ກອງປະຊຸມໃຫຍ່ ຄັ້ງທີ XII ຂອງອົງຄະນະພັກເມືອງວຽງໄຊ
ກອງປະຊຸມໃຫຍ່ຜູ້ແທນອົງຄະນະພັກເມືອງວຽງໄຊ ຄັ້ງທີ XII ໄດ້ອັດລົງດ້ວຍຜົນສຳເລັດ ພາຍຫຼັງທີ່ດຳເນີນມາເປັນເວລາ 1 ວັນເຄີ່ງ (ວັນທີ 6-7 ມີນາ 2025) ທີ່ຖ້ຳຊ້າງລອດ ພາຍໃຕ້ການເປັນປະທານ ຂອງ ສະຫາຍ ນາງ ສວຍເພັດ ທອງສົມບັດ ກຳມະການພັກແຂວງ, ເລຂາພັກເມືອງ, ເຈົ້າເມືອງວຽງໄຊ. ເປັນກຽດເຂົ້າຮ່ວມ ຂອງສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ. ໂດຍມີຜູ້ແທນສົມບູນ 194 ສະຫາຍ, ຍິງ 15 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກຈໍານວນ 2.428 ສະຫາຍ, ແຂກຖືກເຊີນ 50 ສະຫາຍ, ຍິງ 7 ສະຫາຍ. ບັນດາສະຫາຍຜູ້ແທນສົມບູນທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສະຕິປັນຍາຂອງຕົນເຂົ້າໃນການຄົ້ນຄ້ວາປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ວາງໄວ້. ໂດຍຜູ້ແທນກອງປະຊຸມໄດ້ເປັນເອກະສັນເລືອກຕັ້ງເອົາ ສະຫາຍ ນາງ ສວຍເພັດ ທອງສົມບັດ ເປັນເລຂາຄະນະບໍລິຫານງານພັກເມືອງວຽງໄຊ ຊຸດໃໝ່.
ຜູ້ແທນກອງປະຊຸມໃຫ່ຍອົງຄະນະພັກເມືອງວຽງໄຊ ຄັ້ງທີ XII ໄດ້ພ້ອມກັນຄົ້ນຄ້ວາ ແລະ ປະກອບຄຳຄິດຄຳເຫັນໃສ່ຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ. ພ້ອມນັ້ນ, ກໍ່ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ XI ໃນ 5 ປີຜ່ານມາ, ພ້ອມທັງເປັນເອກະສັນກັນຮັບຮອງເອົາລາຍງານການເມືອງ, ທິດທາງ, ແຜນການ 5 ປີໃນຕໍ່ໜ້າ, ນັບແຕ່ປີ 2025 ຮອດປີ 2029 ເຊິ່ງມີເນື້ອໃນຕົ້ນຕໍຄື: ຄະນະພັກແຕ່ລະຂັ້ນຕ້ອງເພີ່ມທະວີການນຳພາເດັດຂາດ, ໂດຍກົງ ແລະ ຮອບດ້ານຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, 2 ວາລະແຫ່ງຊາດ ຖືສຳຄັນການສຶກສາອົບຮົມພົນລະເມືອງໃຫ້ເຊື່ອມຊຶມຢ່າງເລິກເຊິ່ງ ແລະ ເປັນເຈົ້າການເຂົ້າຮ່ວມແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ປັບປຸງກຳລັງປ້ອງກັນຊາດ-ປ້ອງກັນຄວາມສະຫງົບ ແຕ່ຂັ້ນເມືອງລົງຮອດຂັ້ນບ້ານໃຫ້ມີຄວາມເຂັ້ມແຂງໃນທຸກດ້ານ, ເປັນເຈົ້າການຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ເພື່ອໃຫ້ເມືອງມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍທາງດ້ານສັງຄົມ ປະຊາຊົນຍູ່ທ່າງທຳມາຫາກິນ.
ຍົກສູງຄວາມສາມາດນຳພາຂອງພັກ, ປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຮັບປະກັນບົດບາດເປັນແກນນຳໃນລະບົບການເມືອງ, ເພີ່ມທະວີຄວາມສາມັກຄີປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາພາຍໃຕ້ການນຳພາຂອງພັກ, ຫັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍເທື່ອລະກ້າວ, ປັບປຸງແບບແຜນວິທີເຮັດວຽກຂອງຄະນະພັກແຕ່ລະຂັ້ນ ສ້າງໃຫ້ໄດ້ຄວາມເຊື້ອໝັ້ນ ແລະ ການສະໜັບສະໜູນຈາກປະຊາຊົນ, ຫັນລົງກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດ, ວຽກງານ 3 ສ້າງ, ສ້າງບ້ານ ແລະ ກຸ່ມບ້ານພັດທະນາຕາມ 4 ເນື້ອໃນ 4 ຄາດໝາຍ.
