ພິທີປິດຊຸດຝຶກອົບຮົມບໍາລຸງ-ຍົກລະດັບທິດສະດີແນວທາງການເມືອງ ຂອງພັກ

ຕອນເຊົ້າ ວັນທີ 22 ສິງຫາ 2024, ຄະນະໂຄສະນາອົບຮົມແຂວງຫົວພັນໄດ້ຈັດພິທີປິດຊຸດຝຶກອົບຮົມບໍາລຸງ-ຍົກລະດັບທິດສະດີ-ແນວທາງການເມືອງຂອງພັກ ໃຫ້ແກ່ພະນັກງານຫຼັກແຫຼ່ງຂອງແຂວງ ພາຍຫຼັງໄດ້ດຳເນີນມາເປັນເວລາ 9 ວັນ, ເຊີ່ງຈັດຂື້ນຢູ່ທີ ຫ້ອງປະຊຸມໃຫຍ່ຊັ້ນ 5 ຕືກສຳນັກງານອົງການປົກຄອງແຂວງ ໃຫ້ກຽດເປັນປະທານ ຂອງທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ ປະທານສະພາປະຊາຊົນແຂວງ, ມີທ່ານ ຕົງລີ ເຕັ່ງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ມີບັນດາທ່ານການນຳແຂວງ, ຄະນະຮັບຜິດຊອບ, ພາກສ່ວນກ່ຽວຂ້ອງ ແລະ ນັກສຳມະນາກອນເຂົ້າຮ່ວມຢ່າງພ້ອມພຽງ

ໃນພິທີ, ທ່ານ ສຸກເສີມ ຢາງຈາງ ຮອງຫົວໜ້າຄະນະໂຄສະນາອົບຮົມແຂວງ ໄດ້ລາຍງານສະພາບການຈັດຕັ້ງຝຶກອົບຮົມ ເຊິ່ງທ່ານໄດ້ໃຫ້ຮູ້ວ່າ: ຊຸດຝຶກອົບຮົມບໍາລຸງ-ຍົກລະດັບທິດສະດີ-ແນວທາງການເມືອງຂອງພັກ ຄັ້ງນີ້ ເພື່ອຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ຄັ້ງທີ X ຂອງອົງຄະນະພັກແຂວງຫົວພັນ ໂດຍສະເພາະແມ່ນສ້າງການຫັນປ່ຽນຈິນຕະນາການທາງດ້ານທິດສະດີ-ແນວທາງຂອງພັກ ໃຫ້ແກ່ພະນັກງານ-ລັດຖະກອນໃນຂອບເຂດທົ່ວແຂວງ ໃຫ້ປະກົດຜົນເປັນຈີງ ແລະ ສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງໜ້າທີ່; ອິກຢ່າງໜຶງແມ່ນຍົກລະດັບຄວາມຮັບຮູ້-ຄວາມເຂົ້າໃຈ, ຄວາມຮູ້ພື້ນຖານກ່ຽວກັບລັດທິມາກ-ເລນິນ, ມູນເຊື້ອ ຂອງຊາດລາວ, ການສ້າງ ແລະ ບູລະນະລະບອບປະຊາທິປະໄຕ ປະຊາຊົນຕາມທິດສັງຄົມນິຍົມ, ສາມາດຮັບຮູ້-ເຂົ້າໃຈດ້ານທິດສະດີການເມືອງ, ແນວທາງນະໂຍບາຍຂອງພັກ, ການຄຸ້ມຄອງຂອງລັດ, ເຮັດໃຫ້ນັກສຳມະນາກອນມີທັດສະນະແນວຄິດຊົນຊັ້ນກໍາມະກອນ, ມີແນວຄິດເຊື່ອໝັ້ນຕໍ່ການນໍາພາຂອງພັກ, ເຊື່ອໝັ້ນຕໍ່ອຸດົມການ ກໍຄືພາລະກິດປ່ຽນແປງໃໝ່ຢ່າງມີຫຼັກການຂອງພັກ, ມີຄຸນສົມບັດສິນທໍາປະຕິວັດ, ມີຄວາມຈົ່ງຮັກພັກດີຕໍ່ປະເທດຊາດ, ຕໍ່ປະຊາຊົນ, ມີຄວາມຫ້າວຫັນເປັນແບບຢ່າງໃນທຸກວຽກງານນັບມື້ນັບມີຄຸນນະພາບສູງຂຶ້ນ.

ການຈັດຊຸດຝືກອົມຮົມຄັ້ງນີ້ ແມ່ນຫັນເອົາຫຼັກສຸດບໍາລຸງຍົກລະດັບພະນັກງານຫຼັກແຫຼ່ງ ໂຄງການ 45 ວັນ ມາເປັນ 9 ວັນ ເຊິ່ງປະກອບດ້ວຍ 14 ບົດ ໂດຍໃຊ້ເວລາລວມທັງໝົດ 64 ຊົ່ວໂມງ ລວມທັງການຂຽນບົດເກັບກ່ຽວ, ແກ້ຂອງຂ້ອງໃຈຂອງນັກສໍາມະນາກອນ ໂດຍມີນັກສຳມະນາກອນທີ່ເປັນ ພະນັກງານນໍາພາຄຸ້ມຄອງ, ນາຍ-ພົນທະຫານ ແລະ ນາຍ-ພົນຕໍາຫຼວດ ທີ່ເປັນສະມາຊິກພັກປະຊາຊົນປະຕິວັດລາວ ຢູ່ບັນດາອົງການ ແລະ ພະແນກການຂອງແຂວງ ທີ່ບໍ່ທັນມີລະດັບທິດສະດີການເມືອງ ແລະ ການປົກຄອງ ທີ່ມີເປົ້າໝາຍເປັນພະນັກງານສືບຖອດປ່ຽນແທນໃນອະນາຄົດ ຈຳນວນ 45 ສະຫາຍ ເຂົ້າຮ່ວມ.

ໂອກາດນີ້, ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ປະທານສະພາປະຊາຊົນແຂວງ ໄດ້ຕີລາຄາສູງຕໍ່ຜົນສຳເລັດຊຸດຝຶກອົບຮົມ ພ້ອມທັງສະແດງຄວາມເຊື່ອໝັ້ນວ່າ ບັນດານັກສຳມະນາກອນຈະນຳເອົາບົດຮຽນທີ່ໄດ້ຮໍ່າຮຽນໃນຄັ້ງນີ້ ໄປໝູນໃຊ້ເຂົ້າໃນໜ້າທີ່ການເມືອງຂອງຕົນ ເພື່ອເປັນແນວທາງໃນການພັດທະນາຂົງເຂດວິຊາສະເພາະທີ່ຕົນຮັບຜິດຊອບ ແລະ ທ່ານໄດ້ຮຽກຮ້ອງໃຫ້ຄະນະຮັບຜິດຊອບ ເພີ່ມທະວີທາງດ້ານເນື້ອໃນ, ປະລິມານ, ຄຸນນະພາບ ແລະ ປະສິດທິຜົນ ໃນການຈັດຊຸດຝຶກອົບຮົມບໍາລຸງ-ຍົກລະດັບທິດສະດີ-ແນວທາງການເມືອງຂອງພັກ ໃຫ້ແກ່ພະນັກງານຫຼັກແຫຼ່ງຂອງແຂວງ.