ໃນຕອນແລງຂອງວັນທີ 29 ພຶດສະພາ 2024 ໂອກາດທີ່ລົງເຜີຍແຜ່ເຊື່ອມຊຶມຜັນຂະຫຍາຍມະຕິ ເລກທີ 04/ກມສພ, ມະຕິ 05/ລບ ແລະ ມະຕິ 13 ສະໄໝທີ X ຂອງອົງຄະນະພັກແຂວງຫົວພັນຢູ່ 3 ເມືອງລຽບມ່າ ທ່ານເພີດ ມາປັນຍາ ຮອງເລຂາພັກແຂວງ ຜູ້ປະຈຳການ ພ້ອມດ້ວຍທີມງານ ແລະ ການນໍາເມືອງແອດ, ເມືອງຊຽງຄໍ້ ພ້ອມດ້ວຍຜູ້ໃຫ້ທຶນ ໄດ້ລົງເບິ່ງຜົນສຳເລັດການກໍ່ສ້າງໂຄງການໂດຍໄດ້ຮັບທຶນຊ່ວຍເຫຼືອລ້າຈາກ ລັດຖະບານສະຫະພັນເຢຍລະມັນ ເຊິ່ງມີຊົນລະປະທານ ແລະ ເສັ້ນທາງໄປບ້ານຫ້ວຍຫຼົ່ມ, ບ້ານຫ້ວຍຢອງ ເມືອງແອດແຂວງຫົວພັນ ມີຄວາມຍາວ 5,6 ກິໂລແມັດ, ມີທາງເບຕົງ 310 ແມັດ, ມູນຄ່າສັນຍາ 875.395,10 ໂດລາສະຫະລັດ ແລະ ເສັ້ນທາງໄປບ້ານນາຕອງ, ບ້ານນາໜອງ, ບ້ານນາເດື່ອ, ບ້ານລູບ ເມືອງຊຽງຄໍ້ ແຂວງຫົວພັນ ມີຄວາມຍາວ 5,6 ກິໂລ ແມັດ, ມີທາງເບຕົງ 70 ກວ່າແມັດ, ມູນຄ່າສັນຍາ 838.872,14 ໂດລາສະຫະລັດ.
ທ່ານ ເພີດ ມາປັນຍາ ຍັງໄດ້ຍ້ອງຍໍຊົມເຊີຍ ແລະ ຂອບໃຈນຳຜູ້ໃຫ້ທຶນຊ່ວຍເຫຼືອລ້າຈາກໂຄງການເຢຍລະມັນ ທີ່ຊ່ວຍເຫຼືອປະຊາຊົນຜູ້ຢູ່ຫ່າງໄກສອກຫຼີກໄດ້ມີເສັ້ນທາງໄປມາຫາສູ່ກັນເພື່ອແລກປ່ຽນສິນຄ້າສະດວກສະບາຍດີຂຶ້ນ, ພ້ອມກັນພັດທະນາຄອບຄົວໃຫ້ມີຢູ່ມີກິນຫຼຸດພົ້ນຄວາມທຸກຍາກເທື່ອລະກ້າວ.
ນະໂອກາດນີ້ກໍ່ຂໍຮຽກຮ້ອງໃຫ້ຄະນະພັກ, ອຳນາດການປົກຄອງ ແລະ ປະຊາຊົນບັນດາເຜົ່າທີ່ນຳໃຊ້ເສັ້ນທາງດັ່ງກ່າວ ຈົ່ງພ້ອມກັນເປັນເຈົ້າການໃນການປົກປັກຮັກສາ, ນຳໃຊ້ໃຫ້ເກີດຜົນປະໂຫຍດສູງສຸດ ແລະ ຍາວນານ.
