ຝຶກອົບຮົມບໍາລຸງ-ຍົກລະດັບ ທິດສະດີ-ແນວທາງການເມືອງຂອງພັກ

ໃນວັນທີ 13 ສິງຫາ 2024, ຄະນະໂຄສະນາອົບຮົມແຂວງຫົວພັນ ໄດ້ຈັດພິທີເປີດຝຶກອົບຮົມບໍາລຸງ-ຍົກລະດັບ ທິດສະດີ – ແນວທາງການເມືອງຂອງພັກ, ເຊິ່ງພິທີດັ່ງກ່າວໄດ້ເປີດຂຶ້ນຢ່າງເປັນທາງການໃນເວລາ 8 : 30 ເຊົ້າ. ທີ່ຫ້ອງປະຊຸມຊັ້ນ V ຕືກສຳນັກງານອົງການປົກຄອງແຂວງ ໃຫ້ກຽດເປັນປະທານຂອງທ່ານ ນາງ ລ້ອງຄຳ ພອນມີໄຊ ຄະນະປະຈໍາພັກແຂວງ, ຫົວຫນ້າຄະນະຈັດຕັ້ງແຂວງ, ມີນັກສໍາມະນາ ກອນທີ່ມາຈາກພະແນກການ, ກົມກອງອ້ອມຂ້າງແຂວງທັງໝົດຈໍານວນ 45 ທ່ານ, ຍິງ 19 ທ່ານ.

ການຝຶກອົບຮົມໃນຄັ້ງນີ້ແມ່ນເພື່ອເປັນການຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍສະເພາະແມ່ນການສ້າງ, ການຫັນປ່ຽນຈິນຕະນາການທາງດ້ານທິດສະດີແນວທາງຂອງພັກໃຫ້ແກ່ພະນັກງານ – ລັດຖະກອນໃນຂອບເຂດທົ່ວປະເທດເວົ້າລວມ – ເວົ້າສະເພາະກໍ່ຄືແຂວງຫົວພັນພວກເຮົາໃຫ້ປະກົດຜົນເປັນຈິງ ເພື່ອເຮັດໃຫ້ ພະນັກງານ – ລັດຖະກອນ ມີຄວາມຮັບຮູ້ເຂົ້າໃຈຄວາມຮູ້ພື້ນຖານກ່ຽວກັບລັດທິມາກ – ເລນິນ, ມູນເຊື້ອຂອງຊາດລາວ ການສ້າງ ແລະ ບູລະນະລະບອບປະຊາທິປະໄຕປະຊາຊົນຕາມທິດສັງຄົມນິຍົມແລະ ຕາມແນວທາງປ່ຽນແປງໃຫມ່ຢ່າງມີຫຼັກ ການຂອງພັກ, ເນື້ອໃນທີ່ນໍາມາຝຶກອົບຮົມຄັ້ງນີ້ມີ: ຄວາມຮູ້ພື້ນຖານກ່ຽວກັບລັດທິມາກ – ເລນິນ, ວິທີວັດຖຸນິນຍົມສັດ ຈະວິພາກ, ເສີມຂະຫຍາຍມູນເຊື້ອຂອງຊາດລາວ, ສ້າງ ແລະ ບູລະນະລະບອບປະຊາທິປະໄຕປະຊາຊົນ ຕາມທິດສັງຄົມນິຍົມ, ແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ, ແນວທາງເສດຖະກິດຂອງພັກ, ການຫັນເປັນອຸດສາຫະກໍາ ແລະ ທັນສະໄໝຢູ່ປະເທດເຮົາ, ການພັດທະນາເສດຖະກິດຕິດພັນກັບການພັດທະນາວັດທະນະທໍາ – ສັງຄົມ ແລະ ສິ່ງແວດລ້ອມ, ສ້າງລັດແຫ່ງກົດໝາຍເທື່ອລະກ້າວພາຍໃຕ້ການນໍາພາຂອງພັກເຮົາ, ແນວທາງປ້ອງກັນຊາດ – ປ້ອງກັນ ຄວາມສະຫງົບທົ່ວປວງຊົນຮອບດ້ານ, ແນວທາງການຕ່າງປະເທດທີ່ສ້າງສັນ – ການພົວພັນເພື່ອນມິດຍຸດທະສາດ, ສັງ ຄົມສາມັກຄີປອງດອງແມ່ນບໍ່ເກີດແຫ່ງກໍາລັງແຮງ ຂອງການປົກປັກຮັກສາ ແລະ ພັດທະນາປະເທດຊາດ.

ແນໃສ່ເຮັດໃຫ້ນັກສໍາມະນາກອນທີ່ເຂົ້າຝຶກອົບຮົມໃນຄັ້ງນີ້ໄດ້ເຂົ້າໃຈ, ກໍາແຫນ້ນຕໍ່ແນວທາງການປ່ຽນແປງໃໝ່ຂອງພັກເຮົາ, ແລ້ວນໍາໄປໃຊ້ເຂົ້າໃນການຈັດຕັ້ງປະຕິບັດຫນ້າທີ່ວິຊາສະເພາະກໍ່ຄືຫນ້າທີ່ການເມືອງທີ່ພັກ-ລັດຂັ້ນເທິງມອບໝາຍໃຫ້ເກີດດອກອອກຜົນ ແລະ ສອດຄ່ອງກັບສະພາບໃນປັດຈຸບັນ.

ການຝຶກອົບຮົມໃນຄັ້ງນີ້ແມ່ນໃຊ້ເວລາ10 ວັນເຕັມຈຶ່ງສໍາເລັດ