ກອງປະຊຸມໃຫຍ່ຜູ້ແທນອົງຄະນະພັກ ເມືອງຊຳເໜືອ ຄັ້ງທີ XIII
ກອງປະຊຸມໃຫຍ່ຜູ້ແທນອົງຄະນະພັກ ເມືອງຊຳເໜືອ ຄັ້ງທີ XIII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 10 ກຸມພາ 2025 ນີ້, ຢູ່ທີ່ສະໂມສອນຂອງເມືອງ, ພາຍໃຕ້ການເປັນປະທານຂອງ ສະຫາຍ ອ່ອນພັນ ທອງທິດາ ກຳມະການພັກແຂວງ, ເລຂາພັກເມືອງ, ເຈົ້າເມືອງຊຳເໜືອ, ໃຫ້ກຽດເຂົ້າຮ່ວມຂອງສະຫາຍ ຄໍາແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ມີການນຳຂອງແຂວງ, ບັນດາທ່ານອາດີດການນໍາຂອງເມືອງ, ແຂກຖືກເຊີນ ແລະ ຜູ້ແທນສົມບູນ – ສໍາຮອງເຂົ້າຮ່ວມ.
ໃນພິທີ, ສະຫາຍ ອ່ອນພັນ ທອງທິດາ ກຳມະການພັກແຂວງ ເລຂາພັກເມືອງ-ເຈົ້າເມືອງໆຊຳເໜືອ ໄດ້ມີຄໍາເຫັນເປີດກອງປະຊຸມໃຫຍ່ຢ່າງເປັນທາງການ ແລະ ໄດ້ຕີລາຄາຄືນຜົນງານການນຳພາຊີ້ນຳ ຂອງຄະນະບໍລິຫານງານພັກເມືອງສະໄໝທີ XII ໂດຍຕະຫຼອດ 5 ປີທີ່ຜ່ານມາ ອົງຄະນະພັກພ້ອມກັບປະຊາຊົນບັນດາເຜົ່າໃນທົ່ວເມືອງຊໍາເໜືອ ຕັ້ງໜ້າເສີມຂະຫຍາຍມູນເຊື້ອ ແຫ່ງຄວາມສາມັກຄີ ເອກະພາບບຸກບືນໃນການຈັດຕັ້ງປະຕິບັດວຽກງານຕ່າງໆ, ເຊີດຊູນໍ້າໃຈຮັກຊາດ, ຮັກລະບອບໃໝ່, ຄວາມເປັນເອກະລາດ, ເປັນເຈົ້າຕົນເອງ, ສ້າງຄວາມຮັ່ງມີເຂັ້ມແຂງດ້ວຍຕົນເອງ, ປະຕິບັດແນວທາງປ່ຽນແປງໃໝ່ພາຍໃຕ້ການນໍາພາ ຂອງພັກ ອັນໄດ້ເຮັດໃຫ້ເມືອງຊຳເໜືອ ມີສະຖຽນລະພາບທາງດ້ານການເມືອງ, ເສດຖະກິດມີບາດກ້າວຂະຫຍາຍຕົວຕໍ່ເນື່ອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ. ອັນທີ່ພົ້ນເດັ່ນ ແມ່ນການສືບຕໍ່ປະຕິບັດຍຸດທະສາດຫັນລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຂອງພັກ ໄດ້ເປັນຂະບວນການຢ່າງເລິກເຊິ່ງ ແລະ ລຽນຕິດ ປະກອບສ່ວນຢ່າງຕັ້ງໜ້າເຂົ້າໃນການປັບປຸງລະບອບປະຊາທິປະໄຕ, ປະຊາຊົນຢູ່ຂັ້ນຮາກຖານໄດ້ມີຄວາມເຂັ້ມແຂງ, ນໍາພາປະຊາຊົນບັນດາເຜົ່າປະຕິບັດແນວທາງການເມືອງ ຂອງພັກ ໄດ້ ເປັນຢ່າງດີ. ພ້ອມນີ້, ສະຫາຍ ເລຂາພັກເມືອງ-ເຈົ້າເມືອງໆຊຳເໜືອ ຍັງໄດ້ຮຽກຮ້ອງມາຍັງບັນດາສະຫາຍຜູ້ແທນກອງປະຊຸມໃຫຍ່ ຈົ່ງເຊີດຊູຄວາມຮັບຜິດຊອບທາງການເມືອງຂອງຕົນ, ເສີມຂະຫຍາຍປະຊາທິປະໄຕຢ່າງແຂງແຮງ ໃນການຄົ້ນຄວ້າ ແລະ ປະກອບຄວາມຄໍາເຫັນຢ່າງກົງໄປກົງມາ, ເພື່ອສ້າງຄວາມເປັນເອກະພາບສູງຕໍ່ບັນຫາຕ່າງໆ ຂອງກອງປະຊຸມ ເຮັດໃຫ້ກອງປະຊຸມໃຫຍ່ຄັ້ງນີ້ບັນລຸຜົນສໍາເລັດຢ່າງສະຫງ່າງາມ.
