ກອງປະຊຸມໃຫຍ່ຜູ້ແທນອົງຄະນະພັກເມືອງຊຽງຄໍ້ ຄັ້ງທີ XII

ກອງປະຊຸມໃຫຍ່ຜູ້ແທນອົງຄະນະພັກເມືອງຊຽງຄໍ້ ຄັ້ງທີ XII ໄດ້ອັດລົງດ້ວຍຜົນສຳເລັດຢ່າງຈົບງາມ ພາຍຫຼັງທີ່ດຳເນີນມາເປັນເວລາ 1 ວັນເຄີ່ງ ຢູ່ສະໂມສອນຂອງເມືອງ. ພາຍໃຕ້ການເປັນປະທານ ຂອງ ສະຫາຍ ເຄນທອງ ພອນພະແກ້ວ ຮັກສາການເລຂາຄະນະບໍລິຫານງານພັກເມືອງ, ຮັກສາການເຈົ້າເມືອງຊຽງຄໍ້. ໂດຍເປັນກຽດເຂົ້າຮ່ວມຂອງ ສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ. ມີບັນດາສະຫາຍຄະນະບໍລິຫານງານພັກແຂວງ, ພະແນກການ, ກົມກອງຂັ້ນແຂວງ, ຂັ້ນເມືອງ, ແຂກຖືກເຊີນ ແລະ ຜູ້ແທນສົມບູນ 127 ສະຫາຍ, ຍິງ 5 ສະຫາຍ ຕາງໜ້າໃຫ້ສະມາຊິກພັກທັງໝົດ 1.847 ສະຫາຍ, ຍິງ 412 ສະຫາຍ ເຂົ້າຮ່ວມ.

ກອງປະຊຸມໄດ້ເປັນເອກະສັນກັນຮັບຮອງເອົາບັນດາວຽກງານຕົ້ນຕໍ ເປັນຕົ້ນແມ່ນ: ຮັບຟັງ ແລະ ຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ – ສັງຄົມ, ບົດສໍາຫລວດການນໍາພາ ຂອງອົງຄະນະພັກເມືອງຊຽງຄໍ້ຄັ້ງທີ XI, ໄດ້ເປັນເອກະພາບກັນ ສັງເກດຕີລາຄາດ້ານດີຜົນງານ, ດ້ານອ່ອນຄົງຄ້າງ, ສາເຫດ, ບົດຮຽນໃນການນໍາພາ-ຊີ້ນຳ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXI ໄລຍະ 5 ປີ ຜ່ານມາ ແລະ ຮັບຮອງເອົາທິດທາງແຜນການ, ຄາດໝາຍສູ້ຊົນສໍາລັບ 5 ປີຕໍ່ໜ້າ ແຕ່ປີ 2025 – 2029 ໂດຍສືບຕໍ່ເຮັດໃຫ້ທົ່ວເມືອງຊຽງຄໍ້ ມີສະຖຽນລະພາບທາງການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບກາຍເປັນ ຂອງທົ່ວປວງຊົນຮອບດ້ານ; ສູ້ຊົນເຮັດໃຫ້ເສດຖະກິດຂອງເມືອງຂະຫຍາຍຕົວຕໍ່ເນື່ອງ ແລະ ມີຄວາມໝັ້ນທ່ຽງ, ສ້າງໂຄງປະກອບເສດຖະກິດໄປຕາມທິດຫັນເປັນອຸດສາຫະກຳ ແລະ ທັນສະໄໝ, ຂຸດຄົ້ນຄວາມອາດສາມາດບົ່ມຊ້ອນຂອງທຸກພາກສວ່ນ ເສດຖະກິດເຂົ້າໃນການພັດທະນາເມືອງຊຽງຄໍ້, ລວມຍອດຜະລິດຕະພັນພາຍໃນ ( GDP ) ຂອງເມືອງໃຫ້ບັນລຸໄດ້ 1.519 ຕື້ກີບ, ສະເລ່ຍໃສ່ພົນລະເມືອງຜູ້ໜຶ່ງໃຫ້ໄດ້ 11,4 ລ້ານກີບຕໍ່ຄົນຕໍ່ປີ, ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ຮອດປີ 2029 ໃຫ້ຍັງເຫຼືອພຽງ 13,02% ຂອງຄົວເຮືອນທັງໝົດໃນທົ່ວເມືອງ; ສຸມໃສ່ພັດທະນາວັດທະນະທໍາ – ສັງຄົມ ພັດທະນາຊັບພະຍາກອນມະນຸດ ໃຫ້ມີຄວາມຮູ້ຄວາມສາມາດ, ມີຄຸນສົມບັດສິນທໍາປະຕິວັດ, ສຸຂະພາບແຂງແຮງ, ສ້າງສີມືແຮງງານ ເພື່ອຕອບສະໜອງຄວາມຕ້ອງການຂອງການພັດທະນາ; ຍົກສູງຄວາມເປັນແບບຢ່າງການນໍາພາຂອງຄະນະພັກ, ສະມາຊິກພັກ-ພະນັກງານແຕ່ລະຂັ້ນ ຕາມຄວາມຮັບຜິດຊອບເຮັດໃຫ້ມີຜົນສຳເລັດທຸກວຽກງານ ແລະ ເປັນສິ່ງຄ້ຳປະກັນໃນການປະຕິບັດວຽກງານ; ສືບຕໍ່ພົວພັນຮ່ວມມືກັບຕ່າງປະເທດບົນພື້ນຖານແນວທາງການຕ່າງປະເທດຂອງພັກ ແລະ ຂອບເຂດຄວາມຮັບຜິດຊອບຂອງເມືອງ ເພື່ອດຶງດູດການລົງທຶນ, ບົດຮຽນ ແລະ ທຶນຮອນ ເຂົ້າມາພັດທະນາເມືອງຊຽງງຄໍ້ໃຫ້ນັບມື້ນັບມີການພັດທະນາດີຂື້ນເລື້ອຍໆ.

