ຄະນະໂຄສະນາອົບຮົມແຂວງ ລົງຕິດຕາມ, ຊຸກຍູ້ວຽກງານໂຄສະນາອົບຮົມຮອບດ້ານ ປະຈໍາປີ 2024 ຢູ່ເມືອງຊໍາເຫນືອ ແລະ ເມືອງຫົວເມືອງ.

ວັນທີ 17-18 ຕຸລາ 2024 ຜ່ານມານີ້ ຄະນະໂຄສະນາອົບຮົມແຂວງຫົວພັນ ໄດ້ລົງຕິດຕາມ, ຊຸກຍູ້ວຽກ ງານໂຄສະນາອົບຮົມຮອບດ້ານ ປະຈໍາປີ 2024 ຢູ່ເມືອງຊໍາເຫນືອ ແລະ ເມືອງຫົວເມືອງ ເຊິ່ງນໍາພາໂດຍ ທ່ານ ສຸກ ເສີມ ຢາງຈາງ ຮອງຫົວຫນ້າຄະນະໂຄສະນາອົບຮົມແຂວງ ພ້ອມດ້ວຍຫົວຫນ້າ, ຮອງຫົວຫນ້າຂະແຫນງ ແລະ ວິຊາການ ຂອງຄະນະໂຄສະນາອົບຮົມແຂວງ ແລະ ຍັງໃຫ້ກຽດຕ້ອນຮັບໂດຍ ທ່ານ ຕຸ້ຍ ຄໍາບູລາວົງ ຄະນະປະຈໍາພັກເມືອງ ຫົວຫນ້າຄະນະໂຄສະນາອົບຮົມເມືອງຊໍາເຫນືອ,  ທ່ານ ຊຽງທີ ວິໄລພັນ ກໍາມະການພັກເມືອງ ຫົວຫນ້າຄະນະໂຄສະນາອົບຮົມເມືອງຫົວເມືອງ, ມີຮອງຫົວຫນ້າ ພ້ອມດ້ວຍພະນັກງານວິຊາການຂອງຄະນະໂຄສະນາອົບ ຮົມເມືອງ 2 ເມືອງດັ່ງກ່າວເຂົ້າຮ່ວມຢ່າພ້ອມພຽງ.

ກອງປະຊຸມຍັງໄດ້ຮັບຟັງການລາຍງານໂດຍຫຍໍ້ ກ່ຽວກັບການນໍາພາ-ຊີ້ນໍາເຮັດວຽກງານ ການເມືອງ-ແນວ ຄິດ, ວຽກງານໂຄສະນາອົບຮົມເປັນຕົ້ນ; ການເຊື່ອມຊຶມບັນດາມະຕິຕ່າງໆ, ວຽກງານໂຄສະນາປາຖະກະຖາ ແລະ ສະພາບແນວຄິດຂອງສະມາຊິກພັກ, ພະນັກງານ-ລັດຖະກອນ ແລະ ປະຊາຊົນພາຍໃນເມືອງ, ຈາກທ່ານ ຫົວຫນ້າ ຄະນະໂຄສະນາອົບຮົມທັງ 2 ເມືອງ ຈາກນັ້ນບັນດາຂະແຫນງການຂອງແຂວງ ແລະ ເມືອງ ກໍໄດ້ມີການປະກອບຄໍາ ຄິດຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງບັນດາຂະແຫນງການຂອງແຂວງ ແລະ ເມືອງໂດຍ ສະເພາະແມ່ນຍົກໃຫ້ເຫັນ ແບບແຜນວິທີເຮັດວຽກໃນໄລຍະຜ່ານມາຂອງແຕ່ລະຂະແຫນງການໂດຍເນັ້ນໃສ່ 4 ຫນ້າ ວຽກຕົ້ນຕໍ: ວຽກງານບໍລິຫານຫ້ອງການ, ວຽກງານໂຄສະນາ, ວຽກງານອົບຮົມ ແລະ ວຽງານສັງລວມ-ຫາງສຽງ ສັງຄົມ.

ໃນຕອນທ້າຍ ທ່ານ ສຸກ ເສີມ ຢາງຈາງ ຮອງຫົວຫນ້າຄະນະໂຄສະນາອົບຮົມແຂວງ ກໍ່ໄດ້ເປັນກຽດມີຄໍາ ເຫັນຊີ້ນໍາ ເຊິ່ງສະຫາຍໄດ້ຍົກໃຫ້ເຫັນຄວາມຫມາຍຄວາມສໍາຄັນຂອງວຽກງານໂຄສະນາອົບຮົມ ກໍ່ຄືວຽກງານແນວ ຄິດໂດຍສະເພາະແມ່ນການຍົກສູງຂອງວຽກງານໂຄສະນາອົບຮົມໃຫ້ດີຂຶ້ນເລື້ອຍໆ.