ກອງປະຊຸມໃຫຍ່ຄັ້ງທີ XII ຂອງອົງຄະນະບໍລິຫານງານພັກເມືອງຊຳໃຕ້
ກອງປະຊຸມໃຫຍ່ຄັ້ງທີ XII ຂອງອົງຄະນະບໍລິຫານງານພັກເມືອງຊຳໃຕ້ ໄດ້ອັດລົງດ້ວຍຜົນສຳເລັດ ພາຍຫຼັງທີ່ດຳເນີນມາເປັນເວລາ 1 ວັນເຄີ່ງ ຢູ່ສະໂມສອນໃຫຍ່ ຂອງເມືອງຊຳໃຕ້, ໂດຍມີຜູ້ແທນສົມບູນເຂົ້າຮ່ວມທັງໝົດ 161 ສະຫາຍ, ຍິງ 10 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດ 1.934 ສະຫາຍ, ແຂກຖືກເຊີນ 52 ສະຫາຍ. ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມທຸກສະຕິປັນຍາຂອງຕົນ ເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງລະດັບຄາດໝາຍທີ່ວາງໄວ້. ໂດຍ ສະຫາຍ ທອງ ຄຸນທອນຮຸ່ງມີໄຊ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກເມືອງຊຳໃຕ້.
ກອງປະຊຸມໃຫຍ່ຄັ້ງທີ XII ຂອງຄະນະບໍລິຫານງານພັກເມືອງຊຳໃຕ້ ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນທີ່ສຳຄັນຂອງເມືອງ ເປັນຕົ້ນແມ່ນ: ບົດລາຍງານການເມືອງທັງ 2 ພາກ, ແຜນພັດທະນາເສດຖະກິດ-ສັງຄົມ, ທິດທາງຄາດໝາຍສູ້ຊົນແຕ່ລະດ້ານ. ໃນນັ້ນ ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີ ຜ່ານມາ. ພ້ອມນີ້, ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງແຜນການ 5 ປີນັບແຕ່ປີ 2025 ຮອດປີ 2029 ເຊິ່ງເມືອງຊຳໃຕ້ຈະຍົກສູງຄວາມສາມາດນໍາພາ ຂອງພັກ, ປັບປຸງກໍ່ສ້າງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ຫັນການຄຸ້ມຄອງລັດ, ຄຸ້ມຄອງ ສັງຄົມດ້ວຍກົດໝາຍເທື່ອລະກ້າວ, ປັບປຸງແບບແຜນວິທີເຮັດວຽກຂອງຄະນະພັກແຕ່ລະຂັ້ນ, ສ້າງໃຫ້ໄດ້ຄວາມເຊື່ອໜັ້ນ ແລະ ການສະໜັບສະໜູນຈາກປະຊາຊົນ; ປັບປຸງກໍາລັງປ້ອງກັນຊາດ-ປ້ອງກັນຄວາມສະຫງົບ ແຕ່ຂັ້ນເມືອງລົງຮອດຂັ້ນບ້ານ ໃຫ້ມີຄວາມເຂັ້ມແຂງເດັດດ່ຽວ, ຕ້ານ ແລະ ສະກັດກັ້ນທຸກກົນອຸບາຍຫັນປ່ຽນໂດຍສັນຕິຂອງສັດຕູ ກໍ່ຄືພວກຄົນບໍ່ດີຫວັງມ້າງເພທຳລາຍລະບອບໃໝ່, ສະກັດກັ້ນການປູກຝີ່ນ ແລະ ຄ້າຂາຍເຖື່ອນເປັນການສ້າງຄວາມບໍ່ສະຫງົບຢູ່ພາຍໃນທ້ອງຖິ່ນສູ້ຊົນເຮັດໃຫ້ເມືອງຊໍາໃຕ້ມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍທາງດ້ານສັງຄົມ ປະຊາຊົນຍູ່ທ່າງທຳມາຫາກີນ; ເອົາໃຈໃສ່ສ້າງເງື່ອນໄຂ ແລະ ເພີ່ມທະວີການຂຸດຄົ້ນທຸກທ່າແຮງບົ່ມຊ້ອນເຂົ້າໃສ່ການພັດທະນາເສດຖະກິດ ເຮັດໃຫ້ເສດຖະກິດມີການຂະຫຍາຍຕົວຕໍ່ເນື່ອງໃນລະດັບ 3.86% ຂຶ້ນໄປ, ຄາດວ່າໃນປີ 2029 ລວມຍອດລາຍຮັບຂອງເມືອງຈະໃຫ້ບັນລຸ 2.024 ຕື້ກີບ, ສະເລ່ຍຕໍ່ຄົນໃຫ້ໄດ້ 10ລ້ານກີບ/ຄົນ/ປີ, ໂຄງປະກອບເສດຖະກິດສະແດງອອກຄື: ຂະແໜງກະສິກໍາ-ປ່າໄມ້ກວມເອົາ 72,48 % ຂອງGDP, ຂະແໜງອຸດສະກໍາກວມເອົາ 13,23 % ຂອງ GDP, ຂະແໜງການບໍລິການກວມເອົາ 14,29 % ຂອງGDP; ປະຕິບັດຍຸດທະສາດການສຶກສາ, ຮັບປະກັນໃຫ້ເດັກໃນເກນອາຍຸໄດ້ເຂົ້າຮຽນ%100 