ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງຫົວພັນ ຊຸດທີ II ໄດ້ອັດລົງດ້ວຍຜົນສຳເລັດ ພາຍຫຼັງດໍາເນີນມາເປັນເວລາ 2 ວັນເຄີ່ງ ນັບແຕ່ວັນທີ 30 ກໍລະກົດ ຫາ 1 ສິງຫາ 2024 ພາຍໃຕ້ການເປັນປະທານ ຂອງທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນແຂວງຫົວພັນ, ໃຫ້ກຽດເຂົ້າຮ່ວມຂອງທ່ານ ປອ ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ທ່ານ ຄຳແພງ ວິລະພັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການກົດໝາຍສະພາແຫ່ງຊາດ, ມີບັນດາທ່ານການນຳພັກ-ລັດ, ອາດີດການນຳພັກ-ລັດ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມ.
ກອງປະຊຸມໄດ້ພິຈາລະນາ ແລະ ຮັບຮອງ ເອົາບົດລາຍງານການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024; ບົດລາຍງານການຈັດຕັ້ງປະຕິບັດມະຕິ ກອງປະຊຸມສະພາ ປະຊາຊົນ ແຂວງຫົວພັນ ສະບັບເລກທີ 396/ສພຂ, ລົງວັນທີ 3/8/2023 ກ່ຽວກັບການຈັດຕັ້ງປະຕິບັດ ການຄຸ້ມຄອງວຽກງານຊອກຄົ້ນ-ສໍາຫຼວດ, ການຂຸດຄົ້ນ-ປຸງແຕ່ງ ແລະ ການສົ່ງອອກແຮ່ທາດ; ບົດລາຍງານການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຫົວພັນ; ພິຈາລະນາ, ຮັບຮອງເອົາການປັບປຸງ ຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍກອງທຶນກິລາ-ກາຍຍະກຳ ແຂວງຫົວພັນ; ພິຈາລະນາ ແລະ ຮັບຮອງ ເອົາບົດລາຍງານ ກ່ຽວກັບການຈັດຕັ້ງປະຕິບັດ ວຽກງານ ປະຈຳ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024 ຂອງສະພາ ປະຊາຊົນແຂວງ ແລະ ພິຈາລະນາ-ຮັບຮອງເອົາການເລືອກຕັ້ງເອົາທ່ານ ຄຳຟອງ ກົ້ວມີໄຊ ເປັນຮອງປະທານ ສະພາປະຊາຊົນແຂວງຫົວພັນ.
ພ້ອມນັ້ນ, ກອງປະຊຸມສະເໜີໃຫ້ອົງການປົກຄອງແຂວງ ເພີ່ມທະວີຄວາມເອົາໃຈໃສ່ ແກ້ໄຂບັນຫາທີ່ ສັງຄົມມີຄວາມເປັນຫ່ວງ ເປັນຕົ້ນແມ່ນ ການແກ້ໄຂບັນຫາເງິນເຟີ້, ອັດຕາແລກປ່ຽນເໜັງຕີງແຮງ, ຄ່າຄອງຊີບສູງຂຶ້ນ ຊຶ່ງໄດ້ສົ່ງຜົນກະທົບໂດຍກົງ ຕໍ່ຊີວິດການເປັນຢູ່ຂອງ ພະນັກງານ, ທະຫານ, ຕຳຫຼວດ ກໍຄືປະຊາຊົນບັນດາເຜົ່າ, ເພີ່ມທະວີການສົ່ງເສີມການຜະລິດກະສິກຳ ເພື່ອຊົມໃຊ້ພາຍໃນ ແລະ ເປັນສິນຄ້າສົ່ງອອກ ພ້ອມທັງເອົາໃຈໃສ່ໃນການປະຫຍັດມັດທະຍັດ, ຕ້ານການຟຸມເຟືອຍ ແລະ ຫຼຸດຜ່ອນການໃຊ້ຈ່າຍທີ່ບໍ່ຈຳເປັນ, ຊຸກຍູ້ຕິດຕາມ ແລະ ສົ່ງເສີມການປູກ, ການລ້ຽງ ແລະ ການຜະລິດເປັນສິນຄ້າ ຂອງປະຊາຊົນບັນດາເຜົ່າໃນແຕ່ລະດູການ ໃຫ້ໄດ້ຮັບໝາກຜົນ, ຫຼຸດຜ່ອນ ການນໍາເຂົ້າສິນຄ້າຈາກຕ່າງປະເທດ ແລະ ປັບປຸງຊີວິດການເປັນຢູ່ ຂອງປະຊາຊົນໃຫ້ດີຂຶ້ນເທື່ອລະກ້າວ, ສຸມທຶນຮອນ ເຕັກນິກ, ເຕັກໂນໂລຊີ ເຂົ້າໃນການຜະລິດເປັນສິນຄ້າທີ່ເຫັນວ່າແຂວງຫົວພັນ ມີທ່າແຮງໄດ້ປຽບເປັນຕົ້ນ ເຂົ້າໄກ່ນ້ອຍ, ສາລີ, ມັນຕົ້ນ ແລະ ອື່ນໆ, ແກ້ໄຂໜີ້ສິນ ໂຄງການລົງທຶນຂອງລັດ, ເພີ່ມທະວີການຄຸ້ມຄອງໂຄງການລົງທຶນ ຂອງພາກເອກະຊົນ ໃນການປະຕິບັດພັນທະ, ການຄຸ້ມຄອງສິ່ງແວດລ້ອມ ແລະ ການແກ້ໄຂຜົນກະທົບທາງສັງຄົມ ຕາມກົດໝາຍຢ່າງເຂັ້ມງວດ.
ຄຽງຄູ່ກັນນັ້ນ, ການຄຸ້ມຄອງວຽກງານຊອກຄົ້ນ-ສໍາຫຼວດ, ການຂຸດຄົ້ນ-ປຸງແຕ່ງ ແລະ ການສົ່ງອອກແຮ່ທາດ ຕ້ອງມີມາດຕະການຈັດຕັ້ງປະຕິບັດຕົວຈິງໃຫ້ຈະແຈ້ງ, ມີການຄຸ້ມຄອງ, ຕິດຕາມກວດກາໂຄງການລົງທຶນດ້ານແຮ່ທາດຢ່າງເຄັ່ງຄັດ, ເດັດຂາດ ຮັບປະກັນໃຫ້ລັດມີຜົນປະໂຫຍດສູງສຸດ, ມີການພັດທະນາແຂວງຫົວພັນ ໃຫ້ດີຂຶ້ນກວ່າເກົ່າ ໂດຍໃຫ້ຮີບຮ້ອນສົມທົບກັບຂະແໜງການກ່ຽວຂ້ອງຂັ້ນສູນກາງກວດກາ, ປະເມີນຄືນໂຄງການລົງທຶນແຮ່ ທາດ ໃນຮູບແບບປົກກະຕິ ແລະ ຮູບແບບທົດລອງ ໃຫ້ສອດຄ່ອງກັບກົດໝາຍ ແລະ ຮີບຮ້ອນແກ້ໄຂໂຄງການ ທີ່ບໍ່ມີປະສິດທິພາບ, ບໍ່ມີປະສິດທິຜົນຢ່າງທັນການ, ເດັດຂາດ ແກ້ໄຂໂຄງການທີ່ສົ່ງຜົນກະທົບຕໍ່ສິ່ງແວດລ້ອມທຳມະຊາດ ແລະ ສັງຄົມ, ເອົາໃຈໃສ່ຄົ້ນຄວ້າກໍານົດໃຫ້ຊັດເຈນ ກ່ຽວກັບເຂດສະຫງວນ, ເຂດຫວງຫ້າມ, ເຂດທີ່ອະນຸຍາດໃຫ້ຂຸດຄົ້ນ ໃຫ້ຖືກຕ້ອງຕາມກົດໝາຍ, ແຜນຍຸດທະສາດການພັດທະນາແຮ່ທາດ ຕິດພັນກັບແຜນປົກປັກເນື້ອທີ່ໄມ້ໃຫ້ໄດ້ 70% ຂຶ້ນໄປ.
ກອງປະຊຸມສະເໜີໃຫ້ມີການແບ່ງຄວາມຮັບຜິດຊອບ, ການຕິດຕາມກວດກາ, ການປະເມີນຜົນ, ປັບປຸງກົນໄກການປະສານງານ, ການແລກປ່ຽນຂໍ້ມູນ- ຂ່າວສານ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນແຕ່ລະຂັ້ນ, ການຈັດສັນພູມລໍາເນົາ ແລະ ເນື້ອທີ່ທຳການຜະລິດ ແລະ ເປັນຕົ້ນແມ່ນການຈັດເຂດທໍາການຜະລິດ ທີ່ເປັນທ່າແຮງຂອງແຕ່ລະເມືອງ, ຈັດສັນງົບປະມານເຂົ້າໃສ່ວຽກງານດັ່ງກ່າວໃຫ້ສາມາດເຄື່ອນໄຫວໄດ້ ຄ່ອງຕົວ ສາມາດບັນລຸບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນຊາວແຂວງຫົວພັນ ເທື່ອລະກ້າວ.
