ກອງປະຊຸມໃຫຍ່ຄັ້ງທີ XI ອົງຄະນະພັກເມືອງຮ້ຽມ ແຂວງຫົວພັນ ໄດ້ອັດລົງດ້ວຍຜົນສຳເລັດ ພາຍຫຼັງທີ່ດໍາເນີນມາເປັນເວລາ 1 ວັນເຄິ່ງ. ພາຍໃຕ້ການເປັນປະທານ ຂອງ ສະຫາຍ ວຽງສອນ ພົມມະສອນ ເລຂາພັກເມືອງ, ເຈົ້າເມືອງໆຮ້ຽມ. ເປັນກຽດເຂົ້າຮ່ວມຂອງ ສະຫາຍ ປອ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ. ມີຜູ້ແທນສົມບູນເຂົ້າຮ່ວມທັງໝົດ 105 ສະຫາຍ, ຍິງ 26 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດ 1.223 ສະຫາຍ, ມີແຂກຖືກເຊີນ 55 ສະຫາຍ, ຍິງ 8 ສະຫາຍ, ບັນດາສະຫາຍເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄ້ວາປະກອບຄຳຄິດຄຳເຫັນຕໍ່ກອງປະຊຸມ ກົງໄປ ກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ວາງໄວ້.

       ກອງປະຊຸມໃຫ່ຍຄັ້ງທີ XI ອົງຄະນະພັກເມືອງໄດ້ລົງປະຊາມະຕິເປັນເອກະສັນກັນ ຮັບຮອງເອົາບັນດາເນື້ອໃນທີ່ສຳຄັນ ຄື: ຮ່າງບົດລາຍງານການເມືອງທັງສອງພາກ, ແຜນພັດທະນາເສດຖະກິດ – ສັງຄົມ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກສະໄໝທີ x, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການ ນໍາພາ-ຊີ້ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນກັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2024 ຮອດປີ 2029. ເຊິ່ງຮັບປະກັນໃຫ້ ເມືອງຮ້ຽມ ມີສະຖຽນລະພາບທາງການເມືອງ, ສັງຄົມມີຄວາມເປັນລະບຽບຮ້ອຍຢ່າງໜັກແໜ້ນເຮັດໃຫ້ວຽກງານປ້ອງກັນຊາດ – ປ້ອງກັນຄວາມສະຫງົບ ກາຍເປັນຂອງທົ່ວປວງຊົນຮອບດ້ານ; ຮັບປະກັນ ແລະ ສືບຕໍ່ພັດທະນາເສດຖະກິດຂອງເມືອງໃຫ້ຂະຫຍາຍຕົວຕໍ່ເນື່ອງໃນລະດັບ 5.5% ຕໍ່ປີ, ລວມຍອດຜະລິດຕະພັນ(GDP) ບັນລຸໃຫ້ໄດ້ 537 ຕື້ກີບ, ສະເລ່ຍແຕ່ລະປີເທົ່າກັບ 107 ຕື້ກີບ, ລາຍຮັບສະເລ່ຍຕໍ່ຫົວຄົນໃຫ້ໄດ້ 8,8 ລ້ານກີບຕໍ່ຄົນຕໍ່ປີ,ໂຄງປະກອບທາງດ້ານເສດຖະກິດໃຫ້ມີການຫັນປ່ຽນຄື: ຂະແໜງກະສິກຳ – ປ່າໄມ້ ໃຫ້ກວມເອົາ 395 ຕື້ກີບ ເທົ້າກັບ 73.6% ຂອງ (GDP), ຂະແໜງ ອຸດສາຫະກຳ ໃຫ້ກວມເອົາ 67 ຕື້ກີບ ເທົ້າກັບ 12.5% ຂອງ (GDP) ແລະ ຂະແໜງການບໍລິການໃຫ້ກວມເອົາ 74.46 ຕື້ກີບ ເທົ້າກັບ 13.88 % ຂອງ (GDP). ສືບຕໍ່ຫັນລົງຮາກຖານການເມືອງ ພັດທະນາຊົນນະບົດ ແລະ ລືບລ້າງຄວາມທຸກຍາກໃຫ້ແກ່ປະຊາຊົນ, ສ້າງບ້ານພັດທະນາໃຫ້ໄດ້ຕື່ມ 5 ບ້ານ, ອັດຕາບ້ານທຸກຍາກໃຫ້ຍັງເຫຼືອ 18 ບ້ານ, ອັດຕາຄົວເຮືອນທຸກຍາກໃຫ້ຍັງເຫຼືອ 33.49 % ຂອງຄົວເຮືອນທັງໝົດ, ຕັ້ງໜ້າພັດທະນາຊັບພະຍາກອນມະນຸດ ປັບປຸງ ແລະ ປະຕິບັດບັນດາແຜນງານ, ຄາດໝາຍສູ້ຊົນ ໃນຂົງເຂດວັດທະນະທຳ-ສັງຄົມ ເພື່ອບັນລຸຄາດໝາຍສະຫັດສະຫວັດຂອງການພັດທະນາແບບຍືນຍົງ ເດັກໃນເກນອາຍຸ 5 ປີ ໄດ້ເຂົ້າຮຽນໃຫ້ໄດ້ 98%, ຊັ້ນປະຖົມໃຫ້ບັນລຸ 100%, ມັດຖະຍົມໃຫ້ບັນລຸ 97%, ມັດທະຍົມປາຍໃຫ້ໄດ້ 62%, ສືບຕໍ່ປົກປັກຮັກສານາມມະຍົດບ້ານສາທາລະນະສຸກແບບຢ່າງ, ເມືອງຢຸດຕິການຖ່າຍຊະຊາຍ ແລະ ເມືອງຊຸມຊົນເປັນເຈົ້າການດ້ານສຸຂະອະນາໄມໃຫ້ຍືນຍົງ, ຍົກສູງອັດຕາການຊົມໃຊ້ນໍ້າສະອາດ ໃຫ້ໄດ້ຫຼາຍກ່ວາ 92% ຂຶ້ນໄປ ຂອງປະຊາກອນທັງໝົດ, ອັດຕາການໃຊ້ວິດຖ້າຍໃຫ້ໄດ້ຫຼາຍກ່ວາ 99 % ຂຶ້ນໄປຂອງຈໍານວນຄົວເຮືອນທັງໝົດ ອັດຕາການຕາຍຂອງແມ່ ແລະ ເດັກ ໃຫ້ຫຼຸດລົງ, ຍົກສູງອັດຕາຢອດຢາ ແລະ ສັກຢາກັນພະຍາດໃຫ້ກຸ່ມເປົ້າໝາຍຕ່າງໆ. ປັບປຸງກົງຈັກລັດ, ອຳນາດການປົກຄອງຂັ້ນຕ່າງໆ ໃຫ້ມີຄວາມສາມາດບໍລິຫານ ແລະ ການຄຸ້ມຄອງລັດຕາມກົດໝາຍ, ຕິດຕາມ, ກວດກາ ຕໍ່ອົງການບໍລິຫານ, ຕຸລາການເອົາໃຈໃສ່ໂຄສະນາ ເຜີຍແຜ່ກົດໝາຍໃຫ້ກ້ວາງຂວາງ, ລົງເຖິງປະຊາຊົນ, ສ້າງເງື່ອນໄຂໃຫ້ປະຊາຊົນໄດ້ປະຕິບັດສິດຂອງ ເຂົາເຈົ້າຢ່າງເຕັມສ່ວນ. ຍົກສູງຄວາມສາມາດນຳພາຂອງພັກ, ສ້າງໜ່ວຍປອດໃສ, ເຂັ້ມແຂງ, ໜັກແໜ້ນ ກວມເອົາ 86.9%, ບໍາລຸງສ້າງພະນັກງານສືບທອດ, ທົດແທນຮັບປະກັນໃຫ້ ມີຄຸນທາດການເມືອງ, ມີຄຸນສົມບັດສິນທໍາປະຕິວັດ ແລະ ມີອຸດົມການສັງຄົມນິຍົມເຮັດໃຫ້ທຸກລະບົບການຈັດຕັ້ງໃນລະບົບການເມືອງ ມີຄວາມເຂັ້ມແຂງໜັກແໜ້ນ, ເພີ່ມຄວາມສັກສິດໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ເຮັດໃຫ້ອົງການແນວລາວສ້າງຊາດ, ສະຫະ ພັນນັກຮົບເກົ່າ ແລະ ອົງການຈັດຕັ້ງມະຫາຊົນມີຄວາມເຂັ້ມແຂງ ເຄື່ອນໄຫວຕາມພາລະບົດບາດສິດໜ້າທີ່ຢ່າງມີປະສິດທິຜົນ. ສືບຕໍ່ປະຕິບັດແນວທາງການຕ່າງປະເທດຂອງພັກ ແລະ ລັດຖະບານ ເສີມຂະຫຍາຍສາຍພົວພັນແບບພິເສດກັບປະເທດ ສສ ຫວຽດນາມ ແລະ ປະເທດອື່ນໆດ້ວຍຫຼາຍຮູບແບບ ເພື່ອຍາດແຍ່ງເອົາການຊ່ວຍເຫຼືອຈາກຕ່າງປະເທດ ແລະ ອົງການຈັດຕັ້ງສາກົນຕ່າງໆ.

