ພາລະບົດບາດ

 

ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ພັກປະຊາຊົນປະຕິວັດລາວ

ຄະນະປະຈໍາພັກແຂວງຫົວພັນ                                                                                                                                             ເລກທີ 20 /ຄປຈຂ

ທີ່ຫົວພັນ, ວັນທີ 12 ກຸມພາ 2023

ມະຕິຕົກລົງ

ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະໂຄສະນາອົບຮົມແຂວງ

– ອີງຕາມ ກົດລະບຽບຂອງພັກປະຊາຊົນປະຕິວັດລາວສະໄຫມທີ XI ມາດຕາ 10 ຂໍ້ 6.

– ອີງຕາມ ຄວາມຮຽກຮ້ອງຕ້ອງການຕົວຈິງຂອງວຽກງານການເມືອງ-ແນວຄິດໃນໄລຍະໃຫມ່.

– ອີງຕາມ ການນໍາສະເຫນີຂອງຄະນະຈັດຕັ້ງແຂວງ ສະບັບເລກທີ 53 /ຄຈຂ, ລົງວັນທີ 13 ກຸມພາ 2023.

ຄະນະປະຈໍາພັກແຂວງຕົກລົງ:

ຫມວດທີ I

ບົດບັນຍັດທົ່ວໄປ

ມາດຕາ 1: ຈຸດປະສົງ. 

ມະຕິຕົກລົງສະບັບນີ້ ໄດ້ກໍານົດກ່ຽວກັບທີ່ຕັ້ງ, ພາລະບົດບາດ, ຫນ້າທີ່, ຂອບເຂດສິດ, ໂຄງປະກອບກົງ ຈັກການຈັດຕັ້ງ, ຫຼັກການ ແລະ ແບບແຜນວິທີເຮັດວຽກ ເພື່ອເປັນບ່ອນອີງດ້ານນິຕິກໍາແກ່ການຈັດຕັ້ງ ແລະການ ເຄື່ອນໄຫວຂອງຄະນະໂຄສະນາອົບຮົມແຂວງໃນການຈັດຕັ້ງປະຕິບັດວຽກງານວິຊາສະເພາະໃຫ້ມີປະສິດທິພາບສູງ.

ມາດຕາ 2: ທີ່ຕັ້ງ ແລະ ພາລະບົດບາດ. 

ຄະນະໂຄສະນາອົບຮົມແຂວງ ຂຽນຊື່ຫຍໍ້ດ້ວຍຕົວອັກສອນ ( ຄອຂ ) ແມ່ນອົງການຈັດຕັ້ງຫນຶ່ງຂອງພັກ, ມີ ຖານະທຽບເທົ່າກັບພະແນກການ ແລະ ອົງການຕ່າງໆຂອງແຂວງຢູ່ພາຍໃຕ້ການຊີ້ນໍາໂດຍກົງຈາກຄະນະປະຈໍາພັກ ແຂວງ ແລະການກວດກາຊີ້ນໍາດ້ານວິຊາການຂອງຄະນະໂຄສະນາອົບຮົມອົບຮົມສູນກາງພັກ, ມີພາລະບົດບາດເປັນ ເສນາທິການໃຫ້ແກ່ຄະນະປະຈໍາພັກ, ຄະນະບໍລິຫານງານແຂວງກ່ຽວກັບວຽກງານການເມືອງ – ແນວຄິດ, ວຽກງານ ໂຄສະນາອົບຮົມ, ວຽກງານປະຖະກະຖາໃນທົ່ວແຂວງຫົວພັນ.

ຫມວດທີ II

ຫນ້າທີ່ ແລະ ຂອບເຂດສິດ

ມາດຕາ 3: ຫນ້າທີ່. 