ກອງປະຊຸມໄດ້ເນັ້ນໜັກຕື່ມຕໍ່ການສ້າງ ແລະ ປັບປຸງນິຕິກຳລຸ່ມກົດໝາຍ ໃຫ້ສອດຄອງກັບຄວາມຮຽກຮ້ອງຕ້ອງການໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃນແຕ່ລະໄລຍະ, ຍົກສູງຄຸນນະພາບ ໃນການປະຕິບັດ 3 ພາລະບົດບາດຂອງສະພາປະຊາຊົນແຂວງ, ຮ່ວມກັບອົງການປົກຄອງແຂວງ ເພື່ອແກ້ໄຂບັນຫາເຄັ່ງຮ້ອນຂອງສັງຄົມຢ່າງທັນການ ແລະ ນໍາເອົາຜົນສໍາເລັດ ກອງປະຊຸມຄັ້ງນີ້ໄປເຜີຍແຜ່ໃຫ້ຜູ້ມີສິດເລືອກຕັ້ງທົ່ວແຂວງຮັບຮູ້, ເຂົ້າໃຈຢ່າງກວ້າງຂວາງ ເພື່ອເຂົ້າຮ່ວມການຈັດຕັ້ງປະຕິບັດ, ສ້າງສະຕິເຄົາລົບລັດຖະທຳມະນູນ ແລະ ກົດໝາຍ ໃຫ້ປະກົດຜົນເປັນຈິງ ແລະ ກອງປະຊຸມສະເໜີໃຫ້ອົງການປົກຄອງແຂວງ ເອົາໃຈໃສ່ໃນການຜັນຂະຫຍາຍ, ຈັດຕັ້ງປະຕິບັດບັນດາມະຕິ ຂອງຄະນະປະຈໍາສະພາປະຊາຊົນແຂວງ ທີ່ວາງອອກໃນແຕ່ລະໄລຍະໃຫ້ວ່ອງໄວ ທັນຕາມກຳນົດເວລາ ແລະ ສອດຄ່ອງກັບສະພາບຕົວຈິງຂອງແຂວງໃນແຕ່ລະໄລຍະ.
ນອກຈາກນີ້, ກອງປະຊຸມຍັງໄດ້ຮັບຟັງການຊີ້ແຈງ ຕໍ່ບັນຫາພົ້ນເດັ່ນຕ່າງໆ ທີ່ສັງຄົມກໍ່ຄືປະຊາຊົນບັນດາເຜົ່າໃນທົ່ວແຂວງມີຄວາມສົນໃຈຈາກທ່ານເຈົ້າແຂວງ, ບັນດາພະແນກການທີ່ກ່ຽວຂ້ອງ ຂອງແຂວງ ແລະ ຄະນະປະຈຳສະພາປະຊາຊົນແຂວງຕື່ມອີກ. ເຊີ່ງກອງປະຊຸມສະແດງຄວາມເຊື່ອໝັ້ນວ່າ ແຕ່ລະພາກສ່ວນຈະສືບຕໍ່ເສີມຂະຫຍາຍຜົນສໍາເລັດທີ່ຍາດມາໄດ້ ໃນໄລຍະ 6 ເດືອນຜ່ານມາ, ສູ້ຊົນຈໍາກັດ ແລະ ແກ້ໄຂອຸປະສັກສິ່ງກີດຂວາງ, ກົດໜ່ວງ, ຖ່ວງດຶງ ໃນຂົງເຂດວຽກງານທີ່ຕົນຮັບຜິດຊອບ ເພື່ອສ້າງໃຫ້ມີການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ດີຂຶ້ນຢ່າງຈະແຈ້ງ ໂດຍສະເພາະແມ່ນການຈັດຕັ້ງປະຕິບັດ ບັນດາຕົວເລກຄາດໝາຍທີ່ໄດ້ວາງໄວ້ໃນ 6 ເດືອນທ້າຍປີ ໃຫ້ບັນລຸ ແລະ ລື່ນຄາດໝາຍ ເພື່ອສືບຕໍ່ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ, ແຜນພັດທະນາເສດຖະກິດ – ສັງຄົມ ຂອງແຂວງ 5 ປີ ຄັ້ງທີ IX ໃຫ້ເປັນຮູບປະທຳ ແລະ ມີໝາກຜົນຕົວຈິງ ຫຼາຍຂື້ນ.
ຕອນທ້າຍກອງປະຊຸມ, ທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນແຂວງຫົວພັນ ໄດ້ຮຽກຮ້ອງມາຍັງ ອົງການປົກຄອງແຂວງ ແລະ ການຈັດຕັ້ງທຸກຂັ້ນ ກໍຄືບັນດາທ່ານຄະນະປະຈຳສະພາປະຊາຊົນແຂວງ ຈົ່ງໄດ້ຮີບຮ້ອນຈັດຕັ້ງຜັນຂະຫຍາຍເນື້ອໃນກອງປະຊຸມໃຫ້ທົ່ວເຖິງ – ທັນເວລາ, ຮຽກຮ້ອງມາຍັງສະມາຊິກ ອົງການປົກຄອງແຂວງ ແລະ ການຈັດຕັ້ງທຸກຂັ້ນ, ປະຊາຊົນຊາວແຂວງຫົວພັນ ແລະ ທຸກພາກສ່ວນຈົ່ງໃຫ້ການຮ່ວມມືສະໜັບສະໜູນ ແລະ ເປັນເຈົ້າການເຂົ້າຮ່ວມຈັດຕັ້ງປະຕິບັດໃຫ້ມີຜົນສໍາເລັດ.
