23. ໜ່ວຍແມ່ຍິງຄະນະໂຄສະນາອົບຮົມແຂວງ ສຳເລັດກອງປະຊຸມປະເມີນເນຶ້ອໃນຂໍ້ແຂ່ງຂັນ 3 ດີ ປະຈຳປີ 2023

ລາຍລະອຽດ

ສ້າງຂື້ນເມື່ອ ວັນສຸກ, 08 ກັນຍາ 2023 03:35

ຂຽນໂດຍ ອານຸສັກ

ໜ່ວຍແມ່ຍິງຄະນະໂຄສະນາອົບຮົມແຂວງ ສຳເລັດກອງປະຊຸມປະເມີນເນຶ້ອໃນຂໍ້ແຂ່ງຂັນ 3 ດີ ປະຈຳປີ 2023

     ກອງປະຊຸມປະເມີນ ເນື້ອໃນຂໍ້ແຂ່ງຂັນ 3 ດີ ປະຈຳປີ 2023 ຂອງໜ່ວຍແມ່ຍິງຄະນະໂຄສະນາອົບຮົມແຂວງ ໄດ້ເປີດຂຶ້ນໃນເວລາ 8:30 ຂອງວັນທີ 6 ກັນຍາ 2023 ທີ່ຫ້ອງປະຊຸມ ຂອງຄະນະໂຄສະນາອົບຮົມແຂວງ ກອງປະຊຸມໄດ້ດຳເນີນມາເປັນເວລາ 1 ຕອນ ພາຍໃຕ້ການເປັນປະທານຂອງ ສະຫາຍ ນາງ ມາໄລທອງ ສີນາວົງ ປະທານໜ່ວຍແມ່ຍິງຂອງຄະນະໂຄສະນາອົບຮົມ ໃຫ້ກຽດເຂົ້າຮ່ວມໂດຍ ສະຫາຍ ຕົງລີ ເຕັ່ງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີຜູ້ຕ່າງໜ້າຈາກອົງການຈັດຕັ້ງມະຫາຊົນ ແລະ ສະມາຊິກແມ່ຍິງພາຍໃນໜ່ວຍເຂົ້າຮ່ວມຢ່າງພ້ອມພຽງ.

     ກອງປະຊຸມໄດ້ຜ່ານມະຕິຕົກລົງແຕ່ງຕັ້ງຄະນະຮັບຜິດຊອບກະກຽມກອງປະຊຸມປະເມີນເນື້ອໃນຂໍ້ແຂ່ງຂັນ 3 ດີ ປະຈຳປີ 2023 ຈາກນັ້ນ ສະຫາຍເລຂາໜ່ວຍພັກ ໄດ້ມີຄຳເຫັນຊີ້ນຳກອງປະຊຸມ ເພື່ອເຮັດໃຫ້ການດຳເນີນກອງປະຊຸມດຳເນີນໄປດ້ວຍຜົນສຳເລັດຕາມແຜນການການທີ່ວາງໄວ້, ປະທານໜ່ວຍແມ່ຍິງໄດ້ຂຶ້ນເຜີຍແຜ່ເນື້ອໃນຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ແລະ ຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ໃນໄລຍະ 1 ປີ ຜ່ານມາເຊິ່ງມີທັງດ້ານດີຜົນງານ, ດ້ານອ່ອນຄົງຄ້າງ ແລະ ທິດທາງແຜນການທີ່ຈະໄດ້ພ້ອມກັນຈັດຕັ້ງປະຕິບັດໃນປີ 2024 ຈາກນັ້ນສະມາຊິກແມ່ຍິງແຕ່ລະສະຫາຍໄດ້ຜ່ານບົດສຳຫຼວດ ແລະ ລົງຄະແນນຕາມ ເນຶ້ອໃນຂໍ້ແຂ່ງຂັນແມ່ຍິງ 3 ດີ ເຊິ່ງພາຍໃນໜ່ວຍມີສະມາຊິກທັງໝົດ 8 ສະຫາຍ ໄປຮຽນຕໍ່ໄລຍະຍາວ 1 ສະຫາຍ ເຂົ້າຮວ່ມປະເມີນ 7 ສະຫາຍ, ຜ່ານການປະເມີນຕົວຈິງແມ່ນໄດ້ແມ່ຍິງ 3 ດີ 100%.