ກອງປະຊຸມໃຫຍ່ຜູ້ແທນອົງຄະນະພັກ ເມືອງຊຳເໜືອ ຄັ້ງທີ XIII ຈະດໍາເນີນເປັນເວລາ 2 ວັນ, ໂດຍຄະນະຜູ້ແທນກອງປະຊຸມຈະໄດ້ພ້ອມກັນສັງເກດຕີລາຄາເຖິງຜົນສໍາເລັດ ຂອງການຈັດຕັ້ງປະຕິບັດແນວທາງຂອງພັກ, ມະຕິກອງປະຊຸມໃຫຍ່ຄັ້ງທີ XII ຂອງອົງຄະນະພັກເມືອງ ໃນໄລຍະ 5 ປີທີ່ຜ່ານມາ; ສະຫຼຸບສັງລວມ, ຖອດຖອນເປັນບົດຮຽນອັນສໍາຄັນ ແລະ ຈະໄດ້ພ້ອມກັນຄົ້ນຄວ້າຕົກລົງຢ່າງເປັນເອກະພາບ ຮັບຮອງເອົາທິດທາງ 2025-2029 ໂດຍເນັ້ນໃສ່ການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ, ສ້າງປະຖົມປັດໃຈໃຫ້ເມືອງຊຳເໜືອຫຼຸດພົ້ນຈາກຄວາມທຸກຍາກໃນຕໍ່ໜ້າ ດ້ວຍມາດຕະການຊຸກຍູ້ຜະລິດເປັນສິນຄ້າຢ່າງແຂງແຮງ, ລົບລ້າງຄວາມທຸກຍາກໃຫ້ປະຊາຊົນບັນດາເຜົ່າ, ນໍາພາສ້າງຄອບຄົວ, ບ້ານ, ກຸ່ມບ້ານພັດທະນາໃຫ້ເປັນກ້າວໆ, ສ້າງເມືອງຊຳເໜືອໃຫ້ມີບາດກ້າວຂະຫຍາຍຕົວຢ່າງບໍ່ຢຸດຢັ້ງ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ພ້ອມນັ້ນ, ກອງປະຊຸມໃຫຍ່ຈະໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກ ເມືອງຊຳເໜືອ ຊຸດໃໝ່ ເພື່ອສືບຕໍ່ນໍາພາປະຊາຊົນບັນດາເຜົ່າ ປະຕິບັດແນວທາງການເມືອງຂອງພັກຢູ່ ເມືອງຊຳເໜືອ ໃຫ້ປະກົດຜົນເປັນຈິງ ແລະ ປ່ອນບັດຄັດເລືອກເອົາຜູ້ແທນສົມບູນ ແລະ ສຳຮອງ ຂອງເມືອງໄປຮ່ວມກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງຫົວພັນໃນຕໍ່ໜ້າ.
