ວັນທີ 10-11 ກໍລະກົດ 2024 ທີຜ່ານມານີ້, ຄະນະບໍລິຫານງານພັກ ແຂວງຫົວພັນ ໄດ້ຈັດກອງປະຊຸມຄົບຄະນະຄັ້ງທີ 14 ສະໄໝທີ X ຢູ່ທີ່ຫ້ອງປະຊຸມຊັ້ນ 5 ຕືກສຳນັກງານຫ້ອງວ່າການປົກຄອງແຂວງ ໃຫ້ກຽດເປັນປະທານໂດຍທ່ານ ປອ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫົວພັນ, ມີຄະນະປະຈຳພັກແຂວງ, ກຳມະການພັກແຂວງ, ສະພາປະຊົນແຂວງ, ຫົວໜ້າພະແນກການຂັ້ນແຂວງ, ເລຂາພັກເມືອງ, ເຈົ້າເມືອງ 10 ເມືອງທົ່ວແຂວງເຂົ້າຮ່ວມ.
ກອງປະຊຸມ ທ່ານ ເພີດ ມາປັນຍາ ຮອງເລຂາພັກແຂວງ ຜູ້ປະຈຳການ ໄດ້ຜ່ານຮ່າງບົດສະຫຼຸບຕີລາຄາການເຄື່ອນໄຫວຈັດຕັ້ງນຳພາ-ຊີ້ນຳ ຂອງຄະນະບໍລິຫານງານພັກແຂວງ ປະຈຳ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ແລະ ວຽກຈຸດສຸມ 3 ເດືອນ 7-8-9 ປີ 2024. ໃນໄລຍະ 06 ເດືອນຜ່ານມາ ແຂວງຫົວພັນ ໄດ້ເອົາໃຈໃສ່ເຄື່ອນໄຫວຈັດຕັ້ງປະຕິບັດຕາມມະຕິ X ຂອງອົງຄະນະພັກແຂວງ ຕາມແນວທາງປ້ອງກັນຊາດ-ປ້ອງກັນຄວາມສະຫງົບທົ່ປວງຊົນຮອບດ້ານ, ເຮັດໃຫ້ແຂວງຫົວພັນ ມີຄວາມສະຫງົບປອດໄພ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເອົາໃຈໃສ່ສະກັດກັ້ນດ້ານປະກົດການຫຍໍ້ທໍ້ໃນສັງຄົມຢ່າງເຂັ້ມງວດ ເປັນຕົ້ນແມ່ນ ຕ້ານການຄ້າຂາຍເຖື່ອນ, ອາດຊະຍາກຳ, ການຄ້າມະນຸດ, ອຸປະຕິເຫດຕາມທ້ອງຖະໜົນ, ໃນ 06 ເດືອນຕົ້ນປີ 2024 ນີ້, ແຂວງຫົວພັນ ມີເນື້ອທີ່ປູກຝັງທັງໝົດ 54,861 ເຮັກຕາ, ເກັບກ່ຽວຜົນຜະລິດໄດ້ 41ໂຕນກວ່າ, ໃນນີ້: ເນື້ອທີ່ປູກເຂົ້າປະຕິບັດໄດ້ 20 ເຮັກຕາກວ່າ, ນາແຊງ 2 ພັນກ່ວາເຮັກຕາ, ເນື້ອທີ່ປູກພືດສະບຽງອາຫານ 4 ພັນກ່ວາເຮັກຕາ, ມີງົວ 9 ພັນ 561 ໂຕ, ຄວາຍ 3 ພັນ 835 ໂຕ, ແບ້ 6 ພັນ 958 ໂຕ, ໝູ 31 ພັນ 230 ໂຕ, ສັດປີກ 1 ລ້ານກ່ວາໂຕ, ປາ 1 ລ້ານກ່ວາໂຕນ, ແລະ ໄຂ່ 574 ໂຕນ, ປັດຈຸບັນສາມາດລຶບລ້າງບ້ານທຸກຍາກໄດ້ 233 