ແຂວງຫົວພັນສະເຫຼີມສະຫຼອງວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ

   ຕອນເຊົ້າ ວັນທີ 22 ມີນາ 2025, ຢູ່ທີສະໂມສອນໃຫຍ່ຂອງແຂວງໄດ້ຈັດຕັ້ງພິທີສະເຫຼີມສະຫຼອງວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ (22 ມີນາ 1955 – 22 ມີນາ 2025) ຂື້ນຢູ່ສະໂມສອນໃຫຍ່ຂອງແຂວງ ພາຍໃຕ້ການເປັນປະທານ ຂອງ ສະຫາຍ ຄຳແພງ ໄຊສົມແພງ ກຳມະການສູນກາງ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ. ມີບັນດາສະຫາຍຄະນະບໍລິຫານງານພັກແຂວງ, ຫົວໜ້າ-ຮອງຫົວໜ້າພະແນກການ, ເລຂາ-ຮອງເລຂາຄະນະບໍລິຫານງານພັກເມືອງ-ເຈົ້າເມືອງ 10 ເມືອງທົ່ວແຂວງ, ອາດີດການນຳພັກ-ລັດຂັ້ນແຂວງ, ຂັ້ນເມືອງ ຕະຫຼອດຮອດອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ອົງການທຽບເທົ່າ, ສະມາຊິກພັກຈາກບັນດາພະແນກການ, ກົມກອງ, ລັດວິສາຫະກິດ, ຄູອາຈານ, ນັກຮຽນ, ນັກສຶກສາ ແລະ ປັນຍາຊົນ ອ້ອມຂ້າງເທດສະບານແຂວງເຂົ້າຮ່ວມຢ່າງຫຼວງຫຼາຍ

     ໃນພິທີ, ຜູ້ເຂົ້າຮ່ວມໄດ້ຮັບຟັງການປາຖະກະຖາລະນຶກວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ຜ່ານວີດີໂອອອນລາຍ ໂດຍແມ່ນ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ. ເຊິ່ງທ່ານໄດ້ຍົກໃຫ້ເຫັນການກຳເນີດ ແລະ ເຕີບໃຫຍ່ຂະຫຍາຍຕົວ ຂອງພັກ ຜູ້ນຳພາທຸກການປະຕິວັດລາວ ໃນໄລຍະຕໍ່ສູ້ກູ້ຊາດ ກໍຄືປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່.

   ພັກປະຊາຊົນປະຕິວັດລາວ ກຳເນີດມາຈາກ ພັກກອມມູນິດອິນດູຈີນ. ເຊິ່ງໃນວັນທີ 3 ກຸມພາ 1930 ພັກກອມມູນິດອິນ¬ດູຈີນ ຈິ່ງໄດ້ຮັບການສ້າງ¬ຕັ້ງຂຶ້ນ ພາຍໃຕ້ການຊີ້ນຳໂດຍກົງ, ຮອບ¬ດ້ານຂອງປະ¬ທານໂຮ່ຈິມິນ. ພາຍໃຕ້ການນຳ¬ພາຂອງພັກກອມມູນິດອິນ¬ດູ¬ຈີນ, ການປະ¬ຕິ¬ວັດ ຂອງປະ¬ເທດເຮົາໄດ້ເຕີບໃຫຍ່ຂຶ້ນເລື້ອຍໆ. ໃນວັນທີ 6-7 ກັນຍາ 1934 ກອງປະຊຸມໃຫຍ່ ພັກກອມມູນິດອີນດູຈີນ ຈິ່ງໄດ້ໄຂຂຶ້ນຢູ່ດອນຊິງຊູ້ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ເລ່ແມັງຈິງ. ກອງປະຊຸມໃຫຍ່ ໄດ້ຕົກລົງສ້າງຕັ້ງຄະນະບໍລິຫານງານພັກກອມມູນິດອິນດູຈີນ ປະຈຳພັກແຄວ້ນລາວ ຊຸດທຳອິດ ໃສ່ຊື່ວ່າ: “ຄະນະພັກແຄວ້ນລາວ” ຂຶ້ນ ເພື່ອນຳພາ-ຊີ້ນຳການປະຕິວັດໃນລາວ. ພາຍໃຕ້ການນຳພາ ຂອງພັກກອມມູນິດອິນດູຈີນ ກໍຄືຄະນະພັກແຄວ້ນລາວ, ພັກໄດ້ຍູ້ແຮງວຽກງານປຸກລະດົມຂົນຂວາຍມະຫາຊົນ ຢູ່ເຂດຊົນນະບົດ ແລະ ບໍລິເວນຊົນເຜົ່າ, ຖືຊາວໄຮ່ນາ ເປັນກຳລັງພື້ນຖານ ຂອງການປະຕິວັດ ເຮັດໃຫ້ຂະບວນການຕໍ່ສູ້ລະເບີດຂຶ້ນແຕ່ຕ່ຳຫາສູງໃນທົ່ວປະເທດ ດ້ວຍບັນດາຮູບການທີ່ເໝາະສົມ ເປັນສາເຫດພາໃຫ້ມີການຢຶດອຳນາດ 23 ສິງຫາ 1945, ປະກາດເອກະລາດ ວັນທີ 12 ຕຸລາ 1945, ສ້າງຕັ້ງກອງທັບປະຊາຊົນລາວ ໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫຼະຂຶ້ນ ໃນວັນທີ 13 ສິງຫາ 1950 ຊຶ່ງໄດ້ກາຍເປັນຄັນທຸງເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດ ໄດ້ຢ່າງກວ້າງຂວາງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ. ມາຮອດວັນທີ 22 ມີນາ 1955 ກອງປະຊຸມໃຫຍ່ສ້າງຕັ້ງພັກປະຊາຊົນ ປະຕິວັດລາວ ຈິ່ງໄດ້ໄຂຂຶ້ນ ຢູ່ທີ່ບ້ານນາແມວ, ເມືອງວຽງໄຊ, ແຂວງຫົວພັນ ໂດຍເອີ້ນຊື່ວ່າ: “ພັກປະຊາຊົນລາວ” ປະທານ ໄກສອນ ພົມວິຫານ ໄດ້ຖືກເລືອກຕັ້ງເປັນເລຂາຄະນະຊີ້ນຳສູນກາງ (ເລຂາທິການໃຫຍ່) ພ້ອມທັງໄດ້ວາງແຜນດຳເນີນງານຂອງພັກ 12 ຂໍ້ ຖືກຮັບຮອງໃນກອງປະຊຸມໃຫຍ່ ຄັ້ງທີ I ຂອງພັກ ໃນວັນທີ 22 ມີນາ 1955 ເປັນໂຄງການເມືອງສະບັບທໍາອິດ ເພື່ອແນໃສ່ເຮັດລ້ອນໜ້າທີ່ຂອງພັກໃນໄລຍະໃໝ່, ກາຍເປັນແນວທາງກູ້ຊາດ ຕ້ານຈັກກະພັດຜູ້ຮຸກຮານ, ພັກໄດ້ຊັກຈູງປະຊາຊົນເຮົາ ດໍາເນີນການຕໍ່ສູ້ຍາດເອົາໄຊຊະນະນັບມື້ນັບໃຫຍ່ຫຼວງ, ສາມາດເຕົົ້າໂຮມຄວາມສາມັກຄີທົ່ວປວງຊົນ ສູ້ຊົນເຮັດສຳເລັດພາລະກິດປົດປ່ອຍຊາດ. ເຮັດໃຫ້ປະເທດລາວເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.