ສືບຕໍ່ເອົາການພັດທະນາເສດຖະກິດເປັນໃຈກາງ ແນ່ໃສ່ຂະຫຍາຍກຳລັງການຜະລິດຢ່າງແຂງແຮງ, ຫັນປ່ຽນການຜະລິດແບບທຳມະຊາດໄປສູ່ການຜະລິດເປັນສິນຄ້າ, ຫັນປ່ຽນແບບວິທີການຜະລິດດ້ວຍເຕັກນິກໃໝ່ ປັບປຸງແນວພັນໃຫ້ສາມາດປູກ ແລະ ລ້ຽງໄດ້ດີເໝາະກັບພື້ນທີ່ ແລະ ອາກາດຂອງເມືອງວຽງໄຊ ຄຽງຄູ່ກັບການຮັກສາທຳມະຊາດ ແລະ ສິ່ງແວດລ້ອມພັດທະນາເສດຖະກິດສີຂຽວ ໄປພ້ອມກັບການປັບປຸງລະບົບຄົມມະນາຄົມ, ຂະຫຍາຍຕາຂ່າຍໄຟຟ້າ, ລະບົບໄປສະນີ ໂທລະຄົມມະນາຄົມໄປສູ່ຊົນນະບົດບ່ອນທີ່ມີເງື່ອນໄຂເພື່ອຮັບໃຊ້ໃຫ້ແກ່ການຜະລິດ, ການບໍລິການ, ການທ່ອງທ່ຽວ ແລະ ການສົ່ງເສີມຫັດຖະກຳທີ່ເປັນມູນເຊື້ອຂອງປະຊາຊົນຕິດພັນກັບການສ້າງຕະຫລາດຈຳໜ່າຍໃຫ້ຫຼາຍຂຶ້ນ.
ເອົາໃຈໃສ່ພັດທະນາຊັບພະຍາກອນມະນຸດ ຍົກລະດັບຄຸນນະພາບການສຶກສາໃນທຸກຊັ້ນຮຽນ, ສຸ່ມໃສ່ພັດທະນາຄົນໃຫ້ມີຄວາມຮູ້, ຄວາມສາມາດດ້ານວິຊາສະເພາະ ແລະ ເຕັກນິກວິຊາການ, ໂດຍຖືເອົາວຽກງານສຶກສາ ແລະ ກິລາເປັນໃຈກາງ ປະຕິຮູບການສຶກສາໃຫ້ເຂົ້າສູ່ລ່ວງເລິກ, ປຸກລະດົມຂະບວນການກິລາມວນຊົນດຶງດູດໄວໜຸ່ມອອກຈາກຢາເສບຕິດ; ຍົກລະດັບປັບປຸງຕາໜ່າງສາທາລະນະສຸກເຮັດໃຫ້ປະຊາຊົນໄດ້ຮັບການບໍລິການຢ່າງກ້ວາງຂວາງ, ສ້າງເງື່ອນໄຂໃຫ້ທຸກຄົນມີໂອກາດໄດ້ຮັບການປ້ອງກັນ ແລະ ປິ່ນປົວສຸຂະພາບໃຫ້ແຂງແຮງ; ອະນຸລັກວັດທະນະທຳ, ຮີດຄອງປະເພນີ ແລະ ສະຖານທີ່ປູສະນິຍະສະຖານຕິດພັນກັບການທ່ອງທ່ຽວໄດ້ຮັບການບູລະນະ; ສືບຕໍ່ເກັບກຳຂໍ້ມູນນະໂຍບາຍຕອບບຸນແທນຄຸນ, ອຸດໜູນ ແລະ ສັນລະເສີນຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດໃຫ້ເໝາະສົມ.
ສືບຕໍ່ຍຶດໝັ້ນແນວທາງການຕ່າງປະເທດຂອງພັກ, ເສີມຂະຫຍາຍນ້ຳໃຈມິດຕະພາບ ແລະຄວາມສາມັກຄີບົນພື້ນຖານຫຼັກການເຄົາລົບເອກະລາດ, ອຳນາດອະທິປະໄຕຕ່າງຝ່າຍຕ່າງມີຜົນປະໂຫຍດ; ເພີ່ມທະວີການພົວພັນຮ່ວມມືຮອບດ້ານກັບບັນດາເມືອງຂອງ ສສ ຫວຽດນາມທີ່ມີຊາຍແດນຕິດຈອດກັບເມືອງວຽງໄຊ ເພື່ອດຶງດູດເອົາບົດຮຽນດ້ານຕ່າງໆ ແລະ ທຶນຮອນເຂົ້າໃນການພັດທະນາເມືອງວຽງໄຊຫຼາຍຂື້ນ.
