ກອງປະຊຸມ

ດໍາເນີນບັ້ນຊີວິດການເມືອງ ກ່ຽວກັບ 3 ວັນປະຫວັດສາດຢູ່ແຂວງຫົວພັນ

         ໃນຕອນເຊົ້າຂອງວັນທີ 13 ກຸມພາ 2025  ຢູ່ທີສະໂມສອນໃຫຍ່ຂອງແຂວງຫົວພັນ. ໄດ້ຈັດກອງປະຊຸມດໍາເນີນບັ້ນຊີວິດການເມືອງ ກ່ຽວກັບ 3 ວັນປະຫວັດສາດຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ທີ່ເຄົາລົບຮັກ ຄົບຮອບ 105 ປີ, ໃຫ້ກຽດເຂົ້າຮ່ວມເປັນປະທານຂອງ ທ່ານ ພຸດພັນ ແກ້ວວົງໄຊ ຄະນະປະຈໍາພັກແຂວງ, ຮອງເຈົ້າແຂວງແຂວງຫົວພັນ, ມີບັນດາທ່ານການນໍາຂອງແຂວງ, ຫົວໜ້າດ, ຮອງຫົວໜ້າພະແນການ, ຕາງໜ້າສອງກໍາລັງປ້ອງກັນຊາດ – ປ້ອງກັນຄວາມສະຫງົບ, ຕະຫຼອດຮອດພະນັກງານ-ສະມາຊິກພັກທຸກພາກສ່ວນອ້ອມຂ້າງແຂວງເຂົ້າຮ່ວມ.

ຈຸດປະສົງເພື່ອເປັນການຫວນຄືນມູນເຊື້ອແຫ່ງການກໍ່ຕັ້ງ ແລະ ເຕີບໃຫຍ່ຂະຫຍາຍຕົວ ຂອງພັກປະຊາຊົນປະຕິວັດລາວ ທີ່ມີກຽດສະຫງ່າ ຕະຫຼອດໄລຍະ 70 ປີຜ່ານມາ, ກໍ່ຄືການທົບທວນມູນເຊື້ອອັນສະຫງ່າງາມແຫ່ງການຕໍ່ສູ້ປົດປ່ອຍຊາດ, ພະລາກິດປົກປັກຮັກສາແລະ ສ້າງສາພັດທະນາປະເທດຊາດໃນຕະຫຼອດໄລຍະ 50 ປີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທັງເປັນການລະນຶກ ແລະ ສະແດງຄວາມກະຕັນຍູຮູ້ບຸນຄຸນ, ຈົດຈໍາ,ຈາລຶກຜົນງານຄຸນງາມຄວາມດີ ຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ, ສຶກສາອົບຮົມພະນັກງານສະມາຊິກພັກ, ທະຫານ-ຕໍາຫຼວດຕະຫຼອດຮອດປະຊາຊົນລາວບັນດາເຜົ່າ ແລະ ຊັ້ນຄົນຕ່າງໆໃຫ້ຮັບຮູ້ເຂົ້າໃຈເຊື່ອມຊຶມທາດແທ້ມູນເຊື້ອອັນດີງານຂອງພັກເຫັນແຈ້ງຜົນສໍາເລັດຜົນງານອັນໃຫຍ່ຫຼວງຂອງການປົກປັກຮັກສາແລະສ້າງສາພັດທະນາປະເທດຊາດ, ສຶກສາຮໍ່າຮຽນເຮັດຕາມແບບຢ່າງຄຸນສົມບັດສິນທໍາປະຕິບັດ ຂອງປະທານ ໄກສອນ ພົມວິຫານ, ແນໃສ່ເພີ່ມທະວີຄວາມເປັນແບບຢ່າງນໍາໜ້າ, ຍົກສູງຄວາມຮັບຜິດຊອບເສີມຂະຫຍາຍມະນະຈິດປະຕິບັດບຸກບືນເຮັດລ້ອນໜ້າທີ່ວຽກງານທີ່ພັກ – ລັດມອບໝາຍໃຫ້, ເຊີດຊູກຽດແລະ ອິດທິພົນບົດບາດຂອງພັກໃຫ້ສູງເດັ່ນຂຶ້ນຢ່າງບໍ່ຢຸດຢັ້ງ, ຜົນສໍາເລັດຂອງການປົກປັກຮັກສາ ແລະ ສ້າງສາພັດທະນາປະເທດຊາດພາຍໃຕ້ການນໍາພາຂອງພັກ, ຍູ້ແຮງການແຂ່ງຂັນຮັກຊາດ ແລະ ພັດທະນາສ້າງຜົນງານຂໍ່ານັບຮັບຕ້ອນວັນບຸນໃຫຍ່ທີ່ສໍາຄັນຂອງພັກ-ຂອງຊາດ ພາຍໃນປີ 2025 ໃຫ້ມີຄວາມໝາຍ ແລະ ເປັນຂະບວນຟົດຟື້ນ.

ການດໍາເນີນຊີວິດການເມືອງຄັ້ງນີ້ ແມ່ນບາດກ້າວໜຶ່ງທີ່ມີຄວາມໝາຍ, ຄວາມສໍາຄັນໃນການສຶກສາອົບຮົມການເມືອງແນວຄິດໃຫ້ພະນັກງານ – ສະມາຊິກພັກ ໃຫ້ຮັບຮູ້ເຂົ້າໃຈຕໍ່ການກະກຽມສະເຫຼີມສະຫຼອງ 3 ວັນປະຫວັດສາດ ຂອງ ພັກ-ຊາດ ພາຍໃນປີ 2025 ມໍ່ໆນີ້.