     ຕອນທ້າຍຂອງກອປະຊຸມ ຍັງໄດ້ຮັບຟັງຄຳເຫັນໂອລົມຈາກ ສະຫາຍ ຕົງລີ ເຕັ່ງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ ກ່ອນອື່ນ ສະຫາຍ ໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວຈັດຕັ້ງປະຕິບັດ ເນື້ອໃນຂໍ້ແຂ່ງຂັນແມ່ຍິງ 3 ດີ ໃນປີ2023, ຍ້ອນຄວາມເປັນຫ່ວງເປັນໄຍ ຂອງສະຫາຍ ຈິ່ງໄດ້ເໜັ້ນໜັກ ຊີ້ທິດເຍື່ອງທາງໃຫ້ເອຶ້ອຍນ້ອງແມ່ຍິງ ເອົາໃຈໃສ່ເຄື່ອນໄຫວປະຕິບັດພາລະບົດບາດ ເປັນຕົວແທນແຫ່ງການປົກປ້ອງສິດ,ຜົນປະໂຫຍດ ອັນຊອບທຳຂອງສະມາຊິກແມ່ຍິງ ແລະ ເດັກນ້ອຍຕາມກົດໝາຍ, ສົ່ງເສີມຄວາມສະເໝີພາບ ຍິງ-ຊາຍ ເພື່ອຕ້ານ ແລະ ສະກັດກັ້ນການໃຊ້ຄວາມຮຸນແຫ່ງຕໍ່ແມ່ຍິງ ແລະ ເດັກນ້ອຍ ພ້ອມກັນຈັດຕັ້ງປະຕິບັດທິດທາງແຜນການໃນປີຕໍ່ໄປ, ຮັກສາມູນເຊື້ອແມ່ຍິງ3 ດີ ໃຫ້ໄດ້ເປັນ ແມ່ຍິງ 3 ດີຕະຫຼອດໄປ.

22. ຄະນະຮັບຜິດຊອບຊີ້ນຳການກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີເຄື່ອນໄຫວ ຢູ່ແຂວງຫົວພັນ.

ລາຍລະອຽດ

ສ້າງຂື້ນເມື່ອ ວັນສຸກ, 01 ກັນຍາ 2023 04:50

ຂຽນໂດຍ ອານຸສັກ

 ຄະນະຮັບຜິດຊອບຊີ້ນຳການກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີເຄື່ອນໄຫວ ຢູ່ແຂວງຫົວພັນ. 

      ເພື່ອເຮັດໃຫ້ການສະເຫຼີມສະຫຼອງວັນເກີດ ປະທານຄຳໄຕ ສີພັນດອນ ຄົບຮອບ 100 ປີ ສຳເລັດໄປຕາມຈຸດປະສົງຄາດໝາຍ ທີ່ວາງໄວ້ຄະນະຮັບຜິດຊອບຊີ້ນຳການກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນຄົບຮອບ 100 ປີ ຂັ້ນສູນກາງໄດ້ລົງມາເຄືອນໄຫວເຮັດວຽກ ຢູ່ແຂວງຫົວພັນ.

ກອງປະຊຸມໄດ້ເຜີຍແຜ່ນິຕິກຳຕ່າງໆ ກ່ຽວກັບ ການກະກຽມ ແລະ ສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີເປີດຂື້ນ ໃນເວລາ 8:00 ຂອງວັນທີ 31 ສິງຫາ 2023 ຢູ່ທີ່ຫ້ອງປະຊຸມ ຊັ້ນ5 ຕືກສຳນັກງານປົກຄອງແຂວງຫົວພັນ ເປັນເວລາ 1 ຕອນ. ພາຍໃຕ້ການເປັນປະທານຂອງ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າໂຄສະນາອົບຮົມສູນກາງພັກ, ຫົວໜ້າກອງເລຂາກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ໃຫ້ກຽດເຂົ້າຮ່ວມໂດຍ ສະຫາຍ ເພີດ ມາປັນຍາຮອງເລຂາພັກແຂວງ, ຜູ້ຊີ້ນຳວຽກງານແນວຄິດ, ພັກພະນັກງານ, ມີຫົວໜ້າຫອ້ງວ່າການ, ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ ຫົວໜ້າພະແນກຖະແຫ່ງຂ່າວ ວັດທະນາທໍາ ແລະ ທ່ອງທ່ຽວ, ຫົວໜ້າກອງບັນຊາການ ປກສ-ປກຊ ແຂວງຫົວພັນ, ເຂລາພັກເມືອງ ເຈົ້າເມືອງ ເມືອງຊຳເໜືອ, ເມືອງວຽງໄຊ, ເມືອງສົບເບົາ, ເມືອງຫົວເມືອງ,ເມືອງຮ້ຽມ ແລະ ຄະນະຮັບຜິດຊອບກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການເຜີຍແຜ່ ຄຳສັ່ງຂອງຄະນະເຂລາທິການສູນກາງພັກ ສະບັບເລກທີ387/ຄລສພ, ລົງວັນທີ 16 ມີຖຸນາ 2023 ວ່າດ້ວຍການສະເຫຼີມສະຫຼອງ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ຜ່ານມະຕິຕົກລົງຂອງຄະນະເຂລາທິການສູນກາງພັກ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມສະເຫຼີມສະຫຼອງ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ສະບັບເລກທີ337/ຄລສພ, ຜ່ານແຜນດຳເນີນງາານຂອງຄະນະຮັບຜິດຊອບ ສະເຫຼີມ ສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ100 ປີ ຈາກຄະນະຮັບຜິດຊອບຂັ້ນສູນກາງພັກ, ຮັບຟັງການລາຍງານກະກຽມ ສະເຫຼີມສະຫຼອງ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ຈາກຄະນະພັກ, ອົງການປົກຄອງແຂວງ ແລະ ເມືອງ ຈາກນັ້ນກອງປະຊຸມຍັງໄດ້ປຶກສາຫາລືແຜນການກະກຽມ ຢູ່ຂັ້ນແຂວງ ໃຫ້ໄດ້ຮັບຜົນສຳເລັດຕາມແຜນການທີວາງໄວ້.

ຕອນທ້າຍຂອງກອງປະຊຸມ ສະຫາຍ ລາວປາວຊົ່ງ ນະວົງໄຊ ກຳມະການສູນການພັກ, ຮອງເຂລາຄະນະພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຫົວໜ້າກອງເຂລາກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ຍັງໃຫ້ກຽດໂອລົມຕໍ່ກອງປະຊຸມ ກ່ອນອື່ນເພີ່ນໄດ້ຍ້ອງຍໍຊົມເຊີຍຕໍ່ແຂວງຫົວພັນໄດ້ກະກຽມຄວາມພ້ອມໃນການສະເຫຼີມສະຫຼອງ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ແລະ ເພິ່ນຍັງໄດ້ໃຫ້ທິດຊີ້ນຳ ແລະ ເໜັ້ນໜັກຄືນແຜນດຳເນີນງານ ແລະ ບັນດາຄຳເຫັນຂອງບັນດາສະຫາຍທີໄດ້ປະກອບໃນກອງປະຊຸມ ເພື່ອເຮັດໃຫ້ການສະເຫຼີມສະຫຼອງ ວັນເກີດ ປະທານຄຳໄຕ ສີພັນດອນ ຄົບຮອບ 100 ປີ ດຳເນີນໄປຕາມແຜນດ້ວຍໜາກຜົນອັນຈົບງາມ ແລະ ເປັນຂະບວນຟົດຟື້ນ. ໃນໂອກາດທີ່ສະຫາຍພ້ອມດ້ວຍທີມງານຂອງ ຄອສພ ລົງມາເຄື່ອນໄຫວເຮັດວຽກຄັ້ງນີໂອ້ລົມຍັງໄດ້ພົບປະ ແລະ ເຮັດວຽກກັບ ຄະນະໂຄສະນາອົບຮົມແຂວງຫົວພັນກ່ອນອື່ນເພີນໄດ້ຍ້ອງຍໍຊົມເຊີຍຕໍ່ຜົນງານທີໂຄສະນາອົບຮົມແຂວງໄດ້ປະຕິບັດໃນໄລຍະຜ່ານມາ, ເພີ່ນຮຽກຮອງໃຫ້ສືບຕໍ່ເຮັດວຽກງານການເມືອງແນວຄິດໃຫ້ເລີກເຊີ່ງທົ່ວເຖິງແຕ່ລະເປົ້າໝາຍຮັບຮູ້ເຊື່ອມຊືມແນວທາງຂອງພັກ ນະໂຍບາຍລະບຽບກົດໝາຍຂອງລັດ ເພື່ອຈັດຕັ້ງປະຕິບັດໃຫ້ເກີດດອກອອກຜົນ. ສືບຕໍ່ເປັນເສນາທິການໃຫ້ຄະນະພັກຂັ້ນຂອງຕົນ ໃນການເຮັດວຽກການເມືອງແນວຄິດໃຫ້ດີກ່ວາເກົ່າ.

ກອງປະຊຸມດັ່ງກ່າວໄດ້ດຳເນີນເປັນເວລາ 1 ຕອນ ແລະ ປິດລົງດ້ວຍໝາກຜົນອັນຈົບງາມ

21. ຄະນະໂຄສະນາອົບຮົມແຂວງຈັດກອງປະຊຸມຝຶກອົບຮົມໃຫ້ສະມາຊິກພັກໃໝ່ ຄັ້ງທີ II ປີ 2023

ລາຍລະອຽດ

ສ້າງຂື້ນເມື່ອ ວັນພະຫັດ, 24 ສິງຫາ 2023 02:23

ຂຽນໂດຍ ອານຸສັກ

ຄະນະໂຄສະນາອົບຮົມແຂວງຈັດກອງປະຊຸມຝຶກອົບຮົມໃຫ້ສະມາຊິກພັກໃໝ່ ຄັ້ງທີ II ປີ 2023

       ໃນຕອນເຊົ້າຂອງວັນທີ 17 ສິງຫາ 2023 ທີ່ຜ່ານມານີ້ ຄະນະໂຄສະນາອົບຮົມແຂວງຫົວພັນໄດ້ຈັດກອງປະຊຸມຝຶກອົບຮົມໃຫ້ສະມາຊິກພັກສົມບູນໃໝ່ ທີ່ຢູ່ບັນດາໜ່ວຍພັກຂື້ນກັບຮາກຖານພັກ ແລະ ໜ່ວຍພັກເອກະລາດອ້ອມຂ້າງແຂວງ ຄັ້ງທີ II ປີ 2023 ຂຶ້ນທີ່ຫ້ອງປະຊຸມຊັ້ນ V ຕືກສຳນັກງານປົກຄອງແຂວງຫົວພັນ, ພາຍໃຕ້ການເປັນປະທານຂອງ ສະຫາຍ ຕົງລີ ເຕັ່ງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍພະນັກງານນຳພາ - ຄຸ້ມຄອງຂອງຄະນະໂຄສະນາອົບຮົມແຂວງ ແລະ ນັກສຳມະນາກອນເຂົ້າຮ່ວມທັງໝົດ 22 ສະຫາຍ, ຍິງ 14 ສະຫາຍ.