1. ຈັດຕັ້ງເຜີຍແຜ່ຊື່ອມຊຶມແນວທາງນະໂຍບາຍຂອງພັກ, ກົດຫມາຍຂອງລັດ ແລະ ບັນດາມະຕິກອງປະ ຊຸມໃຫຍ່ຂອງພັກ, ມະຕິ, ຄໍາສັ່ງຕ່າງໆ ຂອງສູນກາງພັກ, ແຜນພັດທະນາເສດຖະກິດ-ສັງຄົມຂອງລັດຖະບານ, ຂອງ ແຂວງໃຫ້ແກ່ພະນັກງານ, ສະມາຊິກພັກ, ທະຫານ, ຕໍາຫຼວດ, ຊັ້ນຄົນປັນຍາຊົນ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າ ໃນຄວາມຮັບຜິດຊອບຂອງຕົນ.
2. ຄົ້ນຄ້ວາຫັນເອົາແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຂອງອົງຄະນະພັກ ແລະ ແຜນ ພັດທະນາເສດຖະກິດສັງຄົມຂອງແຂວງມາເປັນແຜນການ, ແຜນງານ, ໂຄງການລະອຽດຂອງຕົນ ພ້ອມທັງຮັບຜິດ ຊອບໃນການຈັດຕັ້ງປະຕິບັດໃຫ້ປະກົດຜົນເປັນຈິງ.
3. ຄົ້ນຄ້ວາຮ່າງແຜນຍຸດທະສາດກ່ຽວກັບວຽກງານການເມືອງ-ແນວຄິດ, ວຽກງານໂຄສະນາອົບຮົມແລະ ວຽກງານໂຄສະນາປາຖະກະຖາໄລຍະຍາວ ເພື່ອສະເຫນີຄະນະປະຈໍາພັກແຂວງ ພິຈາລະນາ.
4. ສ້າງແຜນການ, ໂຄງການລະອຽດ ໃນການບໍາລຸງສ້າງຖັນແຖວ ພະນັກງານຜູ້ທີ່ເຮັດວຽກງານ ການເມືອງ – ແນວຄິດ, ຜູ້ເຮັດວຽກງານໂຄສະນາອົບຮົມ, ເຮັດວຽກງານເກັບກໍາຫາງສຽງສັງຄົມ, ນັກໂຄສະນາປາ ຖະກະຖາ, ຂອງບັນດາຂະແຫນງການອ້ອມຂ້າງແຂວງ ແລະ ຂັ້ນເມືອງ ພ້ອມທັງຈັດຕັ້ງຝຶກອົບຮົມ.
5. ຈັດຕັ້ງການໂຄສະນາປາຖະກະຖາ, ມູນເຊື້ອໃນໂອກາດວັນສໍາຄັນຂອງຊາດ, ຂອງພັກ, ຂອງທ່ານຜູ້ນໍາຮຸ່ນ ທໍາອິດ, ສະພາບການທີ່ພົ້ນເດັ່ນຢູ່ພາຍໃນ ແລະຕ່າງປະເທດໃຫ້ພະນັກງານ, ສະມາຊິກພັກ, ຊັ້ນຄົນປັນຍາຊົນ ແລະ ປະຊາຊົນໃນຄວາມຮັບຜິດຊອບຂອງຕົນ.
6. ກໍາແຫນ້ນສະພາບແນວຄິດ ແລະເກັບກໍາທາງສຽງນ້ໍາເປົ້າຫມາຍຕ່າງໆ ໃນສັງຄົມຕາມຂອບເຂດສິດ, ຫນ້າທີ່ ຂອງຕົນ ພ້ອມທັງຄົ້ນຄວ້າວິເຄາະ, ວິໄຈ ແລະ ສະເຫນີວິທີການແກ້ໄຂ ຕໍ່ຄະນະປະຈໍາພັກແຂວງໃຫ້ທິດຊີ້ນໍາໃນ ການແກ້ໄຂໃຫ້ຖຶກຕ້ອງທັນເວລາ.
7. ຄຸ້ມຄອງລະບົບໄອທີ, ເຕັກນິກຂໍ້ມູນຂ່າວ, ເວບໄຊຂອງຄະນະໂຄສະນາອົບຮົມແຂວງ ເພື່ອຮັບໃຊ້ຫນ້າ ທີ່ວຽກງານໃຫ້ວ່ອງໄວ ແລະ ທັນການ.
8. ຈັດຕັ້ງການໂຄສະນາເຄື່ອນທີ່ ແລະ ການໂຄສະນາຜ່ານສື່ຕ່າງໆ ເພື່ອເຄື່ອນໄຫວໂຄສະນາ-ນໍາພາແນວຄິດ ປະຊາຊົນໃຫ້ໄດ້ຢ່າງກ້ວາງຂວາງທົ່ວເຖິງ ເປັນຕົ້ນແມ່ນໃນເຂດຈຸມສຸມຂອງແຂວງ.
9. ປະສານສົມທົບກັບບັນດາພະແນກການອ້ອມຂ້າງແຂວງ ແລະ ຄະນະພັກເມືອງ, ຄະນະໂຄສະນາອົບ ຮົມເມືອງ ເພື່ອສຶກສາອົບຮົມວຽກງານການເມືອງ-ແນວຄິດ, ວຽກງານໂຄສະນາອົບຮົມ, ວຽກງານປາຖະກະຖາໃຫ້ ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າຢ່າງທົ່ວເຖິງ.
10. ສະຫຼຸບຕີລາຄາວຽກງານການເມືອງ – ແນວຄິດ, ຈັດຕັ້ງບໍາລຸງ ແນະນໍາດ້ານວິຊາການ, ສະຫນອງເອກະ ສານທີ່ຈໍາເປັນໃຫ້ຄະນະໂຄສະນາອົບຮົມເມືອງ ແລະ ຂະແຫນງການຕ່າງໆອ້ອມຂ້າງແຂວງ.
11. ຂື້ນແຜນງົບປະມານ, ຄຸ້ມຄອງຊັບສິນ, ເຮັດວຽກງານບໍລິຫານ-ພິທີການ, ການຄົ້ນຄ້ວາປັບປຸງກົງຈັກ ການຈັດຕັ້ງ, ການສ້າງແຜນກໍານົດພະນັກງານນໍາພາ-ຄຸ້ມຄອງ, ແຜນບໍາລຸງ – ກໍ່ສ້າງພະນັກງານ, ແຜນກໍານົດຕໍາແຫນ່ງ ງານ, ການປະຕິບັດນະໂຍບາຍ, ການປະສານງານ, ການພົວພັນ ແລະ ສະຫຼຸບວຽກງານຮອບດ້ານຂອງຄະນະໂຄສະ ນາອົບຮົມແຂວງ ເປັນປົກກະຕິ.
12. ສ້າງລາຍການວິທະຍຸຂອງຄະນະໂຄສະນາອົບຮົມແຂວງເພື່ອໂຄສະນາແນວທາງນະໂຍບາຍຂອງພັກ, ກົດຫມາຍຂອງລັດ ແລະບັນດາມະຕິກອງປະຊຸມໃຫຍ່ຂອງພັກ, ມະຕິ, ຄໍາສັ່ງຕ່າງໆ ຂອງສູນກາງພັກ, ແຜນ ພັດທະນາເສດຖະກິດ – ສັງຄົມຂອງລັດຖະບານ, ຂອງແຂວງໃຫ້ແກ່ພະນັກງານ, ສະມາຊິກພັກ, ທະຫານ, ຕໍາ ຫຼວດ, ຊັ້ນຄົນປັນຍາຊົນ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າ ໃນຄວາມຮັບຜິດຊອບຂອງຕົນ.
13. ພົວພັນຮ່ວມມືກັບຄະນະໂຄສະນາອົບຮົມພາຍໃນ ແລະ ເພື່ອນມິດຫວຽດນາມ.
14. ປະຕິບັດຫນ້າທີ່ອື່ນໆຕາມການມອບຫມາຍຂອງຄະນະປະຈໍາພັກແຂວງ, ຕາມລະບຽບການທີ່ກໍານົດໄວ້.

