ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານສະຫະພັນແມ່ຍິງ ຄະນະໂຄສະນາອົບຮົມແຂວງຫົວພັນ
ເວລາ 8:30 ເຊົ້າ ຂອງວັນທີ 12 ກັນຍາ 2024. ສະຫະພັນແມ່ຍິງຫນ່ວຍຄະນະໂຄສະນາອົບຮົມແຂວງຫົວພັນ ໄດ້ເປີດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານສະຫະພັນແມ່ຍິງໃນໄລຍະ 5 ປີ ຄັ້ງທີ II ຂຶ້ນຢູ່ທີ່ຫ້ອງປະຊຸມຊັ້ນ V ຕືກສຳນັກງານອົງການປົກຄອງແຂວງຫົວພັນ. ພາຍໃຕ້ການເປັນ ປະທານຂອງ ທ່ານ ນາງ ມາໄລທອງ ສີນາວົງ ຫົວໜ້າໜ່ວຍສະຫະພັນແມ່ຍິງ ຄະນະໂຄສະນາອົບຮົມແຂວງ, ເປັນກຽດ ເຂົ້າຮ່ວມໂດຍ ທ່ານ ຕົງລີ ເຕັ່ງ ກໍາມະການພັກແຂວງ, ເລຂາຫນ່ວຍພັກ, ຫົວຫນ້າຄະນະໂຄສະນາອົບຮົມແຂວງ, ທ່ານ ນາງ ສອນຈັນ ຄຸນບູນມີ ຮອງປະທານສະຫະພັນແມ່ຍິງແຂວງ, ຜູ້ຕາງຫນ້າຈາກອົງການຈັດ ຕັ້ງມະຫາຊົນຄະນະໂຄສະນາອົບຮົມແຂວງ, ອົງການພາຄີ ແລະ ສະມາຊິກແມ່ຍິງ ເຂົ້າຮ່ວມທັງຫມົດ 22 ສະຫາຍ ຊາຍ 4 ສະຫາຍ.
ກອງປະຊຸມໄດ້ຮັບຟັງບົດສະຫຼຸບຕີລາຄາການຈັດຕັ້ງປະຕິບັດວຽກງານສະຫະພັນແມ່ຍິງ ຄັ້ງທີ I ແລະ ທິດທາງແຜນ ການໃນ 5 ປີ ( 2025-2029 ), ບົດສຳຫຼວດການນຳພາຂອງຄະນະໜ່ວຍ ພ້ອມທັງຮັບຮອງເອົາບົດສະຫຼຸບ, ທິດທາງແຜນການ ແລະ ຮັບຮອງເອົາການແຕ່ງຕັ້ງຄະນະສະຫະພັນແມ່ຍິງໜ່ວຍ ຄະນະໂຄສະນາອົບຮົມແຂວງຊຸດໃຫມ່ມີດັ່ງນີ້: ທ່ານ ນາງ ອິງທອງ ກົມແພງມີ ເປັນຫົວໜ້າໜ່ວຍ, ທ່ານ ນາງ ສຸກ ກັນຍາວົງ ເປັນຮອງຫົວໜ້າໜ່ວຍ ທັງເປັນປະທານກວດກາໜ່ວຍ ແລະ ທ່ານ ນາງ ອານັດ ເພັດສົມພອນ ເປັນຮອງຫົວໜ້າໜ່ວຍ; ເພື່ອສືບຕໍ່ນໍາພາ-ຊີ້ນໍາການຈັດຕັ້ງປະຕິບັດມະຕິກອງປະຊຸມຄັ້ງທີ II ຂອງສະຫະພັນແມ່ຍິງຫນ່ວຍຄະນະໂຄສະນາອົບຮົມໃຫ້ມີຜົນສໍາເລັດຕາມລະດັບຄາດຫມາຍ. ເພື່ອເປັນການຢັ້ງຢືນເຖິງຜົນງານ ທີ່ສະມາຊິກແມ່ຍິງຍາດມາໄດ້ ໃນໄລຍະ 5 ປີຜ່ານມາ, ທ່ານ ນາງ ສອນຈັນ ຄຸນບູນມີ ຮອງປະທານສະຫະພັນແມ່ຍີງແຂວງ ໄດ້ໃຫ້ກຽດຂຶ້ນມອບໃບຍ້ອງຍໍຜົນງານ 5 ປີຂອງຫນ່ວຍ ແລະ ໃບຍ້ອງຍໍຂອງສະມາຊິກແມ່ຍິງຄະນະໂຄສະນາອົບຮົມ ຈຳນວນ 08 ສະຫາຍ.
ໃນຕອນທ້າຍກອງປະຊຸມຍັງໄດ້ຮັບຟັງຄຳເຫັນຊີ້ນຳຈາກ ເລຂາໜ່ວຍພັກ ແລະ ຮັບຟັງການໂອ້ລົມຈາກ ຮອງປະທານສະຫະພັນແມ່ຍິງແຂວງ; ເຊິ່ງກ່ອນອື່ນທ່ານໄດ້ຕີລາຄາສູງ ແລະ ຊົມເຊີຍຕໍ່ຜົນສໍາເລັດກອງປະຊຸມ ເຊິ່ງໄດ້ສ່ອງແສງໃຫ້ເຫັນດ້ານດີຜົນງານຂອງຫນ່ວຍແມ່ຍິງແຕ່ລະດ້ານ ພ້ອມນັ້ນຍັງໄດ້ເຫນັ້ນຫນັກໃຫ້ຄະນະແມ່ຍິງໜ່ວຍຊຸດໃຫມ່ໃຫ້ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກແມ່ຍິງໃຫ້ເລິກເຊິ່ງ, ປັບປຸງລະບົບການຈັດຕັ້ງໃຫ້ຫນັກແຫນ້ນເຂັ້ມແຂງ, ສືບຕໍ່ປັບປຸງແບບແຜນວິທີເຮັດວຽກໃຫ້ແທດເຫມາະກັບຕົວຈິງ, ຮັກສາມູນເຊື້ອວັດທະນະທໍາອັນດີງາມຂອງແມ່ຍິງລາວ, ມູນເຊື້ອດຸຫມັ່ນຂະຫຍັນພຽນ, ຄວາມສາມັກຄີຮັກແພງໂອບເອື້ອອາລີຂອງສະມາຊິກແມ່ຍິງ. ເພື່ອແນໃສ່ເຮັດໃຫ້ສະມາຊິກແມ່ຍິງໃນຫນ່ວຍກາຍເປັນແມ່ຍິງ 3 ດີ.