      ກອງປະຊຸມຄັ້ງນີ້ຈຸດປະສົງ ເພື່ອສຶກສາອົບຮົມ, ຍົກລະດັບຄວາມຮູ້, ຄວາມເຂົ້າໃຈເນື້ອໃນມະຕິກອງປະຊຸມໃຫຍ່ຄັ້ງ XI ຂອງພັກປະຊາຊົນປະຕິວັດລາວ ຢ່າງເລິກເຊິ່ງ ໃຫ້ສະມາຊິກພັກ, ໂດຍສະເພາະ ແມ່ນການເສີມຂະຫຍາຍມູນເຊື້ອຂອງພັກ, ການຍົກສູງຄວາມສາມາດນຳພາຂອງພັກ, ຝຶກຝົນຫຼໍ່ຫຼອມຄຸນສົມບັດສິນທຳປະຕິວັດຂອງສະມາຊິກພັກ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆພາຍໃນພັກ-ລັດ ກໍຄື ຖັນແຖວສະມາຊິກພັກຢ່າງທັນການ, ມີຄວາມຕັ້ງໜ້າໃນການຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ປອດໃສ, ເຂັ້ມແຂງ ແລະ ໜັກແໜ້ນ. ພາຍຫຼັງສຳເລັດການຝຶກອົບຮົມຄັ້ງນີ້ສາມາດສ້າງໃຫ້ສະມາຊິກພັກສົມບູນໃໝ່ ນຳເອົາຄວາມຮູ້ ແລະ ບົດຮຽນທີ່ໄດ້ຮັບ ໄປໜູນໃຊ້ເຂົ້າໃນພຶດຕິກຳຕົວຈິງໃນການຈັດຕັ້ງປະຕິບັດວຽກງານ ແລະ ການດຳລົງຊີວິດ, ສ້າງແນວຄິດ ແລະ ການກະທຳໃຫ້ມີການຫັນປ່ຽນທີ່ຕັ້ງໜ້າ, ຍົກລະດັບຄວາມສາມາດ ແລະ ສ້າງຄວາມເປັນແບບຢ່າງນຳໜ້າຂອງສະມາຊິກພັກປະຊາຊົນປະຕິວັດລາວ ໃຫ້ແກ່ມະຫາຊົນ.

      ຕອນທ້າຍຂອງກອງປະຊຸມຍັງໄດ້ຮັບຟັງການໃຫ້ທິດແນະນໍາຂອງ ສະຫາຍ ຕົງລີ ເຕັ່ງ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ເຊີ່ງ ສະຫາຍ ຍັງໄດ້ຍົກສູງຄວາມຮັບຜິດຊອບ, ດ້ານແນວຄິດໃຫ້ຖືກຕ້ອງຕາມແນວທາງ, ອຸດົມການຂອງພັກ, ຮູ້ອຸທິດຕົນເພື່ອຜົນປະໂຫຍດສ່ວນລວມຂອງຊາດ, ມີການດຳລົງຊີວິດຂາວສະອາດ, ມີລະບຽບວິໄນ, ມີຄວາມອົດທົນຜ່ານຜ່າອຸປະສັກ, ເປັນແບບຢ່າງໃຫ້ແກ່ມະຫາຊົນ ແລະ ມີຄວາມຮັບຮູ້ໃນການສະກັດກັ້ນປະກົດການຫຍໍ້ທໍ້ພາຍໃນພັກ.

      ກອງປະຊຸມດັ່ງກ່າວໄດ້ປິດລົງໃນເວລາ 12:00 ດ້ວຍໝາກຜົນອັນຈົບງາມ.

