ກົມໂຄສະນາ ຄະນະໂຄສະນາອົບຮົມສູນກາງພັກ ແລະ ຄະນະໂຄສະນາອົບຮົມແຂວງຫົວພັນ ລົງເຄື່ອນໄຫວເກັບກໍາຂໍ້ມູນ ຢູ່ແຂວງຫົວພັນ

ໃນລະຫວ່າງວັນທີ 12 – 14 ສິງຫາ 2024ນີ້ ທ່ານ ອານົງສັກ ອິນທະວົງ ຫົວຫນ້າກົມໂຄສະນາ ຄະນະໂຄສະນາອົບຮົມສູນກາງພັກ ແລະ ທ່ານ ນາງ ຄອນສີ ອິນທະວີ ຮອງຫົວໜ້າຄະນະໂຄສະນາອົບແຂວງຫົວພັນ ພ້ອມດ້ວຍທິມງານໄດ້ລົງ ເຄື່ອນໄຫວເກັບກໍາຂໍ້ມູນ ສໍາພາດການນໍາຂອງແຂວງ ແລະ ບາງເມືອງ ຢູ່ແຂວງຫົວພັນ.

ການລົງເຄື່ອນໄຫວເຮັດວຽກຄັ້ງນີ້ ໄດ້ເຂົ້າຮ່ວມເຮັດວຽກສໍາພາດ ທ່ານເຈົ້າເມືອງ ເມືອງແອດ ແລະ ເມືອງສົບເບົາ ເຊິ່ງເປັນເມືອງທົດລອງຂອງແຂວງໃນການດໍາເນີນກອງປະຊຸມ 3 ຂັ້ນ, ຕີລາຄາສະພາບແນວຄິດ ຂອງສະມາຊິກພັກ, ພະນັກງານ ແລະ ປະຊາຊົນ ພາຍໃນເມືອງ ຕໍ່ບົດບາດການນໍາພາຂອງພັກ ແລະ ການຄຸ້ມຄອງ ຂອງລັດ, ການພັດທະນາ ຂອງເມືອງໃນໄລຍະທ້າຍສະໄຫມ ມີອັນພົ້ນເດັ່ນ, ບັນຫາຫຍຸ້ງຍາກ ແລະ ສິ່ງທ້າທາຍ ທີ່ຈະຕ້ອງໄດ້ສຸມໃສ່ແກ້ໄຂ, ບັນຫາກະທົບຕໍ່ແນວຄິດ ທີ່ພົ້ນເດັ່ນ ແລະ ວີທີແກ້ໄຂໃນຕໍ່ຫນ້າ, ຈາກນັ້ນທີມງານ ຂອງສູນກາງ, ແຂວງ ແລະ ເມືອງຍັງໄດ້ລົງເກັບກໍາຂໍ້ມູນ ສໍາພາດ ຄອບຄົວຕົວແບບໃນການຜະລິດເປັນສີນຄ້າດ້ານ ຫັດຖະກໍາ ແຕ້ມທຽນ 3 ເອື້ອຍນ້ອງ ຢູ່ບ້ານ ວຽງຮັງ ເມືອງສົບເບົາ ແລະ ຄອບຄົວຕົວແບບ ໃນການຜະລິດ ເສື່ອ, ໝອນ ແລະ ຜ້ານັ່ງ ຢູ່ ບ້ານລ້ອງກຸ່ ເມືອງແອດ ແຂວງຫົວພັນ.

ພ້ອມນັ້ນທາງທີມງານຍັງໄດ້ ເຂົ້າຮ່ວມເຮັດວຽກ, ເກັບກໍາຂໍ້ມູນ ແລະ ສໍາພາດ ທ່ານເຈົ້າແຂວງ, ຮອງເລຂາພັກແຂວງ ກ່ຽວກັບຜົນສໍາເລັດອັນພົ້ນເດັ່ນ ທີ່ແຂວງຍາດມາໄດ້ໃນໄລຍະເຄິ່ງສະໄໝ, ບັນຫາທີ່ຈະຕ້ອງສຸມໃສ່ແກ້ ໃນໄລຍະທ້າຍສະໄຫມ ແລະ ການກະກຽມດໍາເນີນກອງປະຊຸມໃຫ່ຍ 3 ຂັ້ນຂອງພັກ ແລະ ການກະກຽມດ້ານບຸກ ຄະລາກອນໃນກອງປະຊຸມ 3 ຂັ້ນ ຂອງແຂວງ, ຕີລາຄາສະພາບແນວຄິດ ຂອງສະມາຊິກພັກ, ພະນັກງານ ແລະ ປະຊາຊົນ ພາຍໃນແຂວງ ໃນເງື່ອນໄຂທີ່ປະເທດພວກເຮົາພົບຄວາມຫຍຸ້ງຍາກດ້ານເສດຖະກິດອັດຕາເງິນເຟີ້, ຄ່າ ຄອງຊີບສູງ ແລະ ວິທີແກ້ໄຂໃນຕໍ່ຫນ້າ.