ມາດຕາ 4: ຂອບເຂດສິດ.

1. ເຂົ້າຮ່ວມກອງປະຊຸມຄະນະບໍລິຫານງານພັກແຂວງ, ອົງການປົກຄອງແຂວງ, ກອງປະຊຸມຂອງຄະນະໂຄ ສະນາອົບຮົມສູນກາງພັກ ແລະ ກອງປະຊຸມອື່ນໆ ຕາມການຕົກລົງຂອງຄະນະປະຈໍາພັກແຂວງ ແລະ ການເຊີນ ຂອງອົງການກ່ຽວຂ້ອງ, ປະກອບຄໍາເຫັນທີ່ພົວພັນເຖິງວຽກງານການເມືອງ-ແນວຄິດ, ວຽກງານໂຄສະນາອົບຮົມ ແລະ ວຽກງານອື່ນຕາມຄວາມເປັນຈິງ.
2. ອອກຄໍາແນະນໍາ ແລະ ແຈ້ງການຕ່າງໆ ເຖິງຄະນະພັກພະແນກການ – ອົງການຂອງແຂວງ ແລະ ຄະນະ ພັກເມືອງ ກ່ຽວກັບວຽກງານການເມືອງ-ແນວຄິດ, ວຽກງານໂຄສະນາອົບຮົມ ແລະ ວຽກງານປາຖະກະຖາ ຕາມຄວາມຮັບຜິດຊອບຂອງຕົນ.
3. ສະເຫນີການປັບປຸງກົງຈັກການຈັດຕັ້ງ, ການບັນຈຸສັບຊ້ອນ, ແຕ່ງຕັ້ງ, ຍົກຍ້າຍ, ຍ້ອງຍໍ, ປະຕິບັດນະໂຍ ບາຍ ແລະ ປະຕິບັດວິໄນຕໍ່ພະນັກງານ-ລັດຖະກອນທີ່ຢູ່ໃຕ້ການຄຸ້ມຄອງຂອງຕົນຕາມລະບຽບການກໍານົດໄວ້.
4. ສະເຫນີປັບປຸງ ຫຼື ລົບລ້າງມະຕິຕົກລົງ, ຂໍ້ຕົກລົງ, ຄໍາສັ່ງ, ຄໍາແນະນໍາ, ແຈ້ງການ ແລະ ນິຕິກໍາອື່ນໆ ກ່ຽວກັບວຽກງານໂຄສະນາອົບຮົມທີ່ຂັດກັບແນວທາງນະໂຍບາຍຂອງພັກ, ກົດຫມາຍ ແລະ ບໍ່ສອດຄ່ອງກັບພາລະ ບົດບາດ ແລະ ສະພາບຄວາມເປັນຈິງຂອງວຽກງານ.
5. ເຊັນເອກະສານທາງການໄດ້ຕາມພາລະບົດບາດ, ຫນ້າທີ່, ສິດ ແລະຄວາມຮັບຜິດຊອບຂອງຕົນທີ່ກໍານົດໄວ້. 6. ຈັດຕັ້ງປະຕິບັດງົບປະມານຂອງຂະແຫນງການຕົນ ໃຫ້ຖືກຕ້ອງຕາມລະບຽບຫຼັກການ ແລະ ການນໍາໃຊ້ ພາຫະນະ, ວັດຖຸອຸປະກອນຕ່າງໆ ທີ່ພັກ-ລັດມອບຫມາຍໃຫ້ມີປະສິດທິຜົນສູງ.