20. ພິທີຝືກອົບຮົມວຽກງານຫາງສຽງ-ສັງຄົມ ຢູ່ເມືອງກວັນ ແຂວງຫົວພັນ

ລາຍລະອຽດ

ສ້າງຂື້ນເມື່ອ ວັນອັງຄານ, 22 ສິງຫາ 2023 08:03

ຂຽນໂດຍ ອານຸສັກ

ພິທີຝືກອົບຮົມວຽກງານຫາງສຽງ-ສັງຄົມ ຢູ່ເມືອງກວັນ ແຂວງຫົວພັນ

          ໃນວັນທີ 15-16 ສິງຫາ 2023 ຜ່ານມານີ້ ທາງ ຄະນະໂຄສະນາອົບຮົມແຂວງຫົວພັນໄດ້ສົມທົບກັບ ຄະນະໂຄສະນາອົບຮົມສູນກາງພັກ ແລະ ຄະນະໂຄສະນາອົບຮົມເມືອງກວັນ ໄດ້ຈັດພິທີຝືກອົບຮົມວຽກງານສັງລວມ-ຫາງສຽງສັງຄົມຂື້ນຢູ່ທີ ສະໂມສອນ ເມືອງກວັນແຂວງຫົວພັນ ໃຫ້ກຽດເຂົ້າຮ່ວມຂອງ ສະຫາຍ ອຳພອນ ສອນວິໄລ ຮອງເລຂາພັກເມືອງກວັນ ຜູ້ປະຈຳການ, ມີສະຫາຍ ອົ້ມ ອິນທະລາ ຮອງຫົວໜ້າຄະນະໂຄສະນາອົບຮົມແຂວງຫົວພັນ, ມີສະຫາຍ ບຸນເພັງ ຈັນທະດາລາ ຮອງຫົວໜ້າຫ້ອງການ ຄະນະໂຄສະນາອົບຮົມສູນກາງຮັບຜິດຊອບຊຸດອົບຮົມ ແລະ ນັກສຳມະນາກອນເຂົ້າຮ່ວມທັງໝົດ 52 ສະຫາຍ, ຍິງ 14 ສະຫາຍ.

      ການຈັດຝືກອົບຮົມໃນຄັ້ງນີ້ເພື່ອເປັນການຈັດຕັ້ງຜັນຂະຫຍາຍແຜນດຳເນີນງານ ແລະ ໂຄງການຈຸດສຸມຂອງວຽກງານໂຄສະນາອົບຮົມ ເຂົ້າສູ່ຊີວິດຕົວຈິງ ແລະ ຝຶກອົບຮົມເປົ້າໝາຍຕ່າງໆ ເວົ້າລວມ, ເວົ້າສະເພາະ ແມ່ນພະນັກງານທີ່ເຮັດວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ໃຫ້ຮັບຮູ້ ແລະ ເຂົ້າໃຈ ກ່ຽວກັບວຽກງານສັງລວມ-ຫາງສຽງສັງຄົມ ຢ່າງເລິກເຊິ່ງ ບົນພື້ນຖານຄວາມຮັບຮູ້ດັ່ງກ່າວ ແມ່ນແນ່ໃສ່ເຮັດໃຫ້ພະນັກງານທີ່ຮັບຜິດຊອບວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ໄດ້ຍົກສູງຄຸນນະພາບທາງດ້ານວິຊາການ, ວິທີການຈັດຕັ້ງປະຕິບັດໃນການຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ທັງປະຕິບັດພາລະບົດບາດ, ສິດ, ໜ້າທີ່ ແລະ ຍົກສູງຄວາມຮັບຜິດຊອບຂອງຕົນໃຫ້ສູງຂຶ້ນຕື່ມ. ຄະນະຮັບຜິດຊອບຊຸດອົບຮົມໄດ້ມີຄວາມຮັບຜິດຊອບຢ່າງສູງເປັນຕົ້ນ ການຂຶ້ນຫ້ອງບັນຍາຍ ແລະ ເຜີແຜ່ນິຕິກຳກ່ຽວຂ້ອງ ໃນການຈັດຕັ້ງເຄື່ອນໄຫວວຽກງານຫາງສຽງ-ສັງຄົມ, ຈັດເປັນກຸ່ມຄົ້ນຄວ້າສົນທະນາຕາມຫົວຂໍ້ຄຳຖາມເຈາະຈີ້ມຂອງບົດຮຽນ ເພື່ອແນ່ໃສ່ສ້າງຄວາມເຂັ້ມແຂງໃຫ້ນັກສຳມະນາກອນ, ກໍ່ຄືຄະນະກຳມະການຄົນຄວ້າ, ວິເຄາະ, ວິໄຈ ຫາງສຽງ-ສັງຄົມ ແລະ ຕາໜາງເພື່ອນຮ່ວມ ມີຄວາມຮັບຮູ້ກຳແໜ້ນແນວທາງຂອງພັກ, ກຳແໜ້ນໜ້າທີ່ການເມືອງໃນການເຮັດວຽກງານການເມືອງແນວຄິດ ຢ່າງໜັກແໜ້ນ ແລະ ຮູ້ຈຳແນກບັນຫາຫາງສຽງແມ່ນຫຍັງ ຂ່າວລືແມ່ນຫຍັງ. ນັກສຳມະນາກອນໄດ້ປະຕິບັດໂມງເວລາເຂົ້ມງວດ ຕັ້ງໜ້າຮັບຟັງການເຜີຍແຜ່ບັນຍາຍເອກະສານຈາກຄູອາຈານ ສາມາຮັບຮູ້ກຳແໜ້ນບົດຮຽນເປັນພື້ນຖານບ່ອນອິງເພື່ອນຳໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃຫ້ສອດຄອງຖືກຕ້ອງຕາມນິຕິກຳ. ການຈັດຕັ້ງດຳເນີນຊຸດອົບຮົມວຽກງານຫາງສຽງ-ສັງຄົມໃນຊຸດນີ້ ສາມາດປະຕິບັດໄດ້ຕາມແຜນການຄາດໄວ້ ເຊິ່ງມີນັກສຳມະນາກອນເຂົ້າຮວ່ມທັງໜົດ 40 ສະຫາຍ, ຍິງ 11 ສະຫາຍ, ໃນນີ້ມາຈາກຮາກຖາກຸ່ມບ້ານ  11 ສະຫາຍ. ທຽບໃສ່ແຜນການປະຕິບັດໄດ້ 89 %ຂອງເປົ້າໝາຍເຂົ້າຮ່ວມ.

