ວັນທີ 15 ຕຸລາ 2024 ນີ້, ຄະນະບໍລິຫານງານພັກແຂວງຫົວພັນ ໄດ້ຈັດກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 15 ສະໄໝທີ X ທີ່ຫ້ອງປະຊຸມຫ້ອງວ່າການແຂວງຫົວພັນ ໂດຍການເປັນປະທານ ຂອງສະຫາຍ ປອ ຄໍາແພງ ໄຊສົມແພງ ກໍາມະການສູນກາງພັກ ເລຂາຄະນະບໍລິຫານງານພັກແຂວງຫົວພັນ, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ຄະນະບໍລິຫານງານພັກແຂວງ ສະໄໝທີ X ແລະ ບັນດາສະຫາຍເລຂາພັກເມືອງ 10 ເມືອງ ເຂົ້າຮ່ວມຢ່າງພ້ອມພຽງ.

ກອງປະຊຸມ ສະຫາຍ ເພີດ ມາປັນຍາ ຮອງເລຂາພັກແຂວງ ໄດ້ສະຫຼຸບຕີລາຄາວຽກງານໃນຊຸມເດືອນຜ່ານມາ ແລະ ວາງທິດທາງແຜນການ 3 ເດືອນທ້າຍປີ 2024 ໂດຍຍົກໃຫ້ເຫັນການນຳພາ-ຊີ້ນຳເຮັດວຽກງານສຶກສາອົບຮົມການເມືອງແນວຄິດໃຫ້ພະນັກງານ, ສະມາຊິກພັກ, ທະຫານ-ຕຳຫຼວດ ແລະ ປະຊາຊົນບັນດາເຜ່າຢ່າງຕໍ່ເນື່ອງ ທົ່ວແຂວງມີ 132 ຄະນະພັກຮາກຖານ, ໃນນີ້ ຄະນະພັກຮາກຖານສຳນັກງານ 39 ຮາກຖານ, ສຳເລັດການດຳເນີນກອງປະຊຸມໃຫຍ່ທັງໝົດ 36 ຮາກຖານ ເທົ່າກັບ 93%, ມີຄະນະພັກຮາກຖານຊີ້ນຳຫຼາຍບ້ານ ຈຳນວນ 93 ຮາກຖານ ໄດ້ສຳເລັດການດຳເນີນກອງປະຊຸມໃຫ່ຍທັງໝົດ 81 ຮາກຖານ ເທົ່າກັບ 87,09%, ສ່ວນຂັ້ນແຂວງແມ່ນກຳລັງດຳເນີນກອງປະຊຸມໃຫຍ່ຢູ່ບັນດາໜ່ວຍພັກເອກະລາດ ແລະ ໜ່ວຍພັກທີ່ຂື້ນກັນຮາກຖານພັກ, ວຽກງານເສດຖະກິດໄດ້ເອົາໃຈໃສ່ຊຸກຍູ້ປະຊາຊົນປູກຝັງ ແລະ ລ້ຽງສັດ ມີເນື້ອທີ່ປູກຝັງທັງໝົດ 71,948 ເຮັກຕາ ເກັບກ່ຽວຜົນຜະລິດໄດ້ 75,467 ໂຕນ ,ວຽກງານແຜນການ ແລະ ການລົງທຶນໄດ້ຕິດຕາມ, ກວດກາຊຸກຍູ້ ແລະ ປະເມີນຜົນກະທົບບັນດາໂຄງການ, ກິດຈະກຳຂອງລັດ ປີ 2024 ແຂວງຫົວພັນ ໄດ້ຮັບໂຄງການທັງໝົດ 534 ໂຄງການ, ມູນຄ່າ 249.21 ຕື້ກີບ, ທຶນສົມທຶນຊ່ວຍເຫຼືອທາງດ້ານການພັດທະນາ(ODA) ຈໍານວນ 17 ໂຄງການ, ມູນຄ່າ 26.48 ຕື້ກີບ, ການລົງທຶນຂອງເອກະຊົນພາຍໃນ ແລະ ຕ່າງປະເທດ ອະນຸຍາດການລົງທຶນໄດ້ 38 ໂຄງການ ມູນຄ່າທັງໝົດ 184.82 ລ້ານໂດລາສະຫະລັດ, ທຽບໃສ່ແຜນການປີປະຕິບັດໄດ້ 99.90%, ສາມາດຂຸດຄົ້ນແຮ່ທາດອະໂລຫະສຳລັບຫີນກໍ່ສ້າງໄດ້ 41,148 ແມັດກ້ອນ, ຂຸດຄົ້ນ-ປຸງແຕ່ງ ແລະ ຈຳໜ່າຍແຮ່ເຫຼັກໄດ້ 202,315.81 ໂຕນ, ຂຸດຄົ້ນ-ປຸງແຕ່ງ ແລະ ຈຳໜ່າຍແຮ່ຫາຍາກໄດ້ 3,072.38 ໂຕນ; ຈາກທ່າແຮງດ້ານຕ່າງໆຂອງແຂວງຫົວພັນ ໃນ 8 ເດືອນຕົ້ນປີສາມາດເກັບລາຍຮັບເຂົ້າງົບປະມານໄດ້ທັງໝົດ 164.74 ຕື້ກີບ ທຽບໃສ່ແຜນການປີລື້່ນຄາດໝາຍ 4%, ວຽກງານປ້ອງກັນຊາດ-ປ້ອງກັນຄວາມສະຫງົບ ໃນ 9 ເດືອນຜ່ານມາມີຄະດີເກີດຂື້ນທັງໝົດ 39 ເລື່ອງ, ມີຜູ້ຖືກຫາ 74 ຄົນ, ຍິງ 3 ຄົນ(ຄົນຕ່າງປະເທດ 07 ຄົນ), ສາມາດມ້າງຄະດີຢາເສບຕິດໄດ້ 77 ເລື່ອງ, ມີອຸປະຕິເຫດເກີດຂື້ນ 56 ລາຍ, ພາຫະນະເປ່ເພ 96 ຄັນ, ບາດເຈັບ 94 ຄົນ, ເສຍຊີວິດ 17 ຄົນ, ທົ່ວແຂວງຫົວພັນ ໄດ້ສ້າງບ້ານປ້ອງກັນຄວາມສະຫງົບດີໄດ້ 383 ບ້ານ ມີຈຳນວນຄອບຄົວທັງໝົດ 3,723 ຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 48 ບ້ານ ມີ 4,449 ຄອບຄົວ, ສ້າງບ້ານປ້ອມໝັ້ນສູ້ຮົບລຽນຕິດໄດ້ 2 ບ້ານ. ພ້ອມດຽວກັນນີ້ກອງປະຊຸມຍັງໄດ້ພາກັນປະກອນຄຳຄິດຄຳເຫັນໃສ່ເນື້ອໃນກອງປະຊຸມເພື່ອຊອກວິທີແກ້ໄຂ, ປັບປຸງເພື່ອແກ້ໄຂຂໍ້ຄົງຄ້າງໃຫ້ບັນລຸຕາມລະດັບຄາດໝາຍທີ່ວາງໄວ້.