ຕອນເຊົ້າຂອງວັນທີ 24 ພຶດສະພາ 2024 ແຂວງຫົວພັນ ໄດ້ຈັດຕັ້ງປາຖະກະຖາວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງຄົບຮອບ 65 ປີ, ວັນວິລະກໍາໂຕນຄຸກຢ່າງມະຫັດສະຈັນຂອງຜູ້ນໍາພັກ ແລະ ແນວລາວສ້າງຊາດ ຄົບຮອບ 64 ປີ ທີ່ ຫໍວັດທະນະທໍາແຂວງຫົວພັນ ເປັນເວລາ 1 ຕອນ, ໃຫ້ກຽດເຂົ້າຮ່ວມ ແລະ ປາຖະກະຖາຂອງ ທ່ານ ວົງເພັດ ກຽນສິງຮັກ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ມີບັນດາ ຫົວຫນ້າພະແນກການ, ອົງການທຽບເທົ່າ, ກອງບັນຊາການທະຫານແຂວງ, ກອງບັນການຕຳຫຼວດແຂວງ, ອົງການຈັດຕັ້ງມະຫາຊົນ, ລັດວິສາຫະກິດໄຟຟ້າ, ລັດວິສາຫະກິດນໍ້ ປະປາ, ບັນດາສາຂາທະນາຄານ, ໂຮງຮຽນ, ໂຮງຫມໍພ້ອມດ້ວຍພະນັກງານ ອ້ອມຂ້າງແຂວງເຂົ້າ ຮ່ວມຢ່າງຫຼວງຫຼາຍ.
ໃນພິທີ ທ່ານ ວົງເພັດ ກຽນສິງຮັກ ຄະນະປະຈໍາພັກແຂວງ, ປະທານອົງການແນວລາວສ້າງ ຊາດ, ຜູ້ຊີ້ນໍາອົງການຈັດຕັ້ງມະຫາຊົນຂັ້ນແຂວງ ໄດ້ໃຫ້ກຽດປາຖະກະຖາ ສອງວັນປະຫວັດສາດ ດັ່ງກ່າວໂດຍຍົກໃຫ້ເຫັນວ່າການເຂົ້າວົງປິດລ້ວມຂອງກອງພັນທີ 2 ສະແດງໃຫ້ເຫັນວ່າການນໍາພາ ຂອງພັກຖືກຕ້ອງສະຫລາດສ່ອງໃສ, ຂະບວນການຕໍ່ສູ້ ຂອງພວກເຮົາແມ່ນເປັນທໍາ. ສະນັ້ນ ການ ຜ່າວົງປິດລ້ອມຂອງກອງພັນທີ 2 ໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ: ” ສິນທໍາຍາມໃດ ກໍ່ຊະນະ ອະທໍາ ” ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງ ຂອງກໍາລັງປະກອບ ອາວຸດ ເຮົາທີ່ຢູ່ໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາສາມາດຍາດເອົາໄຊຊະນະໃນໄລຍະຕໍ່ມາ, ການປາຖະກະຖາ ຄັ້ງນີ້ຍັງຍົກໃຫ້ເຫັນວິລະ ກໍາໂຕນຄຸກຢ່າງພະຫັດສະຈັນຂອງບັນດາທ່ານຜູ້ນໍາຂອງພັກ ແລະ ແນວລາວສ້າງຊາດ, ວັນເວລາໄດ້ ຜ່ານໄປເກືອບ 300 ວັນຜູ້ນໍາເຮົາທີ່ຢູ່ໃນຄຸກໄດ້ຂົນຂວາຍພວກສາລະວັດທະຫານທີ່ເຂົ້າມາ ເວນຍາມຄຸກໄດ້ຮັບຫມາກຜົນເປັນຢ່າງດີ. ວັນທີ 24 ພຶດສະພາ ປີ 1960 ການໂຕນຄຸກຂອງບັນດາ ທ່ານຜູ້ນໍາແມ່ນສໍາເລັດ ແລະ ກັບຄືນສູ້ຖານທີ່ຫມັ້ນຂອງການປະຕິວັດຢ່າງປອດໄຟ.
ການປາຖະກະຖາຄັ້ງນີ້ ໄດ້ເຮັດໃຫ້ພະນັກງານ, ສະມາຊິກພັກ, ທະຫານ, ຕໍາຫຼວດ ແລະ ປະຊາຊົນຮັບຮູ້, ເຂົ້າໃຈເຖີງເນື້ອໃນວັນສໍາຄັນດັ່ງກ່າວ ເພື່ອເປັນບົດຮຽນ ແລະ ນໍາໄປຫມູນໃຊ້ເຂົາ ໃນການປະຕິບັດຫນ້າທີ່ວຽກງານທີ່ຕົນຮັບຜິດຊອບໃຫ້ມີຜົນສໍາເລັດຕາມຄາດຫມາຍທີ່ວາງໄວ້.