     ຊຸດຝືກອົບຮົມຄັ້ງນີ້ເປັນກຽດກ່າວປິດ ແລະ ຮັບຟັງການໂອ້ລົມຈາກ ສະຫາຍ ອຳພອນ ສອນວິໄລ ຮອງເລຂາພັກເມືອງກວັນ ຜູ້ຊີ້ນຳວຽກງານແນວຄິດ-ທິດສະດີຂັ້ນເມືອງ, ສະຫາຍໄດ້ສະແດງຄວາມຍ້ອງຍໍຊົມເຊີຍບັນດາຜົນສຳເລັດທີ່ຍາດມາໄດ້, ສະແດງຄວາມຍີນດີຕອນຮັບຄະນະຮັບຜິດຊອບຊຸດອົບຮົມວຽກງານ ຫາງສຽງ-ສັງຄົມ ຄັ້ງນີ້ທີ່ໄດ້ນຳເອົາທີ່ບົດຮຽນ ແລະ ນິຕິກຳມາເຜີຍແຜ່ເຊື່ອມຊືມໃຫ້ພະນັກງານທີເຮັດວຽກງານ ຄົ້ນຄວ້າ, ຕິດຕາມ, ເກັບກຳ ສະພາບແນວຄິດຫາງສຽງ-ສັງຄົມ ເຂົ້າສຸ່ລວງເລີກ. ເພື່ອປົກປ້ອງແນວທາງຂອງພັກອັນຖືກຕ້ອງ, ໃນເມື່ອສະພາບປັດຈຸບັນພົບຄວາມຫຍຸ້ງຍາກ ແລະ ມີຫຼາຍອັນເປັນສີ່ງທ້າທ້າຍຕໍໍ່ການນຳພາຂອງພັກ, ການຄຸ້ມຄອງສັງຄົມເປັນຕົ້ນ: ສະພາບຄວາມຫຍຸ້ງຫຍາກທາງດ້ານເສດຖະກິດການເງີນ, ສະພາບປະກົດການຫຍໍ້ທໍ້ ບັນຫາສີ່ງເສບຕິດ ແລະ ອື່ນໆ. ສະນັ້ນຈື່ງຮຽກຮ້ອງໃຫ້ ຄະນະພັກ, ຄະນະນຳແຕ່ລະຂັ້ນຕ້ອງຖືເອົາວຽກງານສືກສາອົບຮົມນຳພາແນວຄິດເປັນກົກ, ນັກສຳມະນາກອນຈົ່ງເຊີດຊູຄວາມເປັນເຈົ້ານຳເອົາບົດຮຽນ, ນິຕິກຳເຜີຍແຜ່ໃຫ້ສັງຄົມມີຄວາມຮັບຮູ້ເຂົ້າໃຈ ເປັນເຈົ້າຄົ້ນຄວ້າ ຕິດຕາມ ແລະ ລາຍງານສະພາບ ແນວຄິດ ຫາງສຽງ-ສັງຄົມຂອງສະມາຊິກພັກ, ພະນັກງານ ປະຊາຊົນບັນດາເຜົ່າໃຫ້ທັນເຫດການ.

ຊຸດຝືກອົບຮົມວຽກງານສັງລວມຫາງສຽງ-ສັງຄົມໄດ້ດຳເນີນມາເປັນເວລາ 2 ວັນເຕັມ ແລະ ປິດລົງດ້ວຍຜົນສຳເລັດອັນຈົບງາມຕາມແຜນການທີຄາດໄວ້

19. ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນ ແຂວງຫົວພັນ ຊຸດທີ II

ລາຍລະອຽດ

ສ້າງຂື້ນເມື່ອ ວັນພະຫັດ, 03 ສິງຫາ 2023 02:14

ຂຽນໂດຍ ອານຸສັກ

ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນ

ແຂວງຫົວພັນ ຊຸດທີ II 

       ວັນທີ 2 ສິງຫາ 2023 ທີ່ຜ່ານມາ ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນຊຸດທີ II ໄດ້ໄຂຂຶ້ນຢ່າງເປັນທາງການ ທີ່ຫ້ອງປະຊຸມຂອງສະພາປະຊາຊົນ ແຂວງຫົວພັນ ພາຍໃຕ້ການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ ເປັນກຽດເຂົ້າຮ່ວມໂດຍ ທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ; ບັນດາທ່ານຄະນະປະຈຳພັກແຂວງ; ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ; ສະມາຊິກສະພາປະຊາຊົນແຂວງ ຊຸດທີ II; ເຈົ້າເມືອງ 10 ເມືອງ; ອາດີດການນຳ ພັກ-ລັດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ ຊຸດທີ I, ຜູ້ຕາງໜ້າອົງການແນວລາວສ້າງຊາດ; ອົງການຈັດຕັ້ງມະຫາຊົນ ແລະ ພະແນກການອ້ອມຂ້າງແຂວງ; ອົງການທຽບເທົ່າ; ສອງກອງບັນຊາການ ແລະ ພາກສ່ວນທຸລະກິດ ເຂົ້າຮ່ວມທັງໝົດ 105 ທ່ານ ຍິງ 17 ທ່ານ.

      ວາລະກອງປະຊຸມ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງ ເປັນກຽດກ່າວເປີດກອງປະຊຸມຢ່າງເປັນທາງການ. ຊຶ່ງເນື້ອໃນບົດສູນທອນພົດກ່າວໄຂກອງປະຊຸມ ຂອງທ່ານປະທານບາງຕອນໄດ້ກ່າວວ່າ: ໃນທາມກາງບັນຍາກາດທີ່ ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນບັນດາເຜົ່າເວົ້າລວມ; ເວົ້າສະເພາະທົ່ວແຂວງຫົວພັນ, ພວມສຳເລັດກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກ ແຂວງຫົວພັນ ສະໄໝຄັ້ງທີ X ຄຽງຄູ່ກັບການຈັດຕັ້ງຜັນຂະຫຍາຍມະຕິ XI ຂອງສູນກາງພັກ, ມະຕິ X ຂອງອົງຄະນະພັກແຂວງຫົວພັນ, ແຜນພັດທະນາເສດຖະກິດ-ສັງຄົມຂອງແຂວງ 5 ປີຄັ້ງທີ IX ກໍຄືບັນດາມະຕິກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງຫົວພັນ ຊຸດທີ II ໂດຍສະເພາະແມ່ນແຜນພັດທະນາເສດຖະກິດ-ສັງຄົມຂອງແຂວງປະຈຳປີ 2023, ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ຕິດພັດກັບການຈັດຕັ້ງປະຕິບັດສອງວາລະແຫ່ງຊາດຢ່າງເປັນຂະບວນການຟົດຟື້ນ, ແຂງແຮງແລະເປັນຮູບປະທຳຫຼາຍຂຶ້ນ.

       ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງໃນໄລຍະ 6 ເດືອນຕົ້ນປີ2023 ແມ່ນຢູ່ໃນສະພາບການຂອງພາກພື້ນ ແລະ ສາກົນທີ່ມີການຜັນແປໄປຢ່າງສະຫຼັບຊັບຊ້ອນ, ເຄັ່ງຮ້ອນ ແລະ ມີຄວາມຫຼໍ່ແຫຼມທີ່ຄາດຄະເນໄດ້ຍາກເຊິ່ງໄດ້ສົ່ງຜົນກະທົບໂດຍກົງຕໍ່ປະເທດລາວເວົ້າລວມ, ເວົ້າສະເພາະ ແຂວງຫົວພັນ ຂອງພວກເຮົາໂດຍສະເພາະແມ່ນການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍພົບຫຼາຍສິ່ງທ້າທາຍອັນໃໝ່ເປັນຕົ້ນເງິນເຟີ້, ລາຄານ້ຳມັນເຊື້ອໄຟແລະລາຄາສິນຄ້າເພີ່ມຂຶ້ນສູງ, ເຮັດໃຫ້ມີຜົນກະທົບຢ່າງແຮງຕໍ່ຊີວິດການເປັນຢູ່ຂອງພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນາເຜົ່າມີຄວາມຝືດເຄືອງ ແລະ ພົບກັບບັນຫາຄວາມຫຍຸ້ງຍາກຫຼາຍຢ່າງ. ແຕ່ເຖິງວ່າສະພາບການປະຈຸບັນຈະຫຍຸ້ງຍາກປານໃດກໍຕາມດ້ວຍຄວາມເອົາໃຈໃສ່ນຳພາ-ຊີ້ນໍາຂອງອົງຄະນະພັກແຂວງ ຊຸດທີ X ແລະດ້ວຍການເສີມຂະຫຍາຍຄວາມຮັບຜິດຊອບຕໍ່ໜ້າທີ່ການເມືອງຂອງຄະນະພັກ, ອົງການອຳນາດລັດແຕ່ລະຂັ້ນກໍ່ຄືການເສີມຂະຫຍາຍຄວາມເປັນເຈົ້າການຫົວຄິດປະດິດສ້າງຂອງປະຊາຊົນໃນແຕ່ລະທ້ອງຖິ່ນຕາມທ່າແຮງບົ່ມຊ້ອນຕົວຈິງທີ່ມີ ແລະ ການສະໜັບສະໜູນ, ການຊ່ວຍເຫຼືອຈາກອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງທາງສັງຄົມທຸກຂັ້ນ ແລະ ການຊ່ວຍເຫຼືອຈາກແຂວງແຮກສ່ຽວຫວຽດນາມ ແລະ ອົງການຈັດຕັ້ງສາກົນໄດ້ເຮັດໃຫ້ການພັດທະນາເສດຖະກິດ-ສັງຄົມຂອງແຂວງໃນໄລຍະ 6 ເດືອນຕົ້ນປີ 2023 ຜ່ານມາມີທ່າຂະຫຍາຍຕົວໃນລະດັບດີພໍສົມຄວນ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາຄ່ອຍໆດີຂຶ້ນ.

      ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນ ແຂວງຫົວພັນ ຊຸດທີ II ຈະໄດ້ຮັບຟັງການລາຍງານແລະ ພິຈາລະນາຮັບຮອງເອົາບັນຫາສຳຄັນພື້ນຖານຂອງແຂວງດັ່ງນີ້:

1) ພິຈາລະນາ ແລະ ຮັບຟັງການລາຍງານຂອງທ່ານເຈົ້າແຂວງ ກ່ຽວກັບການເຄື່ອນໄຫວວຽກງານທີ່ພົ້ນເດັ່ນ ຂອງອົງການປົກຄອງແຂວງໃນໄລຍະກາງສະໄໝ (2021-2023), ທິດທາງທ້າຍສະໄໝ (2023-2025) ວຽກງານທີ່ພົ້ນເດັ່ນ 6 ເດືອນຕົ້ນປີ ແລະ ທິດທາງຈຸດສຸມ 6 ເດືອນທ້າຍປີ 2023.

2) ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄໝ (2021-2023), ທິດທາງທ້າຍສະໄໝ (2023-2025) ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການປົກຄອງແຂວງ.

3) ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ກາງສະໄໝ (2021-2023), ທິດທາງທ້າຍສະໄໝ (2023-2025) ແລະ ການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການປົກຄອງແຂວງ.

4) ພິຈາລະນາ ແລະ ຮັບຟັງ ການລາຍງານການຈັດຕັ້ງປະຕິບັດສອງວາລະແຫ່ງຊາດ ວ່າດ້ວຍການແກ້ໄຂ ຄວາມຫຸ້ຍງຍາກທາງດ້ານເສດຖະກິດ-ການເງິນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງແຂວງຫົວພັນ.

5) ພິຈາລະນາ ແລະ ຮັບຮອງເອົາບົດລາຍງານ ຂອງພະແນກພະລັງງານ ແລະ ບໍ່ແຮ່ ກ່ຽວກັບການຄຸ້ມຄອງ, ການສຳຫຼວດ, ການຂຸດຄົ້ນ ແລະ ສົ່ງອອກແຮ່ທາດ ຂອງແຂວງຫົວພັນ.

6) ພິຈາລະນາ ແລະ ຮັບຮອງເອົາບົດລາຍງານ ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ກ່ຽວກັບ ບັນດາກິດຈະການ ເຊົ່າ, ສໍາປະທານທີ່ດິນ ເພື່ອການລົງທຶນ ແລະ ກິດຈະການ ການສຳຫລວດ ຂຸດຄົ້ນແຮ່ທາດ ທີ່ສົ່ງຜົນກະທົບ ຕໍ່ສິ່ງແວດລ້ອມສັງຄົມ ແລະ ທໍາມະຊາດຢູ່ແຂວງຫົວພັນ.

7) ພິຈາລະນາ ແລະ ຮັບຮອງເອົາບົດລາຍງານ ການເຄື່ອນໄຫວວຽກງານ ກາງສະໄໝ (2021-2023), ທິດທາງທ້າຍສະໄໝ (2023-2025) ແລະ ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການໄອຍະການປະຊາຊົນ ແລະ ສານປະຊາຊົນ ແຂວງຫົວພັນ.

8) ຮັບຟັງການລາຍງານກ່ຽວກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.

9) ພິຈາລະນາ ແລະ ຮັບຮອງເອົາບົດລາຍງານ ການເຄື່ອນໄຫວວຽກງານ ກາງສະໄໝ (2021-2023), ທິດທາງທ້າຍສະໄໝ (2023-2025) ແລະ ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງສະພາປະຊາຊົນ ແຂວງຫົວພັນ.

10) ປະເມີນຄວາມໄວ້ວາງໃຈຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາປະຊາຊົນແຂວງເລືອກຕັ້ງ ແລະຮັບຮອງເອົາການແຕ່ງຕັ້ງ.

      ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນແຂວງຫົວພັນ ຊຸດທີ II ຄັ້ງນີ້ ຈະໄດ້ດຳເນີນເປັນເວລາ 3 ວັນເຕັມ ນັບແຕ່ ວັນທີ 2-4 ສິງຫາ 2023 ຈຶ່ງສຳເລັດ.