ຫມວດທີ III

ກົງຈັກການຈັດຕັ້ງ ແລະ ບຸກຄະລາກອນ

ມາດຕາ 5: ໂຄງປະກອບກົງຈັກປະກອບມີ: 

1. ຂແຫນງບໍລິຫານ.
2. ຂະແຫນງໂຄສະນາ.
3. ຂະແຫນງອົບຮົມ,
4. ຂະແຫນງສັງລວມ ແລະ ຂໍ້ມູນຂ່າວສານ.

ມາດຕາ 6: ໂຄງປະກອບບຸກຄະລາກອນ. 

1. ຫົວຫນ້າຄະນະໂຄສະນາອົບຮົມແຂວງ 1 ທ່ານ, ມີຄວາມຮັບຜິດຊອບຕໍ່ຄະນະບໍລິຫານງານພັກແຂວງ, ຄະນະປະຈໍາພັກແຂວງ ກ່ຽວກັບວຽກງານການເມືອງ-ແນວຄິດ ແລະ ວຽກງານໂຄສະນາອົບຮົມ; ການຄຸ້ມຄອງພະ ນັກງານຕາມຄວາມຮັບຜິດຊອບ ແລະ ມີສິດຫນ້າທີ່ ຕາມພາລະບົດບາດທີ່ໄດ້ກໍານົດໄວ້, ໃນເວລາຕິດຂັດພາລະກິດ ຕ້ອງມອບໃຫ້ຮອງຫົວຫນ້າຄະນະໂຄສະນາອົບຮົມສະຫາຍໃດຫນຶ່ງເປັນຜູ້ຮັກສາການແທນ.
2. ຮອງຫົວຫນ້າຄະນະໂຄສະນາອົບຮົມແຂວງຈໍານວນຫນື່ງ ເຊິ່ງໄດ້ຮັບການແຕ່ງຕັ້ງໂດຍກົງຈາກສະຫາຍເລ ຂາພັກແຂວງ ເປັນຜູ້ຊ່ວຍຫົວຫນ້າຄະນະໂຄສະນາອົບຮົມໃນການຊີ້ນໍາວຽກງານຂອງຕົນ, ຮັບຜິດຊອບວຽກງານໃດ ຫນຶ່ງຕາມການມອບຫມາຍຂອງຫົວຫນ້າຄະນະໂຄສະນາອົບຮົມ, ມີຄວາມຮັບຜິດຊອບໂດຍກົງຕໍ່ຜົນສໍາເລັດ, ຂໍ້ຂາດ ຕົກບົກຜ່ອງ ໃນວຽກງານທີ່ຕົນເອງຊີ້ນໍາ ແລະ ເປັນຜູ້ຮັກສາການແທນໃນເວລາຫົວຫນ້າຕິດຂັດ.
3. ຫົວຫນ້າຫ້ອງການ, ຫົວຫນ້າຂະແຫນງ ແລະ ຮອງຫົວຫນ້າຫ້ອງການ, ຮອງຫົວຫນ້າຂະແຫນງ ແລະ ພະນັກ ງານ-ລັດຖະກອນຈໍານວນຫນຶ່ງຕາມການກໍານົດຕໍາແຫນ່ງງານ ໂດຍການບັນຈຸຊັບຊ້ອນຈັດວາງ, ແຕ່ງຕັ້ງ, ຍົກຍ້າຍ ແລະ ປົດຕໍາແຫນງຕາມກົດຫມາຍ ແລະ ລະບຽບການ.

ຫມວດທີ IV ຫນ້າທີ່ຂອງແຕ່ລະຂະແຫນງ

ມາດຕາ 7: ຫນ້າທີ່ຂອງຂະແຫນງບໍລິຫານ. 

1. ຄຸ້ມຄອງສະມາຊິກພັກ, ພະນັກງານ – ລັດຖະກອນ, ການຂື້ນແຜນກໍານົດພະນັກງານນໍາພາ – ຄຸ້ມຄອງ, ແຜນບໍາລຸງ-ກໍ່ສ້າງພະນັກງານ, ແຜນກໍານົດຕໍາແຫນ່ງງານ, ການປະຕິບັດນະໂຍບາຍຕ່າງໆ ຕໍ່ພະນັກງານ.
2. ຄຸ້ມຄອງວັດຖຸ, ອຸປະກອນ, ພາຫະນະຮັບໃຊ້, ວຽກງານຂາເຂົ້າ-ຂາອອກ, ວຽກງານສໍາເນົາເອກະສານ, ການຈັດພິມເອກະສານ, ວຽກງານປະຊາສໍາພັນ, ວຽກງານບໍລິຫານ, ບໍລິການປິ່ນອ້ອມວຽກງານວິຊາສະເພາະ ແລະ ເຮັດວຽກງານອື່ນໆ ທີ່ກ່ຽວຂ້ອງຕາມການມອບຫມາຍ.
3. ຂື້ນແຜນງົບປະມານ, ຄຸ້ມຄອງນໍາໃຊ້ງົບປະມານເຂົ້າໃນວຽກງານຕ່າງໆ; ສະຫຼຸບລາຍຮັບ-ລາຍຈ່າຍ ເພື່ອໃຫ້ພາກສ່ວນກ່ຽວຂ້ອງ; ພ້ອມທັງຄິດໄລ່ເງິນເດືອນ, ເງິນອຸດຫນູນ, ລະບອບປະກັນສັງຄົມ ແລະ ນະໂຍບາຍ ຕ່າງໆ ໃຫ້ຖຶກຕ້ອງຕາມລະບຽບຫຼັກການ.
4. ເປັນເຈົ້າການຈັດກອງປະຊຸມສ່ອງແສງລາຍງານປະຈໍາອາທິດ.
5. ປະຕິບັດຫນ້າທີ່ອື່ນໆ ຕາມການມອບຫມາຍຂອງຄະນະໂຄສະນາອົບຮົມແຂວງ.

ມາດຕາ 8: ຫນ້າທີ່ຂອງຂະແຫນງໂຄສະນາ. 

1. ໂຄສະນາເຜີຍແຜ່ແນວທາງນະໂຍບາຍຂອງພັກ -ກົດຫມາຍຂອງລັດ, ມູນເຊື້ອຂອງຊາດ, ຂອງພັກ, ຂອງກອງທັບ, ຂອງທ່ານຜູ້ນໍາ, ຜົນສໍາເລັດຂອງການຈັດຕັ້ງປະຕິບັດແນວທາງ, ນະໂຍບາຍຂອງພັກ-ລັດ ແລະ ຂອງ ທ້ອງຖິ່ນຕົນ; ສະພາບການພົ້ນເດັ່ນທັງພາຍໃນ ແລະ ຕ່າງປະເທດໃນແຕ່ລະໄລຍະຕາມຄວາມເຫມາະສົມ.
2. ເປັນເຈົ້າການປັບປຸງເນື້ອໃນເອກະສານປາຖະກະຖາ ໃຫ້ແທດເຫມາະກັບແຕ່ລະເປົ້າຫມາຍ ແລະ ສອດ ຄ່ອງກັບສະພາບຈຸດພິເສດ ຂອງທ້ອງຖິ່ນຕົນ.
3. ເປັນເຈົ້າການສ້າງແຜນການ, ໂຄງການລະອຽດຂອງຂະແຫນງການຕົນ ເພື່ອຈັດຝຶກອົບຮົມຍົກລະດັບໃຫ້ ພະນັກງານຜູ້ເຮັດວຽກງານໂຄສະນາ, ປາຖະກະຖາ, ໂຄສະນາເຄື່ອນທີ່ ແລະ ໂຄສະນາຜ່ານສື່.
4. ຈັດຕັ້ງໂຄສະນາຜ່ານສື່ຕ່າງໆ ເຊັ່ນ: ໂທລະພາບ, ວິທະຍຸ, ສື່ສິ່ງພິມ ໂດຍສົມທົບກັບພາກສ່ວນສື່ມວນຊົນ ຂອງແຂວງ ເພື່ອນໍາເອົາແນວທາງນະໂຍບາຍຂອງພັກ, ກົດຫມາຍຂອງລັດ, ບັນດາມະຕິ, ຄໍາສັ່ງ ແລະ ວຽກງານການເມືອງ-ແນວຄິດລົງໂຄສະນາເຜີຍແຜ່ຜ່ານສື່.
5. ຈັດຕັ້ງການໂຄສະນາເຄື່ອນທີ່ໃຫ້ປະຊາຊົນບັນດາເຜົ່າ ຢູ່ໃນເຂດຊຸມຊົນ, ເຂດຊານເມືອງ, ເຂດຫ່າງໄກ ສອກຫຼີກໃຫ້ຮັບຮູ້ເຂົ້າໃຈແນວທາງນະໂຍບາຍຂອງພັກ, ກົດຫມາຍຂອງລັດ ແລະ ເກັບກໍາຂໍ້ມູນຄອບຄົວຕົວແບບໃນ

ການຜະລິດເປັນສິນຄ້າ ສ້າງເປັນສາລະຄະດີພາຍໃນທ້ອງຖິ່ນຕົນເປັນແຕ່ລະໄລຍະ.

6. ຊຸກຍູ້, ຕິດຕາມການເຄື່ອນໄຫວວຽກງານໂຄສະນາ, ປາຖະກະຖາຢູ່ບັນດາພະແນກການ, ບັນດາເມືອງເປັນປົກກະຕິ; ພ້ອມທັງສະຫຼຸບວຽກງານໃນຂະແຫນງການຕົນ ເພື່ອລາຍງານໃຫ້ຄະນະປະຈໍາພັກແຂວງ ແລະ ຄະນະໂຄສະນາອົບຮົມສູນກາງພັກ.

ມາດຕາ 9: ຫນ້າທີ່ຂອງຂະແຫນງອົບຮົມ. 

1. ຕິດຕາມສະຫຼຸບສັງລວມການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິ, ຄໍາສັ່ງຂອງຂັ້ນເທິງ, ເພື່ອລາຍງານຄະນະໂຄສະນາອົບຮົມສູນກາງພັກ. ແຜນພັດທະນາເສດຖະກິດ-ສັງຄົມຂອງແຂວງ
2. ຄົ້ນຄວ້າກໍາແຫນ້ນມະຕິກອງປະຊຸມໃຫ່ຍຂອງອົງຄະນະພັກແຂວງແຕ່ລະສະໄຫມ ເພື່ອສ້າງເປັນເອກະ ສານອົບຮົມໃຫ້ເປົ້າຫມາຍຕ່າງໆ ຢູ່ພາຍແຂວງ, ເມືອງ ແລະ ປະຊາຊົນບັນດາເຜົ່າ.
3. ຝຶກອົບຮົມບໍາລຸງຍົກລະດັບຄວາມຮູ້ທາງດ້ານທິດສະດີ, ແນວທາງໃຫ້ແກ່ສະມາຊິກພັກ, ພະນັກງານ, ລັດຖະກອນຢູ່ຂັ້ນແຂວງ, ເມືອງຕາມເອກະສານອົບຮົມເປົ້າຫມາຍຕ່າງໆ ຂອງກົມອົບຮົມຄະນະໂຄສະນາອົບຮົມສູນກາງພັກ.
4. ປະສານສົມທົບກັບພະແນກການ, ອົງການຕ່າງໆ ເພື່ອຈັດຕັ້ງຮຽນເອກະສານສະຫນັບສະຫນູນ ໃຫ້ມະ ຫາຊົນຜູ້ກ້າວຫນ້າ ທີ່ຈະຂະຫຍາຍເຂົ້າພັກແຕ່ລະພະແນກການຂອງແຂວງ.
5. ສົມທົບກັບພະແນກສຶກສາ ເພື່ອຕິດຕາມກວດກາ ແລະ ຊຸກຍູ້ການຮຽນ – ການສອນວິຊາສຶກສາພົນ ລະເມືອງວິຊາສັງຄົມການເມືອງຢູ່ບັນດາໂຮງຮຽນອະຊີວະສຶກສາ, ໂຮງຮຽນສາມັນຢູ່ຂັ້ນແຂວງ.
6. ສົມທົບກັບຄະນະຈັດຕັ້ງແຂວງ, ຄະນະກວດກາພັກແຂວງຕິດຕາມ ແລະ ຊຸກຍູ້ການປະເມີນສະມາຊິກ ພັກ, ຫນ່ວຍພັກປອດໃສ່, ເຂັ້ມແຂງ, ຫນັກແຫນ້ນ ຢູ່ບັນດາຫນ່ວຍພັກອ້ອມຂ້າງແຂວງ.
7. ສ້າງແຜນການເຄື່ອນໄຫວວຽກງານຂອງຂະແຫນງການຕົນ ໃນການຈັດຕັ້ງຝຶກອົບຮົມເປົ້າຫມາຍຕ່າງໆ; ພ້ອມທັງສະຫຼຸບຕີລາຄາ, ປະເມີນຜົນການຝຶກອົບຮົມໃນແຕ່ລະຄັ້ງ ເພື່ອລາຍງານຄະນະປະຈໍາພັກແຂວງ ແລະ ຄະ ນະໂຄສະນາອົບຮົມສູນກາງພັກ.
8. ປະຕິບັດຫນ້າທີອື່ນໆຕາມການມອບຫມາຍຂອງຄະນະໂຄສະນາອົບຮົມແຂວງ ແລະ ຂັ້ນເທິງ.

ມາດຕາ 10: ຫນ້າທີ່ຂອງຂະແຫນງສັງລວມ ແລະ ຂໍ້ມູນຂ່າວສານ. 

1. ສະຫຼຸບ ແລະ ວາງທິດທາງວຽກງານໂຄສະນາອົບຮົມ, ວຽກງານການເມືອງ-ແນວຄິດປະຈໍາ 3 ເດືອນ, 6 ເດືອນ, 1 ປີ ແລະ 5 ປີ ເພື່ອລາຍງານໃຫ້ຄະນະປະຈໍາພັກແຂວງ ແລະ ຄະນະໂຄສະນາອົບຮົມສູນກາງພັກ.
2. ຕິດຕາມ, ເກັບກໍາສະພາບແນວຄິດ, ຫ່າງສຽງທີ່ພົ້ນເດັ່ນຂອງພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ, ການລາຍງານຂອງຕາຫນ້າງເພື່ອຮ່ວມງານຂອງແຂວງ, ເມືອງທີ່ເກີດຂຶ້ນໃນແຕ່ລະໄລຍະ ເພື່ອ ສະຫຼຸບສັງລວມ, ຄົ້ນຄ້ວາວິເຄາະ, ວິໄຈ ແລະ ສະເຫນີມາດຕະການແກ້ໄຂສົ່ງໃຫ້ຄະນະປະຈໍາພັກແຂວງ.
3. ເປັນເຈົ້າການສ້າງແຜນການ, ໂຄງການລະອຽດຂອງຂະແຫນງການຕົນເພື່ອຈັດຝຶກອົບຮົມຍົກລະດັບໃຫ້ພະ ນັກງານ, ສະມາຊິກພັກ, ຜູ້ເຮັດວຽກງານສັງລວມ, ເກັບກໍາຫ່າງສຽງສັງຄົມ ແລະ ໄອທີ ຕາມຄວາມຮັບຜິດຊອບຂອງຕົນ.
4. ຕິດຕາມ, ກວດກາເຕັກນິກການເຊື່ອມຕໍ່ລະບົບເຄື່ອຄ່າຍເອເລັກໂຕຣນິກລະຫວ່າງ ຄະນະໂຄສະນາ ອົບຮົມສູນກາງພັກກັບຄະນະໂຄສະນາອົບຮົມແຂວງ ແລະ ເມືອງ.
5. ຈັດຕັ້ງບໍາລຸງຍົກລະດັບວິຊາການໄອທີ ໃຫ້ພະນັກງານໂຄສະນາອົບຮົມ ຮູ້ນໍາໃຊ້ເຕັກນິກ, ເຕັກໂນໂລຍີ ທີ່ທັນສະໄຫມ.
6. ຄຸ້ມຄອງລະບົບຂໍ້ມູນຂ່າວສານ, ຫ້ອງສະຫມຸດ ແລະ ຫນອງຂໍ້ມູນຕ່າງໆໃຫ້ແກ່ຂັ້ນເທິງ ແລະ ພາກສ່ວນ ຕ່າງໆທີ່ກ່ຽວຂ້ອງ.
7. ປະຕິບັດຫນ້າທີ່ອື່ນໆຕາມການມອບຫມາຍຂອງຄະນະ ແລະ ຂັ້ນເທິງ.

ຫມວດທີ V

ຫຼັກການ ແລະ ແບບແຜນວິທີເຮັດວຽກ

ມາດຕາ 11: ຫຼັກການ. 

