ເມືອງຊ່ອນ ແຂວງຫົວພັນ ປິດຊຸດຮຽນທິດສະດີການເມືອງ-ການປົກຄອງ ຊັ້ນຕົ້ນຊຸດທີ II

ລາຍລະອຽດ

ສ້າງຂື້ນເມື່ອ ວັນພະຫັດ, 17 ພະຈິກ 2022 02:54

ຂຽນໂດຍ ອານຸສັກ

ເມືອງ​ຊ່ອນ ແຂວງ​ຫົວ​ພັ​ນ ​ປິດຊຸດ​ຮຽນທິດສະດີການເມືອງ-ການປົກຄອງ ຊັ້ນຕົ້ນຊຸດທີ II.

    ໃນວັນທີ່ 9 ພະຈິກ 2022 ຜ່ານມານີ້ ​ເມືອງ​ຊ່ອນ ແຂວງ​ຫົ​ວ​ພັນ​ໄດ້​ຈັດ​ ພິ​ທີ​ປິດ ຊຸດ​ຮຽນທິດສະດີການເມືອງ - ການປົກຄອງ ຊັ້ນຕົ້ນຊຸດທີ 2  ຂຶ້ນ​ຢູ່​ທີ່​ຫ້ອງປະຊຸມ ກອງບັນຊາການ ທະຫານ​ເມືອງ ໂດຍພາຍໃຕ້ການເປັນປະທານ​​ຂອ​ງ​ ສະຫາຍ ເພີດ ມາປັນຍາ ຮອງເລຂາພັກແຂວງ ຜູ້ປະຈໍາການ, ມີ​ບັນ​ດາ​ສະຫາຍ ຄະ​ນະ​ປະ​ຈຳພັກເມືອງ, ກຳ​ມະ​ການ​ພັກ​ເມືອງ, ຫົວ​ໜ້າ​-ຮອງ​ຫົວ​ໜ້າ ​ຫ້ອງ​ການ, ​ກອງບັນຊາການທະຫານ, ກອງບັນຊາການຕຳຫຼວດ , ພະ​ນັກ​ງານ, ລັດ​ຖະ​ກອນ​ ແລະ ນັກສືກສາ ​ເຂົ້າ​ຮ່ວມຢ່າງພ້ອມພຽງ.

   ໃນພິທີ ສະຫາຍ ສະລັກໃຈ ກຸມມະນີຄຳສອຍ ກຳມະການພັກເມືອງ, ຄະນະຮັບຜິດຊອບຊຸດຮຽນ ໄດ້ຂື້ນຜ່ານບົດສະຫຼຸບ ຜົນຂອງການຮຽນການສອນ ໃນໄລຍະ 3 ເດືອນຜ່ານມາ. ໃນ​ການ​ຮຽນຊຸດນີ້ມີຈຳນວນນັກສືກສາມາຈາກ ບັນດາຫ້ອງການອ້ອມຂ້າງເມືອງ, ກອງບັນຊາການທະຫານເມືອງ, ກອງບັນຊາການປ້ອງກັນຄວາມສະຫງົບເມືອງ  ລວມທັງໝົດ 39 ສະຫາຍ, ຍິງ 8 ສະຫາຍ, ອາ​ຈານ​ສອນ 14 ສະຫາຍ, ຍິງ 3 ສະຫາຍ, ອາຈານສໍາຮອງມີ 4 ສະຫາຍ ລວມມີ 18 ສະຫາຍ. ຜ່ານການຈັດຕັ້ງປະຕິບັດການຮຽນ - ການສອນ ໃນໄລຍະຜ່ານມາສາມາດຕີລາຄາຜົນໄດ້ຮັບ ຄວາມຮັບຮູ້ດ້ານຫຼັກມູນພື້ນຖານທິດສະດີມາກ - ເລນິນ, ແນວຄິດທິດສະດີ ຂອງປະທານໄກສອນ ພົມວິຫານ ພ້ອມກັນນັ້ນຍັງສາມາດຮັບຮູ້ ແລະ ເຂົ້າໃຈແຈ້ງຕໍ່ແນວທາງຂອງພັກນະໂຍບາຍຂອງລັດ ແລະ ເອກະສານທີ່ສຳຄັນອື່ນໆອີກຈຳນວນໜື່ງ. ໂອກາດດຽວກັນນີ້ ສະຫາຍ ເພິດ ມາປັນຍາ ຮອງເລຂາພັກແຂວງ ຍັງໃຫ້ກຽດຂື້ນມອບໃບປະກາດສະນີຍະບັດ ແລະ ໃບຍ້ອງຍໍປະເພດຕ່າງໆໃຫ້ແກ່ນັກສືກສາ, ຄະນະຮັບຜິດຊອບ ແລະ ຄູອາຈານຢ່າງສົມກຽດ.

   ຕອນທ້າຍພິທີຍັງໄດ້ຮັບຟັງການໂອ້ລົມຈາກ ສະຫາຍ ເພີດ ມາປັນຍາ ຮອງເລຂາພັກແຂວງ ຜູ້ປະຈໍາການ. ເພີ່ນໄດ້ເໜັ້ນໜັກໃຫ້ນັກສືກສາທີ່ໄດ້ຮຽນທິດສະດີການເມືອງ-ການປົກຄອງໃນຄັ້ງນີ້ ເວລາກັບຄືນສູ່ກົມກອງ ຫ້ອງການ ໃຫ້ນຳໃຊ້ບົດຮຽນທີ່ຕົນເອງໄດ້ຮຽນມາໄປຈັດຕັ້ງຜັນຂະຫຍາຍເຂົ້າໃນການ ເຄື່ອນໄຫວເຮັດວຽກງານຕົວຈິງຂອງຕົນ ເພື່ອເຮັດໃຫ້ໜ້າທີ່ວຽກງານທີ່ຕົນເອງຮັບຜິດຊອບ ມີຜົນສຳເລັດຢ່າງສູງ.