ພ້ອມນີ້, ກອງປະຊຸມໃຫຍ່ ໄດ້ຮັບຟັງການລາຍງານ ແລະ ການປະກອບຄໍາເຫັນຈາກຫ້ອງການ, ກຸ້ມບ້ານ ແລະ ຄອບຄົວດີເດັ່ນ ປູກໄມ້ໃຫ້ໝາກ , ລ້ຽງປານີນພັນ. ການປະກອບຄໍາເຫັນດັ່ງກ່າວແຕ່ລະພາກ ສ່ວນໄດ້ເຫັນດີເປັນເອກະພາບນໍາບົດລາຍງານການເມືອງ, ຍົກໃຫ້ເຫັນຜົນສໍາເລັດ ແລະ ບົດຮຽນໃນການຈັດຕັ້ງປະຕິບັດວຽກຂອງຕົນໃນໄລຍະຜ່ານມາສາມາດເຮັດໃຫ້ພາກສ່ວນອື່ນນໍາເອົາໄປເປັນບົດຮຽນໃນການຈັດຕັ້ງປະຕິບັດຕົວຈິງ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ແລະ ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງຊຸດທີ XII ໄດ້ເປັນເອກະສັນກັນເລືອກເອົາ ສະຫາຍ ເຄນທອງ ພອນພະແກ້ວ ເປັນເລຂາພັກເມືອງ, ສະຫາຍ ແທງ ວິໄລພອນ ແລະ ສະຫາຍ ວົງສຸກ ໄຊສີມທອງ ເປັນຮອງເລຂາພັກເມືອງ ແລະ ເລືອກຕັ້ງ ສະຫາຍ ອໍາແຍງ ສີປານຍາ ເປັນປະທານກວດກາພັກ-ລັດເມືອງ, ສະຫາຍ ວັນຄໍາ ວົງພິລາ ແລະ ສະຫາຍ ໂຕນ ນາມມະວົງ ເປັນຮອງປະທານກວດກາພັກ-ລັດເມືອງ. ພ້ອມນັ້ນ, ກອງປະຊຸມຍັງໄດ້ເລືອກຕັ້ງເອົາຜູ້ແທນສົມບູນ ແລະ ສໍາຮອງ ເພື່ອໄປຮ່ວມກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງຫົວພັນທີ່ຈະໄຂຂື້ນໃນຕໍ່້ໜ້ານີ້.