1. ປະຕິບັດຕາມຫຼັກການລວມສູນປະຊາທິປະໄຕ, ຕົກລົງເປັນຫມູ່ຄະນະ, ແບ່ງງານໃຫ້ບຸກຄົນຮັບຜິດຊອບ ຢ່າງຈະແຈ້ງ, ປະຕິບັດລະບອບຫົວຫນ້າດຽວ, ບົນພື້ນຖານການເສີມຂະຫຍາຍຫົວຄິດປະດິດສ້າງ ແລະ ຄວາມຮັບຜິດຊອບຂອງພະນັກງານ-ລັດຖະກອນ.
2. ການເຄື່ອນໄຫວວຽກງານຂອງຄະນະໂຄສະນາອົບຮົມແຂວງ ແລະ ພະນັກງານ-ລັດຖະກອນແມ່ນປະຕິ ບັດຕາມແນວທາງນະໂຍບາຍຂອງພັກ, ລະບຽບກົດຫມາຍ ເພື່ອຫັນເອົາວຽກງານການເມືອງ-ແນວຄິດ, ແຜນການ ພັດທະນາເສດຖະກິດ-ສັງຄົມຂອງແຂວງ ມາຈັດຕັ້ງປະຕິບັດໃຫ້ໄດ້ຮັບຜົນດີ,

ມາດຕາ 12: ແບບແຜນວິທີເຮັດວຽກ. 

1. ເຮັດວຽກຢ່າງມີແຜນການ, ແຜນງານ, ໂຄງການລະອຽດ, ແກ້ໄຂວຽກງານຢ່າງມີຈຸດສຸມ, ມີເປົ້າຫມາຍ ໃນແຕ່ລະໄລຍະ, ມີການປະສານສົມທົບກັບບັນດາພະແນກການຂອງແຂວງຢ່າງກົມກຽວ ແລະ ແຫນ້ນແຟ້ນ ເພື່ອຮັບປະກັນໃນການຈັດຕັ້ງປະຕິບັດໃຫ້ໄດ້ຮັບຜົນດີ.
2. ເຮັດວຽກມີການຊຸກຍູ້, ມີການຕິດຕາມ, ກວດກາສະຫຼຸບ, ຕີລາຄາດ້ານດີ, ດ້ານອ່ອນ ແລະ ມີການຖອດ ຖອນບົດຮຽນໃນແຕ່ລະໄລຍະ.
3. ປະຕິບັດລະບອບລາຍງານສ່ອງແສງປະຈໍາອາທິດ, ປະຈໍາເດືອນ, 3 ເດືອນ, 6 ເດືອນ ແລະ 1 ປີ ເພື່ອ ແລະລາຍງານສະພາບການຈັດຕັ້ງປະຕິບັດວຽກງານຂອງຄະນະໂຄສະນາອົບຮົມແຂວງໃຫ້ຄະນະປະຈໍາພັກແຂວງຄະນະໂຄສະນາອົບຮົມສູນກາງພັກ ເປັນປົກກະຕິ.

ຫມວດທີ VI ບົດບັນຍັດສຸດທ້າຍ

ມາດຕາ 13: ງົບປະມານ ແລະ ຕາປະທັບ. 

ຄະນະໂຄສະນາອົບຮົມແຂວງ ມີງົບປະມານ ແລະ ຕາປະທັບ ເພື່ອຮັບໃຊ້ການເຄື່ອນໄຫວວຽກງານທາງລັດຖະ ການຕາມລະບຽບກົດຫມາຍຄືກັບພະແນກການ, ອົງການອື່ນໆ ຢູ່ຂັ້ນແຂວງ.

ມາດຕາ 14: ການຈັດຕັ້ງປະຕິບັດ. 

ຄະນະບໍລິຫານງານພັກ, ອົງການປົກຄອງແຂວງ, ຄະນະໂຄສະນາອົບຮົມແຂວງ, ບັນດາພະແນກການ ແລະ ອົງການທຽບເທົ່າຂັ້ນແຂວງ, ອົງການປົກຄອງເມືອງ, ພາກສ່ວນທີ່ກ່ຽວຂ້ອງ ຈົ່ງຮັບຮູ້ ແລະ ຈັດຕັ້ງປະຕິບັດ ມະຕິຕົກລົງສະບັບນີ້ຢ່າງເຂັ້ມງວດ.

ມາດຕາ 15: ຜົນສັກສິດ. 

ມະຕິຕົກລົງສະບັບນີ້ ປ່ຽນແທນມະຕິຕົກລົງ, ສະບັບເລກທີ 481 /ຄປຈຂ ຫພ, ລັງວັນທີລົງວັນທີ 30 ກໍລະກົດ 2014 ແລະ ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.

ຕາງຫນ້າຄະນະປະຈໍາພັກແຂວງ 

ເລຂາພັກແຂວງ