     ພ້ອມນັ້ນ, ກອງປະຊຸມໄດ້ຮັບຟັງການລາຍງານ ແລະ ປະກອບຄໍາຄິດຄໍາເຫັນ ຈາກຜູ່ຕາງໜ້າຫຼາຍພາກສ່ວນ ເຊິ່ງແຕ່ລະພາກສ່ວນລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານ ຕໍ່ກອງປະຊຸມໃຫຍ່, ການລາຍງານ ແລະ ປະກອບຄຳເຫັນສ່ວນຫຼາຍໄດ້ລົງເລິກລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ X ເຂົ້າໃນຂົງເຂດກົມກອງ, ຂະແໜງການຂອງຕົນ ອັນໄດ້ເຮັດໃຫ້ກອງປະຊຸມໃຫຍ່ຄັ້ງນີ້ມີເນື້ອໃນອຸດົມສົມບູນຂື້ນຕື່ມ.

ຈາກນັ້ນ, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະພັກຊຸດໃໝ່ ແລະ ຜູ້ແທນສົມບູນ, ສໍາຮອງໄປຮ່ວມກອງປະຊຸມໃຫຍ່ອົງຄະນະພັກແຂວງ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂ ທີ່ໄດ້ກຳນົດໄວ້.

      ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກເມືອງ ສະໄໝທີ XI ໄດ້ເລືອກຕັ້ງເອົາຄະນະປະຈຳພັກເມືອງ, ປະທານ, ຮອງປະທານກວດກາ ແລະ ເປັນເອກະສັນເລືອກເອົາ ເລຂາ, ຮອງເລຂາຄະນະພັກເມືອງ ໂດຍເລືອກເອົາ ສະຫາຍ ວຽງສອນ ພົມມາສອນ ເປັນເລຂາຄະນະບໍລິຫານງານພັກເມືອງ, ສະຫາຍ ທອງຄໍາ ຫງຽນມະລົມ ເປັນຮອງເລຂາຄະນະບໍລິຫານງານພັກເມືອງ ແລະ ສະຫາຍ ນາງ ຊ່ຽນ ສີດາວົງ ເປັນຮອງເລຂາຄະນະບໍລິຫານງານພັກເມືອງ.

      ຕອນທ້າຍກອງປະຊຸມໃຫ່ຍ ຍັງໄດ້ຮັບຟັງການໂອ້ລົມຂອງ ສະຫາຍ ຄຳແພງ ໄຊສົມແພງ ກໍາມະການສູນກາງພັກ, ເລຂາຄະນະບໍລິຫານງານພັກ, ເຈົ້າແຂວງຫົວພັນ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການ ນໍາພາ-ຊີ້ນໍາ ຂອງຄະນະພັກຊຸດເກົ່າ ນໍາພາ-ຊີ້ນໍາ ພະນັກງານ-ລັດຖະກອນ, ສະມາຊິກພັກ ແລະ ປະຊາຊົນບັນດາເຜົ່າ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສໍາເລັດຫຼາຍດ້ານ, ພ້ອມກັນນັ້ນສະ ຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສຶບຕໍ່ປັບປຸງ, ແກ້ໄຂ ແລະ ສະຫາຍມີຄວາມເຊື້ອໝັ້ນຕໍ່ຄະນະພັກຊຸດໃໝ່ ທີ່ຈະສືບຕໍ່ ນໍາພາ-ຊີ້ນໍາພາ ຈັດຕັ້ງປະຕິບັດມະຕິກອງປະຊຸມໃຫ່ຍຂອງຄະນະພັກຄັ້ງທີ່ XI ໃຫ້ຍາດໄດ້ຜົນງານ ແລະ ມີຜົນສຳເລັດຍິ່ງໃຫ່ຍກ່ວາເກົ່າ.

ກອງປະຊຸມຮຽກຮ້ອງມາຍັງສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າທົ່ວເມືອງຮ້ຽມ ຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບການເມືອງຂອງຕົນໃຫ້ສູງຂື້ນເລື້ອຍໆ ເຮັດໃຫ້ວຽກງານຮອບດ້ານພາຍໃນເມືອງໄດ້ຫັນປ່ຽນໃໝ່ທີ່ຕັ້ງໜ້າ ສ້າງໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ.