ສືບເນື່ອງຈາກງານບຸນວິສາຂະບູຊາ, ສະເຫຼີມສະຫຼອງວັດອົງຕື້ ຄົບຮອບ 11 ປີ, ພະເຈົ້າອົງຕື້ ຄົບຮອບ 459 ປີ ແລະ ວາງສີລາລຶກຫໍທຳມະສະພາ. ໃນຕອນເຊົ້າຂອງວັນທີ 22 ພຶດສະພາ 2024 ກົງກັບ ມື້ຂື້ນ 15 ຄໍ່າ ເດືອນ 6 ພສ 2567, ພາຍຫຼັງພິທີທາງສາສະໜາ (ຕັກບາດ, ຖວາຍສັງກະທານ) ແລ້ວ, ແຂວງຫົວພັນໄດ້ຈັດພິທີເປີດໂຕປື້ມປະຫວັດຄວາມເປັນມາ ຂອງພຣະເຈົ້າອົງຕື້ ເມືອງໂສຍ ແຂວງຫົວພັນ ແລະ ວາງສີລາລຶກໂຄງການກໍ່ສ້າງຫໍທຳມະສະພາ ຂື້ນຢູ່ວັດອົງຕື້ສີບຸນເຮືອງ. ຝ່າຍພຣະສົງນຳໂດຍ ສາທຸໃຫຍ່ ອ່ອນແກ້ວ ສິດທິວົງ ຄະນະປະຈຳສູນກາງ, ຜູ້ຊ່ວຍປະທານສູນກາງ ອພສ; ຍາທ່ານໃຫຍ່ ວັນຄຳ ວົງສາສຸລິນ ຄະນະປະຈຳສູນກາງ, ຫົວໜ້າກຳມາທິການປົກຄອງ ສູນກາງ ອພສ, ພ້ອມດ້ວຍພຣະສົງສູນກາງ, ຕ່າງແຂວງ ແລະ ພຣະສົງພາຍໃນແຂວງຫົວພັນ. ຝ່າຍຄາລະວາດນຳໂດຍທ່ານ ພັນຄຳ ວິພາວັນ ອາດີດນາຍົກລັດຖະມົນຕີ ແຫ່ງ ສປປ ລາວ, ທ່ານ ປອ ຄຳແພງ ໄຊສົມແພງ ເຈົ້າແຂວງຫົວພັນ, ມີອາດີດການນຳແຂວງ, ການນຳແຂວງ, ການນຳເມືອງ, ພະແນກການ, ກົມກອງ, ຜູ້ຊົງຄຸນວຸດທິ ແລະ ຊາວສາສະນິກະຊົນບັນດາເຜົ່າທັງພາຍໃນ-ຕ່າງແຂວງເຂົ້າຮ່ວມ.
ປື້ມປະຫວັດຄວາມເປັນມາ ຂອງພຣະເຈົ້າອົງຕື້ ເມືອງໂສຍ ແຂວງຫົວພັນ ໄດ້ຮັບການຊີ້ນຳໂດຍ ທ່ານ ປອ ພັນຄຳ ວິພາວັນ ອາດີດນາຍົກລັດຖະມົນຕີ; ຮິບໂຮມ-ຄົ້ນຄວ້າ ແລະ ຂຽນໂດຍ ທ່ານ ຄຳພັນ ພິມມະວົງ; ກວດແກ້ ແລະ ຮຽບຮຽງ ໂດຍ ທ່ານ ສົມພັນ ແພງຄຳມີ, ທ່ານ ປອ ຄຳພອນ ນຸນນະດີ ແລະ ທ່ານ ປອ ຄຳໝັ້ນ ສີພັນໄຊ; ອຸປະຖຳການພິມໂດຍ ທ່ານ ນາງ ສີຈັນ ວິພາວັນ. ເຊິ່ງເນື້ອໃນປະກອບດ້ວຍ 19 ພາກ ທີ່ກ່າວເຖິງ ປະຫວັດຄວາມເປັນມາຂອງພຣະເຈົ້າອົງຕື້ ເລີ່ມຈາກສະພາບລວມກ່ອນຈະມີການຫຼໍ່ພຣະ, ບັນດາປັດໃຈ ແລະ ສາເຫດທີ່ພາໃຫ້ມີການຫຼໍ່ພຣະ, ໄລຍະຫ້າງຫາກະກຽມ, ການດຳເນີນການສ້າງຫຼໍ່, ການສະເຫຼີມສະຫຼອງສົມໂພດ. ລວມເຖິງເນື້ອໃນທີ່ອະທິບາຍເຖິງລັກສະນະ, ຈຸດພິເສດ, ຂະໜາດສັດສ່ວນຂອງອົງພຣະ ແລະ ໜັງສືທີ່ສະຫຼັກໄວ້ໃນແທ່ນນັ່ງ. ພ້ອມນັ້ນ, ເນື້ອໃນຂອງປື້ມຍັງໄດ້ເລົ່າເຖິງປະຫວັດຂອງພຣະອົງຕື້ນັບແຕ່ມື້ສ້າງຫຼໍ່ເຖິງປັດຈຸບັນ.
ໂອກາດນີ້, ທ່ານ ປອ ພັນຄຳ ວິພາວັນ ອາດີດນາຍົກລັດຖະມົນຕີ ໄດ້ຕີລາຄາສູງຕໍ່ ທ່ານ ຄຳພັນ ພິມມະວົງ ທີ່ມີຄວາມອຸດສາຫະພະຍາຍາມຮິບໂຮມ, ຄົ້ນຄວ້າ ແລະ ຮຽບຮຽງຄືນປະຫວັດຄວາມເປັນມາ ຂອງພຣະເຈົ້າອົງຕື້. ເຊິ່ງປື້ມເຫຼັ້ມນີ້ເປັນການຢັ້ງຢືນຕື່ມກ່ຽວກັບປະຫວັດສາດທາງດ້ານວັດທະນະທຳຂອງແຂວງຫົວພັນ ທັງເປັນການປະກອບສ່ວນເຂົ້າໃນການປົກປັກຮັກສາມໍລະດົກທີ່ມີຄຸນຄ່າ ຂອງແຂວງຫົວພັນ ກໍຄືຂອງຊາດລາວເຮົາໄວ້.
ຫຼັງຈາກສຳເລັດພິທີເປີດໂຕປື້ມປະຫວັດຄວາມເປັນມາ ຂອງພຣະເຈົ້າອົງຕື້ ເມືອງໂສຍ ແຂວງຫົວພັນ ແລ້ວ, ຍັງໄດ້ສືບຕໍ່ຈັດພິທີວາງສີລາລຶກໂຄງການກໍ່ສ້າງຫໍທຳມະສະພາຂອງແຂວງ ຂື້ນຢູ່ວັດອົງຕື້ສີບຸນເຮືອງ. ເຊິ່ງ ພຣະອາຈານ ລຳພັນ ບຸນມີໄຊ ກຳມະການສູນກາງ, ປະທານ ອພສ ແຂວງຫົວພັນ ໄດ້ລາຍງານຕໍ່ພິທີ ໃຫ້ຮູ້ວ່າ: ຫໍທຳມະສະພາແຂວງຫົວພັນຈະກໍ່ສ້າງເປັນອາຄານກໍ່ 2 ຊັ້ນ, ມີຂະໜາດລວງກວ້າງ 24 ແມັດ, ຍາວ 30 ແມັດ ສ້າງເປັນຫ້ອງປະຊຸມໃຫຍ່ ເພື່ອເປັນທີ່ຕັ້ງສຳນັກງານອົງການພຸດທະສາສະໜາສຳພັນລາວ ແຂວງຫົວພັນ, ຫໍມູນເຊື້ອພຸດທະປະຫວັດ ແລະ ເພື່ອເປັນຕົວແທນຂອງສີລະປະວັດທະນະທຳ, ເປັນຕົວແທນຂອງສະຖາປັດຕະຍະກຳ ຂອງພຸດທະສາສະໜາ ໃນແຂວງຫົວພັນ. ສ້າງໃຫ້ມີຮູບຊົງ, ປະດັບລວດລາຍຄ້າຍຄືກັບຮູບພັດທະສີມາ ວັດສີບຸນເຮືອງ ເມືອງໂສຍ ແລະ ຫໍພະເກົ່າແກ່ ວັດສີສຸມັງຄະລາຣາມ ບ້ານເຕື້ອມ. ສ່ວນງົບປະມານ ແລະ ຄາດໝາຍສູ້ຊົນທີ່ຈະສຳເລັດແມ່ນຍັງບໍ່ສາມາດລາຍງານໄດ້.