    ສະເພາະຢູ່ແຂວງຫົວພັນ, ພາຍໃຕ້ການນຳພາ – ຊີ້ນຳ ຂອງຄະນະບໍລິຫານງານພັກແຂວງໃນແຕ່ລະສະໄໝ, ຄະນະພັກ, ຄະນະນຳແຕ່ລະຂັ້ນກໍໄດ້ເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນທັງໝົດ ເປັນຕົ້ນແມ່ນວຽກງານປັບປຸງປົວແປງຂະຫຍາຍພັກ ເຊິ່ງເຮັດໃຫ້ພັກມີການເຕີບໃຫຍ່ຂະຫຍາຍຕົວເປັນກ້າວໆ. ມາເຖິງປີ 2024 ທົ່ວແຂວງມີ 10 ອົງຄະນະພັກເມືອງ, ມີ 2 ອົງຄະນະພັກກົມກອງ, ມີຮາກຖານຊີ້ນໍາຫຼາຍບ້ານຈໍານວນ 93 ຮາກຖານ, ມີຮາກຖານພັກທັງໝົດ 158 ຮາກຖານ, ມີໜ່ວຍພັກທັງໝົດ 1.221 ໜ່ວຍພັກ, ຮຽນສະໜັບສະໜູນພັກຈໍານວນ 1.017 ສະຫາຍ, ຍິງ 289 ສະຫາຍ, ຮຽນກົດລະບຽບພັກໄດ້ 860 ສະຫາຍ, ຍິງ 250 ສະຫາຍ. ປັດຈຸບັນ, ທົ່ວແຂວງຫົວພັນມີສະມາຊິກພັກທັງໝົດ 21.653 ສະຫາຍ ຍິງ 5.259 ສະຫາຍ, ຕີລາຄາແບ່ງປະເພດສະມາຊິກພັກໄດ້ຄື: ສະມາຊິກພັກປະເພດແຂງມີ 16.462 ສະຫາຍ; ຍິງ 4.210 ສະຫາຍ, ສະມາຊິກພັກປະເພດກາງມີ 1.752 ສະຫາຍ; ຍິງ 321 ສະຫາຍ, ສະມາຊິກພັກບໍ່ໄດ້ຈັດປະເພດມີ 3.172 ສະຫາຍ; ຍິງ 645 ສະຫາຍ, ໄດ້ຮັບການປະເມີນໜ່ວຍພັກທັງໝົດມີ 1.096 ໜ່ວຍ ໃນນີ້ໜ່ວຍພັກປອດໃສ, ເຂັ້ມແຂງ, ໜັກແໜ້ນມີ 891 ໜ່ວຍ, ໜ່ວຍພັກປະເພດກາງມີ 188 ໜ່ວຍ, ໜ່ວຍພັກອ່ອນ 11 ໜ່ວຍ, ໜ່ວຍພັກບໍ່ໄດ້ຈັດປະເພດມີ 6 ໜ່ວຍ, ໜ່ວຍພັກບໍ່ໄດ້ຮັບການປະເມີນມີ 124 ໜ່ວຍ.

ໃນໂອກາດສະເຫຼີມສະຫຼອງວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ ຄັ້ງນີ້, ຍັງໄດ້ຈັດພິທີຮັບປະດັບການຍ້ອງຍໍ ຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນປະຕິວັດລາວ ໃຫ້ສະມາຊິກພັກ ແຂວງຫົວພັນ ທີ່ມີຄຸນງາມຄວາມດີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ ຢ່າງສົມກຽດຕື່ມອີກ. ໂດຍມີບຸກຄົນໄດ້ຮັບການປະດັບຍ້ອງຍໍ ຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນປະຕິວັດລາວ ທັງໝົດ 1.962 ສະຫາຍ, ຍິງ 219 ສະຫາຍ.