ມີການນໍາຂອງແຂວງ, ຕາງຫນ້າ ສອງກໍາລັງປ້ອງກັນຊາດ-ປ້ອງກັນຄວາມສະຫງົບ, ຫົວຫນ້າພະແນກການຂອງແຂວງຕະຫຼອດຮອດພະນັກງານ – ລັດຖະ ກອນຄະນະໂຄສະນາອົບຮົມແຂວງເຂົ້າຮ່ວມຢ່າງພ້ອມພຽງ.

ກອງປະຊຸມຍັງໄດ້ຮັບຟັງ ການລາຍງານໂດຍຫຍໍ້ວຽກງານທີ່ພົ້ນເດັ່ນໃນໄລຍະ 9 ເດືອນຜ່ານມາຂອງແຂວງ ແລະ ການດໍາເນີນກອງປະຊຸມ 3 ຂັ້ນ, ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກໃນໄລຍະຜ່ານມາ ເປັນຕົ້ນແມ່ນ: ຕົວແບບທາງດ້ານການຜະລິດກະສິກໍາ, ການຄຸ້ມຄອງບໍລິຫານລັດ, ການແກ້ໄຂຄວາມທຸກຍາກຢູ່ຮາກຖານຈາກ ທ່ານ ເຈົ້າແຂວງ, ຈາກນັ້ນຍັງໄດ້ຮັບຟັງການເຜີຍແຜ່ບັນດານິຕິກໍາຕ່າງໆກ່ຽວກັບການກະກຽມສະເຫຼີມສະ ຫຼອງ 3 ວັນປະຫວັດສາດໃນ ປີ 2025 ຄື : ວັນສ້າງຕັ້ງພັກຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 105 ປີ ຈາກຄະນະຮັບຜິດຊອບສະເຫຼີມສະ ຫຼອງ 3 ວັນປະຫວັດສາດຂັ້ນສູນກາງ.

ຕອນທ້າຍກອງປະຊຸມ ທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ ຫົວຫນ້າ ຄະນະໂຄສະນາອົບຮົບສູນກາງພັກ, ປະທານສະພາທິດສະດີສູນກາງພັກ, ໄດ້ເນັ້ນຫນັກກ່ຽວກັບການກະກຽມກອງປະຊຸມໃຫຍ່ 3 ຂັ້ນຂອງພັກ ແລະ ກະກຽມການສະເຫຼີມສະຫຼອງວັນ ປະຫວັດສາດໃຫ້ສຸມໃສ່ປຶກສາຫາລື, ແບ່ງຄວາມຮັບຜິດຊອບຢ່າງລະອຽດແຕ່ລະຫນ້າວຽກ, ມອບໃຫ້ແຕ່ລະພາກສ່ວນ ພາກສ່ວນມີຄວາມຮັບຜິດຊອບລະອຽດ, ຈະແຈ້ງ, ແຕ່ງຕັ້ງຄະນະຮັບຜິດຊອບຂັ້ນແຂວງເພື່ອຮັບຜິດຊອບໂດຍກົງ ແລະ ພ້ອມກັນຈັດຕັ້ງປະຕິບັດຕາມພາລະບົດບາດ, ສິດ ແລະ ຫນ້າທີ່ໃຫ້ມີຜົນສໍາເລັດທັນກັບກໍານົດເວລາ, ການຈັດຕັ້ງປະຕິບັດການກະກຽມສະເຫຼີມສະຫຼອງ ຕ້ອງຕິດພັນກັບການກະກຽມກອງປະຊຸມ 3 ຂັ້ນ ໃຫ້ມີຂະບວນຟົດຟື້ນ, ມີບັນຍາກາດ, ການສະເຫຼີມສະຫຼອງຕ້ອງບົນຈິດໃຈປະຍັດມັດທະຍັດ ແລະ ພ້ອມນັ້ນຕ້ອງໄດ້ເອົາໃຈໃສ່ເປັນເຈົ້າການເຮັດວຽກ ງານການເມືອງແນວຄິດ, ວຽກງານໂຄສະນາອົບຮົມ ເຂົ້າສູ່ລົງເລິກເຖິງຮາກຖານທ້ອງຖິ່ນ ແນໃສ່ເຮັດໃຫ້ ພະນັກງານ ທະຫານ – ຕໍາຫຼວດ, ນັກທຸລະກິດ ຕະຫຼອດຮອດປວງຊົນບັນດາເຜົ່າຊາວແຂວງຫົວພັນ ໄດ້ຮັບຮູ້ ແລະ ເຂົ້າໃຈຕໍ່ແນວ ທາງປ່ຽນແປງໃຫມ່ຂອງພັກ ເພື່ອເຮັດໃຫ້ການຈັດຕັ້ງປະຕິບັດແນວທາງຂອງພັກໄດ້ບັນລຸຕາມລະດັບຄາດຫມາຍທີ່ວາງ ໄວ້.