ກອງປະຊຸມໃຫຍ່ ຜູ້ແທນອົງຄະນະພັກເມືອງແອດ ຄັ້ງທີ VI
ກອງປະຊຸມໃຫຍ່ຜູ້ແທນອົງຄະນະພັກເມືອງແອດ ຄັ້ງທີ VI ໄດ້ອັດລົງດ້ວຍຜົນສຳເລັດ ພາຍຫຼັງທີ່ດຳເນີນມາເປັນເວລາ 1 ວັນເຄີ່ງ (ວັນທີ 18-19 ມີນາ 2025) ຢູ່ຫ້ອງປະຊຸມກອງບັນຊາການຕຳຫຼວດເມືອງ ພາຍໃຕ້ການເປັນປະທານ ຂອງ ສະຫາຍ ວັນເພັດ ສີບຸນແສງ ເລຂາຄະນະບໍລິຫານງານພັກເມືອງ, ເຈົ້າເມືອງແອດ. ເປັນກຽດເຂົ້າຮ່ວມ ຂອງສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ. ໂດຍມີຜູ້ແທນສົມບູນ 133 ສະຫາຍ, ຍິງ 7 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກຈໍານວນ 2.120 ສະຫາຍ, ຍິງ 430 ສະຫາຍ. ບັນດາສະຫາຍຜູ້ແທນສົມບູນທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສະຕິປັນຍາຂອງຕົນເຂົ້າໃນການຄົ້ນຄ້ວາປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ວາງໄວ້. ໂດຍຜູ້ແທນກອງປະຊຸມໄດ້ເປັນເອກະສັນເລືອກຕັ້ງເອົາ ສະຫາຍ ວັນເພັດ ສີບຸນແສງ ເປັນເລຂາຄະນະບໍລິຫານງານພັກເມືອງແອດ ຊຸດໃໝ່.
ກອງປະຊຸມໃຫຍ່ ໄດ້ລົງປະຊາມະຕິເປັນເອກະພາບຮັບຮອງເອົາບັນດາເນື້ອໃນ ສໍາຄັນຄື: ຜົນສຳເລັດວຽກງານຮອບດ້ານ, ດ້ານອ່ອນຄົງຄ້າງ, ສາເຫດ, ບົດຮຽນໃນການນໍາພາ, ຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ໄລຍະ 5 ປີຜ່ານມາ ຕາມທີ່ໄດ້ຍົກຂື້ນຕາມບົດລາຍງານການເມືອງ ແລະ ບົດສໍາຫຼວດນໍາພາຂອງຄະນະບໍລິຫານພັກເມືອງ ຊຸດທີ V ທີ່ສະເໜີຕໍ່ກອງປະຊຸມໃຫຍ່. ພ້ອມນັ້ນ, ກອງປະຊຸມເຫັນດີເປັນເອກະພາບຮັບຮອງເອົາຄາດໝາຍທິດທາງແຜນການຈຸດສຸມ ແລະ ບັນດາຄາດໝາຍທີ່ກໍານົດໄວ້ໃນແຜນພັດທະນາເສດຖະກິດສັງຄົມ 5 ປີ (2025-2029) ຂອງເມືອງເປັນຕົ້ນແມ່ນ: ຍົກສູງຄວາມຮັບຜິດຊອບໃນຄະນະພັກສ້າງພັກໃຫ້ມີຄວາມປອດໃສເຂັ້ມແຂງໜັກແໜ້ນ, ຮັບປະກັນບົດບາດເປັນແກນນໍາໃນລະບົບການເມືອງຂອງພັກເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍເທື່ອລະກ້າວເຮັດໃຫ້ເມືອງແອດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍຢ່າງໜັກແໜ້ນ; ສູ້ຊົນເຮັດໃຫ້ເສດຖະກິດຂອງເມືອງຂະຫຍາຍຕົວຕໍ່ເນື່ອງດ້ວຍການນໍາໃຊ້ 4 ທ່ານແຮງຕົ້ນຕໍຄື: ການປູກຝັງ, ການລ້ຽງສັດ, ການທ່ອງທ່ຽວ ແລະ ການຄ້າຊາຍແດນ ລວມຍອດຜະລິດຕະພັນພາຍໃນເມືອງGDP ໃຫ້ບັນລຸໄດ້ 220,24 ຕື້ກີບ, ລາຍຮັບສະເລ່ຍໃຫ້ໄດ້ 7,6 ລ້ານກີບ ແກ້ຄວາມທຸກຍາກຂອງປະຊາຊົນບັນດາເຜົ່າຕາມລໍາດັດ 348/ລບ ຮອດປີ 2029 ໃຫ້ຍັງເຫຼືອບໍ່ເກີນ 29,86% ຂອງຄົວເຮືອນໃນທົ່ວເມືອງ; ສຸມໃສ່ພັດທະນາດ້ານວັດທະນະທຳ-ສັງຄົມ ດ້ວຍການກໍ່ສ້າງສັບພະຍາກອນມະນຸດຂັ້ນຕ່າງໆ ເພື່ອຍົກລະດັບຄວາມຮູ້ຄວາມສາມາດທາງດ້ານການເມືອງ, ຄຸນສົມບັດ, ສິນທໍາປະຕິວັດ, ລະດັບວິຊາສະເພາະຍົກສູງຄຸນນະພາບການສືກສາໃຫ້ສູງຂື້ນ ຂະຫຍາຍຕາໜ່າງການບໍລິການສາທາລະນາສຸກໃຫ້ທົ່ວເຖີງ ແລະ ດີຂື້ນກ່ວາເກົ່າ, ປະຕິບັດນະໂຍບາຍທົ່ວສັງຄົມຕາມນະໂຍບາຍລວມ ຂອງລັດ ແລະ ຄວາມສາມາດຕົວຈິງຂອງເມືອງ; ສຶບຕໍ່ພົວພັນຮ່ວມມືກັບຕ່າງປະເທດ, ອົງການຈັດຕັ້ງສາກົນບົນພື້ນຖານແນວທາງການຕ່າງປະເທດ ຂອງພັກ ແລະ ຂອບເຂດຄວາມຮັບຜິດຊອບຂອງເມືອງເຂົ້າສູ່ລວງເລີກ ແລະ ມີປະສິດທິຜົນ.
ກອງປະຊຸມໃຫຍ່ຍັງໄດ້ຮັບຟັງການລາຍງານ ແລະ ປະກອບຄໍາເຫັນຈາກບັນດາຄອບຄົວຕົວແບບ, ການປະກອບຄໍາເຫັນຂອງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນຄວາມເປັນເອກະພາບຕໍ່ບົດລາຍງານການເມືອງທິດທາງແຜນການວຽກງານຮອບດ້ານ ແລະ ສ່ອງແສງເຖີງຜົນສໍາເລັດແຫ່ງການຈັດຕັ້ງຜັນຂະຫຍາຍໜໍ່ແໜງການຜະລິດຂອງຕົນໃຫ້ຂະຫຍາຍຕົວເປັນວົງກ້ວາງຫຼາກຫຼາຍຂືີ້ນກ່ວາເກົ່າ.
ຈາກນັ້ນ, ຜູ້ແທນກອງປະຊຸມໃຫຍ່ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກເມືອງແອດຊຸດໃໝ່ ເຊີ່ງປະກອບມີ 27 ສະຫາຍ, ຍີງ 5 ສະຫາຍ ແລະ ກອງປະຊຸມປະຖົມມະລຶກໄດ້ເລືອກເອົາ ສະຫາຍ ວັນເພັດ ສີບຸນແສງ ເປັນເລຂາຄະນະບໍລິຫານງານພັກເມືອງແອດ , ເລືອກຕັ້ງເອົາສະຫາຍ ວົງພັນ ຈັນງາຄໍາ ເປັນຮອງເລຂາຄະນະບໍລິຫານງານພັກເມືອງແອດ ແລະ ສະຫາຍ ນ. ມະນີວອນ ສອນມະນີ ເປັນຮອງເລຂາຄະນະບໍລິຫານງານພັກເມືອງແອດ. ເລືອກຕັ້ງເອົາ ສະຫາຍ ອອດ ວົງຄໍາເທ່ ເປັນປະທານກວດກາພັກ-ລັດ ເມືອງ, ສະຫາຍ ພັນສະຫວັດ ດວງສີ ແລະ ສະຫາຍ ທອນ ມະນີສອນ ເປັນຮອງປະທານກວດກາພັກ-ລັດ ເມືອງ. ກອງປະຊຸມຍັງໄດ້ເລືອກເອົາຕົວແທນອົງຄະນະພັກເມືອງແອດໄປຮ່ວມກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ຫົວພັນ ທີ່ຈະໄຂຂື້ນໃນຕໍ່ໜ້າ ຈໍານວນ 18 ສະຫາຍ.
