ວັນທີ 12 ກໍລະກົດ 2024 ຜ່ານມານີ້, ຄະນະໂຄສະນາອົບຮົມແຂວງຫົວພັນ ໄດ້ຈັດພິທີປາຖະກະຖາ ວັນເກີດ ປະທານ ສຸພານຸວົງ ຄົບຮອບ 115 ປີ (13 ກໍລະກົດ 1909 – 13 ກໍລະກົດ 2024) ຢູ່ທີ່ຫໍວັດທະນະທໍາຂອງແຂວງ, ໂດຍມີບັນດາທ່ານການນໍາຂັ້ນແຂວງ, ສະພາປະຊາຊົນແຂວງ, ຫົວຫນ້າ, ຮອງຫົວຫນ້າພະແນກການ, ກອງບັນຊາການ ທະຫານ, ກອງບັນຊາການຕໍາຫຼວດ, ບັນດາທະນາຄານ, ບັນດາລັດວິສາຫະກິດ ຕະຫຼອດຮອດພະນັກງານລັດຖະກອນ ອ້ອມຂ້າງແຂວງເຂົ້າຮ່ວມຮັບຟັງທັງຫມົດມີ 310 ທ່ານ, ຍິງ 120 ທ່ານ.
ໃຫ້ກຽດປາຖະກະຖາ ໂດຍ ທ່ານ ເພີດ ມາປັນຍາ ຮອງເລຂາພັກແຂວງ (ຜູ້ປະຈໍາການ), ເຊີ່ງທ່ານໄດ້ຫວນຄືນ ຊີວິດ ແລະ ການເຄື່ອນໄຫວປະຕິວັດ ຂອງ ປະທານ ສຸພານຸວົງ. ປະທານ ສຸພານຸວົງ ເກີດວັນທີ 13 ກໍລະ ກົດ 1909 ທີ່ ຫຼວງພະບາງ ໃນຄອບຄົວເຊື້ອເຈົ້າ, ເປັນໂອຣົດ ຂອງເຈົ້າມະຫາອຸປະຣາດບຸນຄົງ ແລະ ຫມອມຄໍາອ້ວນ ມີເອື້ອຍ 2 ຄົນ ຄື: ເຈົ້າຍິງທະວີວັນ ແລະ ເຈົ້າຍິງຈິນດາ ຣັດສະຫມີ, ມີອ້າຍຕ່າງມານດາ 2 ຄົນ ຄື: ເຈົ້າເພັດຊະຣາດ ແລະ ເຈົ້າສຸວັນນະພູມມາ.
ທຸກໄລຍະຂອງການປະຕິວັດ ປະທານ ສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນ ເພື່ອນໍາພາ-ຊີ້ນໍາ ຂະບວນການປະຕິວັດລາວ ຍາດເອົາໄຊຊະນະອັນຍິ່ງໃຫຍ່ມາໃຫ້ແກ່ປະເທດຊາດ. ປະທານ ໄກສອນ ພົມວິຫານ ໄດ້ເວົ້າເຖິງ ປະທານ ສຸພານຸວົງວ່າ: ” ຊື່ສຽງຮຽງນາມ ຂອງສະຫາຍໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດນທໍາ ອິດທີ່ໄດ້ເອົາຊີວິດຂອງຕົນຜູກພັນກັບການປະຕິວັດຕະຫຼອດມາ ໂດຍບໍ່ງໍ້ງ່ຽງຕໍ່ຄວາມລໍາບາກ, ຄວາມເສຍສະຫຼະໃດໆ ກະທັ້ງເຖິງບໍ່ຫວາດຫວັ່ນຕໍ່ກັບການຈັບກຸມຄຸມຂັງຂອງສັດຕູ, ຍາມໃດກໍ່ຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະ ຄວາມວັດທະນາຖາວອນຂອງປະເທດຊາດ, ເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນ “ໃນຫຼາຍສິບປີທີ່ຜ່ານມາທ່ານ ປະທານ ສຸພານຸວົງ” ໄດ້ເຂົ້າຮ່ວມກັບຫມູ່ຄະນະນໍາພາຂອງພັກເຮົາເລີ່ມຕັ້ງ ແຕ່ຊຸມປີຕົ້ນຂອງການປະຕິວັດ, ເຂົ້າຮ່ວມກໍ່ສ້າງຮາກຖານປະຕິວັດ ແລະ ຖານທີ່ຫມັ້ນຕໍ່ຕ້ານທີ່ກ້າແກ່ນຕະຫລອດມາໃນ ສອງສະໄຫມຕໍ່ຕ້ານອັນຍາວນານຂອງປະຊາຊົນເຮົາ”. ຕະຫຼອດຊີວິດຂອງປະທານ ສຸພານຸວົງ, ບໍ່ວ່າຈະຢູ່ໃນຕໍາແຫນ່ງໃດ, ຄວາມຮັບຜິດຊອບອັນໃດ ເພິ່ນກໍ່ໄດ້ອຸທິດຫມົດຈິດຫມົດໃຈ, ຫມົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ພາລະກິດປົກປັກຮັກສາ ແລະ ສ້າງສາປະເທດຊາດເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນ ພູນສຸກຂອງປະຊາຊົນເຮົາ ແລະ ການປາຖະກະຖາຄັ້ງນີ້ ເພື່ອໂຄສະນາສຶກສາອົບຮົມໃຫ້ແກ່ພະນັກງານ, ສະມາຊິກພັກ, ນັກຮຽນ, ນັກສຶກສາ ປະຊາຊົນບັນດາເຜົ່າໄດ້ຮໍ່າຮຽນເອົາແບບຢ່າງ, ນໍ້າໃຈຮັກຊາດອັນດູດດື່ມ, ຈິດໃຈຕໍ່ສູ້ອັນພິລະອາດຫານກ້າແກ່ນ, ທັດສະນະຫຼັກຫມັ້ນອັນຫນຽວແຫນ້ນ ແລະ ນໍ້າໃຈເສຍສະຫຼະເພື່ອຊາດ, ເພື່ອປະຊາຊົນ ແລະ ຮ່ໍາຮຽນເອົາແບບຢ່າງ ຄຸນສົມບັດ, ສິນທໍາປະຕິວັດອັນຜ່ອງໃສ ກໍຄືແບບຢ່າງການດໍາລົງຊີວິດ ແລະ ອຸດທິຕົນເພື່ອພາລະກິດຂອງພັກຂອງ ປະທານສຸພານຸວົງ.
