ໃນລະຫວ່າງວັນທີ 29 ພຶດສະພາ ຫາ 5 ມີຖຸນາ 2024 ນີ້, ຮອງເລຂາພັກແຂວງ, ຄະນະປະຈຳພັກແຂວງຫົວພັນ ພ້ອມດ້ວຍທິມງານຂອງໂຄສະນາອົບຮົມແຂວງ ໄດ້ລົງຈັດຕັ້ງເຊື່ອມຊຶມ ມະຕິເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍ ການສ້າງເສດຖະກິດ ເປັນເຈົ້າຕົນເອງ ໃນໄລຍະ ໃໝ່, ມະຕິເລກທີ 05/ລບ, ລົງວັນທີ 21 ພຶດສະພາ 2024 ວ່າດ້ວຍການແບ່ງຄວາມຮັບຜິດຊອບ ໃນການຈັດຕັ້ງປະຕິບັດ ມະຕິວ່າດ້ວຍການສ້າງເສດຖະກິດເສດຖະກິດ ເປັນເຈົ້າຕົນເອງ ໃນໄລຍະໃໝ່ ແລະ ມະຕິທີ 13 ສະໄໝທີ X ຂອງອົງຄະນະພັກແຂວງ ຢູ່ 10 ເມືອງໃນທົ່ວແຂວງຫົວພັນ ເຊີ່ງມີບັນດາສະຫາຍເລຂາພັກເມືອງ, ຄະນະປະຈຳພັກເມືອງ, ຫົວໜ້າຮອງຫົວໜ້າຫ້ອງການ, ຫົວໜ້າຮອງຫົວໜ້າໜ່ວຍງານ, ພະນັກງານລັດຖະກອນ ຕະຫຼອດຮອດເລຂາພັກກຸ່ມບ້ານ ຂອງເມືອງ 10 ເມືອງ ເຂົ້າຮ່ວມຮັບຟັງທັງໝົດ 1,504 ສະຫາຍ, ຍິງ 462 ສະຫາຍ.
ມະຕິເລກທີ 04/ກມສພ ວ່າດ້ວຍ ການສ້າງເສດຖະກິດ ເປັນເຈົ້າຕົນເອງ ໃນໄລຍະໃໝ່, ແມ່ນມີຄວາມສໍາຄັນຈໍາເປັນ ເພາະວ່າການສ້າງເສດຖະກິດຢູ່ໃນປະເທດເຮົາໃນໄລຍະຜ່ານມາແມ່ນບໍ່ທັນຢູ່ໃນທ່ວງທ່າທີ່ຕັ້ງໜ້າ ແລະ ໜັກແໜ້ນເທື່ອ, ຍັງເພິ່ງພາເອື່ອຍອີງການກູ້ຢືມ, ການຊ່ວຍເຫຼືອລ້າຫຼືການຂຸດຄົ້ນຊັບພະຍາກອນເພື່ອສົ່ງອອກວັດຖຸດິບເປັນຕົ້ນຕໍ ເຮັດໃຫ້ຄົນໃນຊາດນິຍົມຊົມໃຊ້ສິນຄ້າຈາກຕ່າງປະເທດ ເກີດມີໄພເງິນເຟີ້ ແລະ ອື່ນໆ ບົນພື້ນຖານດັ່ງກ່າວນັ້ນພວກເຮົາມີຄວາມຈໍາເປັນຕ້ອງໄດ້ສ້າງເສດຖະກິດເອກະລາດ ເປັນເຈົ້າຕົນ ໃນໄລຍະໃໝ່ ເຊິ່ງເປັນເງື່ອນໄຂຮັບປະກັນໃນການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນໃນໄລຍະສັ້ນ ແລະ ຍາວ ກໍ່ຄືການພັດທະນາເສດຖະກິດຕະຫຼາດຕາມທິດສັງຄົມນິຍົມຢູ່ປະເທດເຮົາໃຫ້ເປັນຮູບປະທຳຍິ່ງຂຶ້ນ ເພື່ອຮັບປະກັນໃຫ້ແກ່ການດໍາເນີນ ການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ລັດຖະບານຈິ່ງອອກມະຕິ ເລກທີ 05/ລບ ເພື່ອແບ່ງຄວາມຮັບຜິດຊອບໃນການຈັດຕັ້ງປະຕິບັດໃຫ້ແຕ່ລະຂົງເຂດ ນັບແຕ່ສູນກາງລົງຮອດທ້ອງຖິ່ນ ເພື່ອນຳໄປຈັດຕັ້ງປະຕິບັດໃຫ້ມີຜົນສຳເລັດ ເຮັດໃຫ້ປະເທດຊາດມີຄວາມຈະເລີນກ້າວໜ້າ, ກ້າວໄປຕາມທິດສັງຄົມນິຍົມເທື່ອລະກ້າວ.ການເຊື່ອມຊຶມບັນດາມະຕິໃນຄັ້ງນີ້ ໄດ້ເຮັດໃຫ້ຄະນະພັກແຕ່ລະຂັ້ນ, ສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈ, ຢ່າງເລີກເຊິ່ງ ແລະ ນຳໄປຈັດຕັ້ງປະຕິບັດເຂົ້າໃນໜ້າທີ່ວຽກງານຂອງຕົນ ໃຫ້ມີຜົນນຕໍ່ໜ້າ.