ໂອກາດນີ້, ກອງປະຊຸມໃຫຍ່ຍັງໄດ້ຮັບຟັງຄໍາເຫັນໂອ້ລົມຂອງສະຫາຍ ຄໍາແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ເຊິ່ງສະຫາຍໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍ ຕໍ່ການນຳພາ-ຊີ້ນໍາ ຂອງອົງຄະນະພັກຊຸດເກົ່າ ທີ່ໄດ້ນໍາພາ-ຊີ້ນຳ ພະນັກງານ-ລັດຖະກອນ, ສະມາຊິກພັກ, ປະຊາຊົນບັນດາເຜົ່າ ຍາດໄດ້ຜົນງານຫຼາຍດ້ານ; ພ້ອມກັນນັ້ນ, ສະຫາຍ ຍັງໄດ້ໃຫ້ທິດຊີ້ນໍາແກ່ຜູ້ແທນກອງປະຊຸມໃຫ່ຍ ສຸມໃສ່ການສຶກສາອົບຮົມການເມືອງແນວຄິດໃຫ້ແກ່ພະນັກງານ – ສະມາຊິກພັກ, ທະຫານ – ຕໍາຫຼວດ ແລະ ປະຊາຊົນບັນດາເຜົ່າໃນທົ່ວເມືອງໃຫ້ມີແນວຄິດການເມືອງໜັກແໜ້ນ, ສ້າງຄວາມສາມັກຄີເປັນເອກະພາບ ຂອງແຕ່ລະພາກສ່ວນ, ການນໍາແຕ່ລະຂັ້ນ ເພື່ອພ້ອມກັນຈັດຕັ້ງປະຕິບັດແນວທາງຂອງພັກ – ລະບຽບກົດໝາຍ ຂອງລັດໃຫ້ປະກົດຜົນເປັນຈິງເທື່ອລະກ້າວ, ເອົາໃຈໃສ່ແກ້ໄຂບັນຫາແນວຄິດຄັບແຄບ, ຄອງເດີມ ແລະ ເອື້ອຍອີງ ພ້ອມທັງກໍາແໜ້ນແນວຄິດຈິດໃຈ 4 ບຸກທະລຸ ທີ່ມະຕິ X ຂອງສູນກາງພັກວາງອອກ, ປັບປຸງແບບແຜນວິທີເຮັດວຽກໃຫ້ສອດຄ່ອງກັບເງື່ອນໄຂ ແລະ ສະພາບຄວາມເປັນຈິງ ເພື່ອເຮັດໃຫ້ການຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍໃຫ້ໄດ້ຮັບຜົນດີ, ເພີ່ມທະວີ ແລະ ເອົາໃຈໃສ່ວຽກງານກວດກາຕໍ່ທຸກຂົງເຂດວຽກງານ ເພື່ອຕ້ານ ແລະ ສະກັດກັ້ນທຸກປະກົດການຫຍໍ້ທໍ້ໃນຖັນແຖວພະນັກງານ – ສະມາຊິກພັກ, ປຸກລະດົມປວງຊົນເຂົ້າຮ່ວມວຽກງານປ້ອງກັນຊາດ – ປ້ອງກັນຄວາມສະຫງົບ ເພື່ອເຮັດໃຫ້ວຽກງານດັ່ງກ່າວ ກາຍເປັນໜ້າທີ່ຂອງທຸກພາກສ່ວນ ແລະ ຂອງທຸກຄົນຢ່າງແທ້ຈິງ, ເອົາໃຈໃສ່ນໍາເອົາຜົນສໍາເລັດຂອງກອງປະຊຸມໃຫຍ່ຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດດອກອອກຜົນເປັນຈິງ.

ກອງປະຊຸມໃຫຍ່ຄັ້ງນີ້ແມ່ນຜົນສຳເລັດ ຂອງຄະນະພັກທຸກຂັ້ນ, ບັນດາສະມາຊິກພັກ, ພະນັກງານ – ລັດຖະກອນ ແລະ ປະຊາຊົນບັນດາເຜົ່າໃນທົ່ວເມືອງຊຽງຄໍ້ ທີ່ເຊີດຊູສະຕິ ແລະ ຄວາມຮັບຜິດຊອບສູງຕໍ່ໜ້າທີ່ການເມືອງ ຂອງຕົນ ພ້ອມທັງສາມັກຄີກັນເປັນຈິດໜຶ່ງໃຈດຽວ ຈັດຕັ້ງປະຕິບັດບັນດາມະຕິກອງປະຊຸມໃຫຍ່ໃນໄລຍະຜ່ານມາ ນຳສູ່ຜົນສຳເລັດ ຂອງກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XII.