ການນຳແຂວງຫົວພັນ ວາງພວງມາລາ ໂອກາດວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ
ໃນຕອນເຊົ້າວັນທີ 22 ມີນາ 2025 ການນຳແຂວງຫົວພັນ ເຊິ່ງນຳໂດຍ ສະຫາຍ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫົວພັນ, ພ້ອມດ້ວຍຄະນະບໍລິຫານງານພັກແຂວງ, ບັນດາພະແນກການ ໄດ້ເຂົ້າວາງພວງມາລາ ຢູ່ອະນຸສາວະລີນັກຮົມນິລະນາມ ແລະ ວາງກະຕ່າດອກໄມ້ ຢູ່ຕໍ່ໜ້າຮູບຫລໍ່ຂອງ ປະທານ ໄກສອນ ພົມວິຫານ ເນື່ອງໃນໂອກາດສະເຫລີມສະຫລອງ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ.
ທັງນີ້ ກໍ່ເພື່ອຈາລຶກນຶກເຖິງຄຸນງາມຄວາມດີຂອງນັກຮົບປະຕິວັດທີ່ ເສຍສະຫຼະຊີວິດເລືອດເນື້ອ ເຫື່ອແຮງ ໃນພາລະກິດຕໍ່ສູ້ປົດປ່ອຍປະເທດຊາດອອກຈາກແອກປົກຄອງຂອງພວກຈັກພັດຜູ້ຮຸກຮານ,ທັງເປັນການສະແດງເຖິງຄວາມເຄົາລົບຮັກ,ຄວາມກະຕັນຍູຮູ້ບຸນຄຸນ,ສັນລະເສີນຄຸນງາມຄວາມດີ ແລະຜົນງານອັນໃຫຍ່ຫຼວງ ຂອງທ່ານຜູ້ນຳ ທີ່ໄດ້ອຸທິດເພື່ອຊາດ ແລະ ການປະຕິວັດ, ປະທານ ໄກສອນ ພົມວິຫານ ແລະ ຜູ້ນຳຮຸ່ນທຳອິດ ເປັນຜູ້ນຳພາ ທີ່ປີຊາສາມາດ ສະຫຼາດສ່ອງໃສ ນຳພາ ສ້າງຕັ້ງພັກປະຊາຊົນ ປະຕິວັດລາວ ໃນວັນທີ 22 ມີນາ 1955, ເອົາໃຈໃສ່ຕໍ່ວຽກງານແນວລາວສ້າງຊາດ ອົງການຈັດຕັ້ງມະຫາຊົນຕ່າງໆ, ຖືເອົາກຳລັງແຮງຂອງມະຫາຊົນເປັນກົກ, ນຳພາກອງທັບ ແລະ ປະຊາຊົນລາວບັນດາເຜົ່າລຸກຂຶ້ນຕໍ່ສູ້ ປົດປ່ອຍປ່ອຍປະເທດຊາດ ອອກຈາກແອກປົກຄອງຂອງຈັກະພັດລ່າເມືອງຂຶ້ນທັງເກົ່າ ແລະ ໃໝ່, ຈົນສາມາດ ປົດປ່ອຍ ແລະ ສະຖາປານາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ແລະ ສືບຕໍ່ປະຕິບັດ ແນວທາງການປ່ຽນແປງໃໝ່ຂອງພັກ,ສ້າງບາດລ້ຽວໃໝ່ໃຫ້ແກ່ການສ້າງ ແລະ ເສີມຂະຫຍາຍລະບອບປະຊາທິປະໄຕປະຊາຊົນລາວ, ນຳພາໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ, ປະຊາຊົນມີຢູ່ມີກິນ, ປະເທດຊາດມີຄວາມຮັ່ງມີ ແລະ ເຂັ້ມແຂງຄືໃນທຸກວັນນີ້.