ກອງປະຊຸມໃຫຍ່ເປັນກຽດຢ່າງສູງໄດ້ຮັບຟັງຄໍາໂອ້ລົມ ຂອງສະຫາຍ ຄໍາແພງ ໄຊສົມແພງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ ເຊີ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະບໍລິຫານງານພັກເມືອງແອດ ທີ່ໄດ້ນໍາພາ-ຊີ້ນໍາ, ຄະນະພັກສະມາຊິກພັກ, ພະນັກງານລັດຖະກອນ ແລະ ປະຊາຊົນບັນດາເຜົ່າ ປະຕີບັດໜ້າທີ່ການເມືອງ ຂອງພັກ ໄດ້ເຮັດໃຫ້ເມືອງແອດມີການຂະຫຍາຍຕົວເປັນກ້າວໆມາ. ພ້ອມກັນນີ້, ສະຫາຍຍັງໃຫ້ທິດຊີ້ນໍາແກ່ຄະນະພັກຊຸດໃໝ່ກໍ່ຄືຜູ້ແທນກອງປະຊຸມໃຫຍ່ຈົ່ງສຶບຕໍ່ປັບປຸງແກ້ໄຂບັນດາຈຸດອ່ອນຄົງຄ້າງຜ່ານມາໃຫ້ໝົດໄປເທື່ອລະກ້າວ. ຈາກນັ້ນ, ສະຫາຍ ຍັງໄດ້ໃຫ້ທິດຊີ້ນໍາວຽກງານແຕ່ລະດ້ານໃນທາງສ້າງສັນ ເຊີ່ງການຊີ້ນໍາດັ່ງກ່າວເປັນເຂັມທິດເຍືອງທາງໃຫ້ຄະນະພັກຊຸດໃໝ່ ນໍາໄປຄົ້ນຄ້ວາ ແລະ ໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງໃນຕໍ່ໜ້າ.
ກອງປະຊຸມໃຫຍ່ ຄັ້ງທີ VI ຮຽກຮ້ອງມາຍັງຄະນະພັກທຸກຂັ້ນສະມາຊິກພັກທຸກສະຫາຍ ຕະຫຼອດເຖີງພະນັກງານລັດຖະກອນ, ກໍາລັງປະກອບອາວຸດ, ຜູ້ປະກອບການ ແລະ ປະຊາຊົນບັນດາເຜົ່າໃນທົ່ວເມືອງແອດ ພ້ອມກັນເພີ່ມທະວີຄວາມສາມັກຄີເປັນຈິດໜື່ງໃຈດຽວທຸ່ມເທຄວາມຮູ້, ຄວາມສາມາດຫົວຄິດປະດິດສ້າງສະຕິປັນຍາ ເພື່ອຈັດຕັ້ງຜັນຂະຫຍາຍເນື້ອໃນກອງປະຊຸມໃຫຍ່ຄັ້ງນີ້ໃຫ້ປະກົດເປັນຈິງ ນໍາເອົາການຫັນປ່ຽນທີ່ຕັ້ງໜ້າມາສູ່ຊາວເມືອງແອດບັນດາເຜົ່າຢ່າງບໍ່ຢຸດຢັ້ງ
