ວັນທີ 27 ຕຸລາ 2025, ແຂວງຫົວພັນ ໄດ້ຈັດພິທີເປີດການກໍ່ສ້າງສະຖານິວີທະຍຸກະຈ່າຍສຽງ ແລະ ໂທລະພາບແຂວງຂື້ນ ຢູ່ສະຖານທີ່ ພະແນກ ຖວທ ຫຼັງເກົ່າ. ໂດຍມີທ່ານ ພຸດພັນ ແກ້ວວົງໄຊ ເລຂາພັກແຂວງ ຮອງເຈົ້າແຂວງຫົວພັນ, ທ່ານ ເລ ກວຽນ ຄະນະປະຈໍາ ຄະນະພັກ ຮອງອຳນວຍການໃຫຍ່ສະຖານີໂທລະພາບຫວຽດນາມ, ທ່ານ ສາຄອນ ພົມມະລາດ ຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວິທະຍຸກະຈ່າຍສຽງແຫ່ງຊາດລາວ, ມີພາກສ່ວນທີ່ກ່ຽວຂ້ອງລາວ-ຫວຽດນາມເຂົ້າຮ່ວມ.

ໂຄງການກໍ່ສ້າງວິທະຍຸກະຈ່າຍສຽງ ແລະ ໂທລະພາບແຂວງຫົວພັນມີມູນຄ່າການກໍ່ສ້າງທັງໝົດ 146 ຕື້ກວ່າດົງ, ໃນນັ້ນທຶນຊ່ວຍເຫຼືອລ້າຈາກລັດຖະບານຫວຽດນາມໃຫ້ແກ່ລັດຖະບານລາວຈໍານວນ 138 ຕື້ກວ່າດົງ ແລະ ທຶນສົມທົບຂອງລັດຖະບານລາວ 7,8 ຕື້ດົງ. ເຊິ່ງໂຄງການນີ້ຈະໄດ້ກໍ່ສ້າງຕາມລະບົບຕ່ອງໂສ້ເຕັກໂນໂລຢີທີ່ທັນສະໄໝຄື: ລະບົບເຄື່ອງສົ່ງໂທລະພາບດີຈີຕັອນ ມີມາດຖານການສົ່ງສັນຍານໂທລະພາບພາກພື້ນດີນແບບດີຈີຕັອນ ໃຊ້ສໍາລັບການສົ່ງສັນຍານໂທລະພາບ ແລະ ສື່ມີເດຍຜ່ານຄື້ນວິທະຍຸ ແລະ ມາດຕະຖານການສົ່ງສັນຍານດີຈີຕ໋ອນ ພາກພື້ນດີນລຸ້ນທີ 2, ໂດຍປະກອບມີ ອາຄານຕິດຕັ້ງເຄື່ອງສົ່ງສັນຍານ, ເສົາອັງແຕນສູງ 75 ແມັດ, ມີອາຄານເຮັດວຽກ, ຫ້ອງສະຕູດີໂອເພື່ອຜະລິດລາຍການ, ບັນດາຫ້ອງອັດພາສາເຜົ່າ. ນອກນັ້ນຍັງໄດ້ປະກອບລະບົບໄຟຟ້າ, ລະບົບປ້ອງກັນຟ້າຜ່າທີ່ທັນສະໄໝ, ລະບົບປ້ອງກັນອັກຄີໄຟ ແລະ ອື່ນໆ. ຄາດວ່າທ້າຍປີ 2026 ແມ່ນຈະໃຫ້ສໍາເລັດ.

    ໂຄງການກໍ່ສ້າງດັ່ງກ່າວເປັນຂອງຂວັນອັນລໍ້າຄ່າ ແລະ ມີຄວາມໝາຍສຳຄັນເລິກເຊິ່ງຈາກລັດຖະບານຫວຽດນາມມອບໃຫ້ແກ່ລັດຖະບານລາວ ກໍ່ຄືແຂວງຫົວພັນ, ແມ່ນໂຄງການໜື່ງທີ່ນອນໃນແຜນການຮ່ວມມືລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ, ພາຍຫຼັງໂຄງການດັ່ງກ່າວໄດ້ຮັບການກໍ່ສ້າງສໍາເລັດ ແລະ ເປີດການນໍາໃຊ້ ຈະຊ່ວຍຕອບສະໜອງຕາມຄວາມຮຽກຮ້ອງຕ້ອງການໃນການພັດທະນາພື້ນຖານໂຄງລ່າງສື່ມວນຊົນໃຫ້ມີຄຸນນະພາບ, ເປັນລະບົບທັນສະໄໝ, ວ່ອງໄວ, ຊັດເຈນ ແລະ ທັນການ, ຈະກາຍເປັນກະບອກສຽງອັນສໍາຄັນໃນການໂຄສະນາແນວທາງ, ນະໂຍບາຍຂອງພັກ-ລັດ ເພື່ອໃຫ້ສັງຄົມໄດ້ຮັບຮູ້ຢ່າງກວ້າງຂວາງ, ມີຫຼາກຫຼາຍເນື້ອໃນທີ່ຄົບຖ້ວນ, ເປັນແຫຼ່ງສະໜອງຂໍ້ມູນຂ່າວສານ ແລະ ໃຫ້ສາລະຄວາມຮູ້ຢ່າງຮອບດ້ານ. ເປັນການປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາແຂວງຫົວພັນໃນໄລຍະໃໝ່. ໂຄງການກໍ່ສ້າງສະຖານີວິທະຍຸກະຈ່າຍສຽງ ແລະ ໂທລະພາບແຂວງຫົວພັນຍັງຈະກາຍເປັນສັນຍາລັກ ແຫ່ງຄວາມສາມັກຄີ ແລະ ເປັນການເສີມຂະຫຍາຍສາຍພົວພັນມິດຕະພາບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດຖະບານ ແລະ ປະຊາຊົນສອງຊາດລາວ-ຫວຽດນາມໃຫ້ນັບມື້ແຕກດອກອອກຜົນ ສວຍສົດງົດງາມຍິ່ງໆຂື້ນ.