ປະທານ ສຸພານຸວົງ ເປັນໜຶ່ງໃນບັນດາຜູ້ນໍາທີ່ດີເດັ່ນ ຂອງພັກ-ລັດ ຮຸ່ນທໍາອິດ ຂອງການປະຕິວັດ ທີ່ໃຊ້ຊີວິດກິ້ງເກືອກລີເລືອຢູ່ກັບປະຊາຊົນ ແລະ ເປັນສັນຍາລັກແຫ່ງ ການສາມັກຄີປອງດອງ ເປັນຈິດໜຶ່ງໃຈດຽວ ຂອງປະຊາຊົນບັນດາເຜົ່າ ແລະ ເພື່ອນມິດສະຫາຍທີ່ຮັກຫອມສັນຕິພາບໂລກ. ປະທານ ສຸພານຸວົງ ແມ່ນໜຶ່ງໃນບັນດາຜູ້ນໍາທີ່ໄດ້ສ້າງຜົນງານອັນລໍ້າຄ່າ ແລະ ຄຸນງາມຄວາມດີຢ່າງຫຼວງຫຼາຍປະກອບສ່ວນເຂົ້າໃນການນໍາພາລວມໝູ່ ຂອງພັກ ແລະ ແນວລາວຮັກຊາດ ເພື່ອໄຊຊະນະພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍ່ຄື ພາລະກິດປົກປັກຮັກສາ ແລະ ສ້າງສາປະເທດຊາດ ເພື່ອຄວາມຢູ່ດີກິນດີ ຂອງປະຊາຊົນລາວບັນດາເຜົ່າ. ປະທານ ສຸພານຸວົງ ແມ່ນຕົວແທນແຫ່ງລັດທິຮັກຊາດ ຂອງປວງຊົນລາວທັງຊາດ, ເປັນນັກປະຕິວັດທີ່ກ້າແກ່ນ, ເປັນຜູ້ເສຍສະຫຼະອັນສູງສົ່ງ ເພື່ອເອົາຊີວິດເຈືອຈານໃກ້ຊິດຕິດແໜ້ນກັບຊີວິດ ຂອງປະຊາຊົນລາວບັນດາເຜົ່າ, ບັນດາຊັ້ນຄົນ, ດໍາເນີນການຕໍ່ສູ້ເພື່ອຄວາມເປັນເອກະລາດ, ອິດສະຫຼະພາບແຫ່ງຊາດ.