ບ້ານ, ບ້ານທຸກຍາກມີ 491 ບ້ານ, ລຶບລ້າງຄອບຄົວທຸກຍາກໄດ້ 25 ພັນ 580 ຄອບຄົວ ແລະ ຍັງມີຄອບຄົວທຸກຍາກຈຳນວນ 28 ພັນ 128 ຄອບຄົວ, ສ້າງບ້ານພັດທະນາໄດ້ 41 ບ້ານ, ຄອບຄົວພັດທະນາໄດ້ 3 ພັນ 808 ຄອບຄົວ; ມູນຄ່າການສົ່ງອອກສິນຄ້າໄດ້ 28.86 ລ້ານໂດລາສະຫະລັດ ສິນຄ້າຕົ້ນຕໍ່ແມ່ນແຮ່ທາດ, ຜະລິດຕະພັນໄມ້ ແລະ ເຄື່ອງປ່າຂອງດົງ; ມູນຄ່າການນຳເຂົ້າໄດ້ 8.24 ລ້ານໂດລາສະຫະລັດ, ໄດ້ອະນຸມັດໃຫ້ ບໍລິສັດ ພາຍໃນ ແລະ ຕ່າງປະເທດເຂົ້າມາສຳຫຼວດ ແລະ ຂຸດຄົ້ນແຮ່ທາດສົ່ງອອກຂາຍເຊັ່ນ: ແຮ່ທາດອະໂລຫະສຳລັບການກໍ່ສ້າງໄດ້ 30 ພັນກວ່າແມັດກອ້ນ, ລວມມູນຄ່າ 2.41 ຕື້ກີບ, ຂຸດຄົ້ນ – ປຸງແຕ່ງ ແລະ ຈຳໜ່າຍແຮ່ເຫຼັກໄດ້ 1ແສນ 58 ພັນ ກ່ວາໂຕນ, ແຮ່ຫາຍາກໄດ້ 2.281 ກ່ວາໂຕນ, ສຳລັບແຮ່ກົ່ວ, ຊືນ, ສັງກະສີ ແລະ ມັງການຍັງບໍ່ທັນໄດ້ສົ່ງອອກຂາຍ; ມີໄຟຟ້າເຂົ້າເຖິງບັນດາບ້ານຂອງປະຊາຊົນທັງໝົດ 680 ບ້ານ, ກວມ 93,92%, ມີຄົວເຮືອນທີ່ໄດ້ຊົມໃຊ້ໄຟ້າຖາວອນທັງໝົດ 48 ພັນ 91 ຄົວເຮືອນ, ໃນ 05 ເດືອນຜ່ານມາສາມາດເກັບລາຍຮັບໄດ້ 82 ຕື້ກ່ວາກີບ, ປີ 2024ນີ້, ແຂວງຫົວພັນ ໄດ້ຮັບໂຄງການທັງໝົດ 534 ໂຄງການ, ມີມູນຄ່າການລົງທືນທັງໝົດ 249 ຕື້ກ່ວາກີບ; 06 ເດືອນຕົ້ນປີ ມີນັກທ່ອງທ່ຽວເຂົ້າມາທ່ອງທ່ຽວແຂວງຫົວພັນ 24 ພັນ 862 ເທື່ອຄົນ ໃນນີ້ ນັກທ່ອງທ່ຽວພາຍໃນ 10 ພັນ 385 ເທື່ອຄົນ, ນັກທ່ອງທ່ຽວຕ່າງປະເທດ 14 ພັນ 477 ເທື່ອຄົນ ສາມາດສ້າງລາຍຮັບຈາກການທ່ອງທ່ຽວໄດ້ 25 ຕື້ກວ່າກີບ ແລະ ວຽກງານອື່ນໆກໍ່ມີຜົນງານໂດດເດັ່ນເຊັ່ນດຽວກັນ.
ພ້ອມນີ້, ກອງປະຊຸມຍັງໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024. ຈາກນັ້ນ, ບັນດາສະຫາຍຜູ້ແທນກອງປະຊຸມຍັງໄດ້ພ້ອມກັນປະກອບຄຳເຫັນໃສ່ບັນດາເນື້ອໃນເອກະສານຢ່າງກົງໄປກົງມາ, ມີລັກສະນະສ້າງສັນ ແລະ ມີຄວາມຮັບຜິດຊອບສູງ.