ຍົກສູງຄຸນນະພາບການສຶກສາໃຫ້ໄດ້ມາດຕະຖານ, ສ້າງເງື່ອນໄຂໃຫ້ທຸກຄົນມີໂອກາດໄດ້ຮັບການປິ່ນປົວຮັກສາສຸຂະພາບໃຫ້ແຂງແຮງ, ວັດທະນະທໍາ, ຮີດຄອງປະເພນີ ແລະ ສະຖານທີ່ປູສະນິຍະສະຖານໄດ້ຮັບການບູລະນະ ແລະ ເສີມຂະຫຍາຍຢ່າງກວ້າງຂວາງ; ເພີ່ມທະວີການພົວພັນຮ່ວມມືຮອບດ້ານກັບ ບັນດາເມືອງອ້າຍນ້ອງເພື່ອນບ້ານ ຫວຽດນາມ ທີ່ມີຊາຍແດນຕິດຈອດກັບເມືອງຊຳໃຕ້, ອຳນວຍຄວາມສະດວກ ແລະ ຮ່ວມມືກັບອົງການຈັດຕັ້ງສາກົນ ເພື່ອຍາດແຍ່ງເອົາການຊ່ວຍເຫຼືອດ້ານທຶນຮອນ ແລະ ເຕັກນິກ, ວິທະຍາສາດເຂົ້າມາພັດທະນາເມືອງຊຳໃຕ້ໃຫ້ນັບມື້ຫຼາຍຂື້ນ; ສຸມໃສ່ສ້າງ ແລະ ຂະຫຍາຍຈຸດສູມດ້ານຕ່າງໆ ໃຫ້ມີຄຸນນະພາບ ໄປພ້ອມກັບການລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ແນໃສ່ແກ້ໄຂຄວາມທຸກຍາກຂອງປະຊາຊົນໃຫ້ດີຂື້ນ ເພື່ອ ກ້າວໄປສູ່ການສ້າງບ້ານພັດທະນາ ແລະ ຄວບຄູ່ກັບການສ້າງພະນັກງານສືບທອດທົດແທນໃນຂະບວນການຕົວຈິງ.
ກອງປະຊຸມໃຫຍ່ຍັງໄດ້ຟັງການລາຍງານ ແລະ ປະກອບຄຳເຫັນຈາກຜູ້ຕາງໜ້າຫຼາຍພາກສ່ວນ ເຊິ່ງແຕ່ລະພາກສ່ວນລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ເຮັດໃຫ້ກອງປະຊຸມມີເນື້ອໃນອຸດົມສົມບູນຍີ່ງຂື້ນ.
ພ້ອມນີ້, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້ ແລະ ກອງປະຊຸມປະຖົມມະລຶກ ຂອງຄະນະບໍລິຫານງານພັກເມືອງ ໄດ້ເລືອກຕັ້ງເອົາເລຂາ, ຮອງເລຂາ, ຄະນະປະຈຳ, ປະທານຮອງປະທານກວດກາ ແລະ ເປັນເອກະສັນເລືອກເອົາ ສະຫາຍ ທອງ ຄຸນທອນຮຸ່ງມີໄຊ ເປັນເລຂາພັກເມືອງ, ສະຫາຍ ເພັດໄຊ ວິໄລທອງ ເປັນຮອງເລຂາພັກເມືອງ, ສະຫາຍ ໄມແກ້ວ ສຸກຄໍາມູນ ເປັນຮອງເລຂາພັກເມືອງ, ສະຫາຍ ມາລີ ຫອມແສນເມືອງ ເປັນປະທານກວດກາ, ສະຫາຍ ບຸນໄຊ ປ່າເຢັ້ງທໍ່ ເປັນຮອງປະທານກວດກາ, ສະຫາຍ ສຸດທິສັກ ໄຊສົມພູ ເປັນຮອງປະທານກວດກາ.
ໂອກາດນີ້, ກອງປະຊຸມໃຫຍ່ຍັງໄດ້ຮັບຟັງການໂອ້ລົມຈາກສະຫາຍ ຄໍາແພງ ໄຊສົມແພງ ກໍາມະການສູນກາງພັກເລຂາພັກແຂວງ, ເຈົ້າແຂວງຫົວພັນ. ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ ການນໍາພາ-ຊີ້ນໍາ ຂອງຄະນະພັກຊຸດເກົ່າ ທີ່ໄດ້ນໍາພາ-ຊີ້ນໍາພະນັກງານ, ສະມາຊິກພັກ, ປະຊາຊົນປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ຈະຕ້ອງໄດ້ສືບຕໍ່ປັບປຸງແກ້ໄຂ. ຈາກນັ້ນ, ສະຫາຍຍັງໃຫ້ທິດຊີ້ນຳວຽກງານຫຼາຍດ້ານ, ສະຫາຍ ຍັງໄດ້ຝາກຄວາມເຊື່ອໝັ້ນຕໍ່ຄະນະພັກຊຸດໃໝ່ ທີ່ຈະສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກເມືອງ ສະໄໝທີ XII ໃຫ້ຍາດໄດ້ຜົນງານ ແລະ ຜົນສຳເລັດຍິ່ງໃຫຍ່ກວ່າເກົ່າ.
ກອງປະຊຸມໃຫຍ່ຄັ້ງນີ້, ຮຽກຮ້ອງມາຍັງສະມາຊິກພັກ, ພະນັກງານ ແລະ ປະຊາຊົນບັນດາເຜົ່າທົ່ວເມືອງຊຳໃຕ້ ຈົ່ງເຊີດຊູສະຕິ ແລະ ຄວາມຮັບຜິດຊອບການເມືອງຂອງຕົນໃຫ້ສູງຂື້ນເລື້ອຍໆ; ຈັດຕັ້ງປະຕິບັດວຽກງານ ໃຫ້ມີການຫັນປ່ຽນໃໝ່ຢ່າງຕັ້ງໜ້າ ເຮັດໃຫ້ພັກມີຄວາມປອດໃສ, ເຂັ້ມແຂງ, ໜັກແໜ້ນ.
