ໃນວັນທີ 4 – 6 ທັນວາ 2024 ທີຜ່ານມານີ້ ຄະນະໂຄສະນາອົບຮົມແຂວງ ຮ່ວມກັບ ກອງບັນຊາການ ປກສ ແຂວງ ໄດ້ສົມທົບກັບຫ້ອງວ່າການເມືອງວຽງໄຊ ລົງເຄື່ອນໄຫວວຽກງານໂຄສະນາເຄື່ອນທີ ຢູ່ເມືອງວຽງໄຊ ແຂວງຫົວພັນ ເຊີ່ງນຳພາໂດຍ ທ່ານ ສຸກເສີມ ຢາງຈາງ ຮອງຫົວໜ້າຄະນະໂຄສະນາອົບຮົມແຂວງ, ຮທ ນາງ ປາວາງ ປກສ ແຂວງ, ພ້ອມດ້ວຍທີມງານ, ມີຄະນະພັກ, ນາຍບ້ານ, ອົງການຈັດຕັ້ງຕ່າງໆຂອງ ບ້ານ, ມີເຖົ້າແກ່ແນວໂຮມບ້ານ ແລະ ປະຊາຊົນເຂົ້າຮ່ວມຮັບຟັງທັງໝົດ 235 ຄົນ, ຍີງ 75 ຄົນ.

      ການລົງເຮັດວຽກໃນຄັ້ງນີ້ ໄດ້ນໍາເອົາເອກະສານ, ສາລະຄະດີຜົນຮ້າຍຂອງຢາເສບຕິດ ເອກະສານວ່າດ້ວຍການສ້າງບ້ານປອດຢາເສບຕິດ ແລະ ຜ່ານກົດຫມາຍວ່າດ້ວຍຢາເສບຕິດ ມາດຕາ 76 ແລະ 146 ລົງໂຄສະນາເຜີຍແຜ່ ໃຫ້ 5 ບ້ານເປົ້າຫມາຍຂອງເມືອງວຽງໄຊ ແຂວງຫົວພັນ ຄື : ບ້ານ ດ່ານໄຊ, ນາຢາງ, ອ່າງສັ່ງ, ນາຄາວ ແລະ ບ້ານ ມັ້ນ, ເພື່ອເຮັດໃຫ້ປະຊາຊົນຮັບຮູ້, ເຂົ້າໃຈເຖິງປະເພດ, ຜົນຮ້າຍຂອງຢາເສບຕິດແລະ ຄວາມຜິດທາງກົດຫມາຍອາຍາ ໃນຖານທີ່ມີຢາເສບຕິດໄວ້ຄອບຄອງ – ຈໍາຫນ່າຍ ແລະ ບັນດາມາດຖານ, ເງື່ອນໄຂໃນການສ້າງຄອບຄົວ ແລະ ບ້ານປອດຢາເສບຕິດ.

     ຕອນທ້າຍ ທ່ານ ສຸກເສີມ ຢາງຈາງ ຮອງຫົວຫນ້າຄະນະໂຄສະນາອົບຮົມແຂວງ. ມີບາງ ຄໍາເຫັນໂອ້ລົມ, ຊີ້ແຈງຕໍ່ຊາວບ້ານ ເພື່ອເຮັດໃຫ້ເຂົາເຈົ້າໄດ້ຮັບຮູ້ ແລະ ຊາບຊຶມເຖິງຜົນຮ້າຍຂອງ ຢາເສບຕິດ, ແລ້ວນໍາໄປຫມູນໃຊ້ເຂົ້າໃນການດໍາລົງຊີວິດ, ເຮັດໃຫ້ຊີວິດການເປັນຢູ່ຂອງຊາວບ້ານ ນັບມື້ຫ່າງໄກຈາກຢາເສບຕິດທຸກຊະນິດ, ປະກົດການຫຍໍ້ທໍ້ໃນສັງຄົມ ເວົ້າສະເພາະກໍ່ຄືບ້ານນັບມື້ ນັບຫຼຸດຫນ້ອຍຖອຍລົງເຖິງຂັ້ນຫມົດໄປແລ້ວກາຍເປັນບ້ານປອດຢາເສບຕິດໃນອະນາຄົດ.