ກອງປະຊຸມໃຫ່ຍໄດ້ຮັບຟັງລາຍງານ ແລະ ການປະກອບຄຳເຫັນຈາກຜູ້ຕາງໜ້າຫຼາຍພາກສ່ວນລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ລາຍງານການເມືອງ, ທິດທາງແຜນການແລະ ວຽກງານຮອບດ້ານຂອງກອງປະຊຸມ; ການລາຍງານ ແລະ ການປະກອບຄຳເຫັນສ່ວນຫລາຍໄດ້ລົງເລິກລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫ່ຍເຂົ້າໃນຂົງເຂດກົມກອງ, ຂະແໜງການຂອງຕົນອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນ. ພ້ອມນີ້, ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ແລະ ເລືອກຕັ້ງເອົາຜູ້ແທນສົມບູນ ແລະ ສຳຮອງໄປຮ່ວມກອງປະຊຸມໃຫ່ຍຄັ້ງທີ XI ຂອງອົງຄະນະພັກແຂວງຫົວພັນ ບົນພື້ນຖານຫລັກການລວມສູນປະຊາທິປະໄຕທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້.
ກອງປະຊຸມຄັ້ງປະຖົມມະລຶກໄດ້ເລືອກຕັ້ງເອົາເລຂາ, ຮອງເລຂາຄະນະບໍລິຫານງານພັກເມືອງ, ປະທານ-ຮອງປະທານກວດກາ ເຊິ່ງເລືອກເອົາ ສະຫາຍ ນ. ສວຍເພັດ ທອງສົມບັດ ເປັນເລຂາຄະນະບໍລິຫານງານພັກເມືອງ, ສະຫາຍ ຄຳພອນ ເພັງສະຫວັດ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ສິງພອນ ທິດສະຫວັນ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ແພງສະໄໝ ມັງມະນີ ເປັນປະທານກວດກາພັກເມືອງ, ສະຫາຍ ໄຟວັນ ສີສົມບັດ ເປັນຮອງປະທານກວດກາພັກເມືອງ, ສະຫາຍ ຄຳລຸນ ແສງສຸລີ ເປັນຮອງປະທານກວດກາພັກເມືອງ.
ໂອກາດນີ້, ກອງປະຊຸມໃຫຍ່ຍັງໄດ້ຮັບຟັງການໂອ້ລົມຈາກສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳຂອງຄະນະພັກຊຸດເກົ່າທີ່ໄດ້ນຳພາ-ຊີ້ນຳ ພະນັກງານ, ສະມາຊິກພັກ, ປະຊາຊົນປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫລາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫວ່ງເປັນໄຍຕໍ່ດ້ານອ່ອນ, ຂໍ້ຄົງຄ້າງເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ຕ້ອງໄດ້ສືບຕໍ່ປັບປຸງ, ແກ້ໄຂ. ຈາກນັ້ນ, ສະຫາຍຍັງໄດ້ໃຫ້ທິດຊີ້ນຳວຽກງານຫຼາຍໆດ້ານໃນທາງທີ່ສ້າງສັນ, ສະຫາຍມີຄວາມເຊື້ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ນຳພາ-ຊີ້ນຳຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກເມືອງວຽງໄຊ ຄັ້ງທີ XII ນີ້ໃຫ້ຍາດໄດ້ຜົນງານ ແລະ ຜົນສຳເລັດຍິ່ງໃຫຍ່ກວ່າເກົ່າ.
ກອງປະຊຸມຮຽກຮ້ອງມາຍັງສະມາຊິກພັກ, ພະນັກງານ, ກຳລັງປະກອບອາວຸດ ແລະ ປະຊາຊົນບັນດາເຜົ່າທົ່ວເມືອງວຽງໄຊ ຈົ່ງພ້ອມກັນເພີ່ມທະວີຄວາມສາມັກຄີເປັນຈິດໜຶ່ງໃຈດຽວ, ທຸ່ມເທຄວາມສາມາດ, ຫົວຄິດປະດິດສ້າງປະກອບສ່ວນເຂົ້າໃນການປະຕິບັດເນື້ອໃນຂອງກອງປະຊຸມໃຫ່ຍທີ່ຮັບຮອງເອົາແລ້ວນັ້ນໃຫ້ປະກົດເປັນຈິງ, ສ້າງໃຫ້ພັກມີຄວາມປອດໃສ, ໜັກແໜ້ນ ແລະ ເຂັ້ມແຂງ.
