ວັນທີ 25 ກໍລະກົດ 2024 ນີ້, ຢູ່ທີ່ເຮືອນຮັບແຂກຫົວພັນ-ແທັງຮວ່າ, ຄະນະຄຸ້ມຄອງຊາວຫວຽດນາມຮ່ວມກັບ ການນໍາແຂວງຫົວພັນ, ນຳໂດຍ ສະຫາຍ ປອ ຄໍາແພງ ໄຊສົມແພງ ກຳມະການສູນກາງພັກ ເລຂາພັກແຂວງເຈົ້າແຂວງຫົວພັນ ໄດ້ໄຫວ້ອາໄລຕໍ່ການຈາກໄປຂອງສະຫາຍ ຫງວຽນ ຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ.
ຄະນະບໍລິຫານງານພັກ ແຂວງຫົວພັນ ມີຄວາມໂຊກເສົ້າສະຫຼົດໃຈຢ່າງສຸດຊຶ້ງຕໍ່ການຈາກໄປບໍ່ມີວັນຫວນກັບຂອງ ສະຫາຍ ຫງວຽນຝູຈ້ອງ ອະດີດເລຂາທິການໃຫຍ່ຄະນະບໍລິຫານງານສູນກາງພັກ ແຫ່ງ ສສ ຫວຽດນາມ ຜູ້ທີ່ແສນເຄົາລົບຮັກ ຂອງປະຊາຊົນບັນດາເຜົ່າຊາວຫວຽດນາມ ໃນວັນທີ 19 ກໍລະກົດ 2024.
ຕາງໜ້າຄະນະບໍລິຫານງານພັກແຂວງ, ສະພາປະຊາຊົນແຂວງ, ແນວລາວສ້າງຊາດແຂວງ ແລະປະຊາຊົນບັນດາເຜົ່າແຂວງຫົວພັນ ຂໍສະແດງຄວາມເສົ້າສະຫຼົດໃຈ, ອາໄລອາວອນມາຍັງ ພັກ-ລັດຖະບານ ແລະ ປະຊາຊົນບັນດາເຜົ່າຫວຽດນາມ, ຕະຫຼອດຮອດຄອບຄົວ, ຍາດພີ່ນ້ອງຂອງ ສະຫາຍ ຫງວຽນ ຟູຈ້ອງ ອະດີດເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດແຫ່ງ ສສ ຫວຽດນາມ, ໃນຕະຫຼອດຊີວິດຂອງ ສະຫາຍໄດ້ອຸທິດໃຫ້ແກ່ການເຄື່ອນໄຫວປະຕິວັດ ແລະ ພາລະກິດປ່ຽນແປງໃໝ່, ໄດ້ປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ- ຫວຽດນາມ, ຫວຽດນາມ-ລາວ ຕະຫຼອດໄປ.
