70. ເມືອງຊຳເໜືອຈັດພິທີເຊື່ອມຊືມເອກະສານສຳຄັນໃຫ້ ຄະນະພັກ, ອຳນາດການປົກຄອງ ແລະ ປະຊາຊົນບັນດາເຜົ່າ 12 ບ້ານເທດສະບານ

ລາຍລະອຽດ

ສ້າງຂື້ນເມື່ອ ວັນສຸກ, 18 ພະຈິກ 2022 04:17

ຂຽນໂດຍ ອານຸສັກ

ເມືອງຊຳເໜືອຈັດພິທີເຊື່ອມຊືມເອກະສານສຳຄັນໃຫ້ ຄະນະພັກ, ອຳນາດການປົກຄອງ ແລະ ປະຊາຊົນບັນດາເຜົ່າ 12 ບ້ານເທດສະບານ.

   ໃນວັນ​ທີ 15-16 ​ພະຈິກ ປີ 2022 ນີ້​ ​ເມືອງ​ຊຳ​ເໜືອ ​ໄດ້ປະສານສົມທົບກັບຄະນະໂຄສະນາອົບຮົມແຂວງ, ອົງການບໍລິຫານ ແລະ ພັດທະນາຕົວເມືອງ, ແນວລາວສ້າງຊາດເມືອງ ​ຈັດພິທີ ​ເຊື່ອມ​ຊືມເອກະສານທີສຳຄັນ​ໃຫ້ ຄະນະພັກ, ອຳນາດການປົກຄອງ ແລະ ປະຊາຊົນໃນ12ໝູ່ບ້ານ ຂອງ​ເມືອງ​ຊຳ​ເໜືອ ຂື້ນ​ທີ່​ສະ​ໂມ​ສອນ​ຂອງເມືອງຊຳເໜືອ, ບ້ານມີສຸກ, ບ້ານພັນໄຊ ແລະ ບ້ານນາໜອງບົວ ໂດຍແບ່ງອອກເປັນ 4 ຈຸດ, ຈຸດ ລະ 3 ບ້ານ, ມີຜູ້ເຂົ້າຮ່ວມທັງໝົດ 423 ທ່ານ, ຍິງ 191 ທ່ານ.

   ໃນການລົງເຊື່ອມຊືມເອກະສານຄັ້ງນີ້ຄະນະຮັບຜິດຊອບທີ່ມາຈາກພາກສ່ວນກ່ຽວຂ້ອງໄດ້ນຳເອົາເອກະສານຈຳນວນ 5 ບົດເຜີຍແຜ່ໃຫ້ຄະນະພັກ,ອໍານາດການປົກຄອງ ແລະ ປະຊາຊົນໄດ້ຮັບຮູ້ເຂົ້າໃຈເປັນຕົ້ນແມ່ນ: ມູນເຊື້ອ ແລະ ການສືບຕໍ່ປົກປັກຮັກສາເທດສະບານເມືອງຊຳເໜືອ, ມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ່ 9 ສະໄໝທີ 10, ມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ່ 10 ສະໄໝທີ 12, ຜົນຮ້າຍຂອງ 3 ກະແສແນວຄິດ ແລະ ຂໍ້ຕົກລົງວ່າດ້ວຍການພົວພັນລະຫວ່າງຄະນະປະຈຳສະພາປະຊາຊົນແຂວງ ກັບ ຄະນະປະຈຳແນວລາວສ້າງຊາດແຂວງ. ຈຸດປະສົງ​ໃນການເຜີຍແຜ່ ​ເຊື່ອມ​ຊືມ​ບັນດາເນື້ອໃນເອກະສານໃນ​ຄັ້ງ​ນີ້​ກໍ່​ ເພື່ອເປັນ ການສຶກສາອົບຮົມແນວຄິດໃຫ້ປະຊາຊົນຍົກສູງຄວາມຕື່ນຕົວ, ຄວາມເປັນເຈົ້າການປົກປັກຮັກສາ ແລະ ພັດທະນາຕົວເມືອງຊຳເໜືອໃຫ້ກາຍເປັນເມືອງສີຂຽວ, ມີຄວາມສະຫງົບ, ຄວາມເປັນລະບຽບຮຽບຮ້ອຍ, ເຮັດໃຫ້ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 10ຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ 12 ຂອງອົງຄະນະພັກເມືອງຊຳເໜືອບັນລຸຜົນເປັນຈີງ.

   ຕອນທ້າຍຂອງກອງປະຊຸມຍັງໄດ້ເປີດໂອກາດໃຫ້ປະຊາຊົນມີຄຳຄິດຄຳເຫັນ ແລະ ຄຳສະເໜີ ຕ່າງໆ ແລະ ຄະນະຮັບຜິດຊອບໄດ້ ແກ້ໄຂຂໍ້ຂ້ອງໃຈ ພ້ອມທັງຮຽກຮ້ອງມາຍັງ ປະຊາຊົນບັນດາເຜົ່າເພີ່ມທະວີຄວາມສາມັກຄີ, ຄວາມເປັນເຈົ້າການເຮັດວຽກງານສຶກສາອົບຮົມລູກຫຼານໃຫ້ມີລະບຽບວິໄນ, ປົກປັກຮັກສາຊັບສິນຂອງລັດ ແລະ ປະຕິບັດກົດລະບຽບຂອງບ້ານ, ເມືອງວາງອອກຢ່າງເຂັ້ມງວດເພື່ອເຮັດໃຫ້ ເທດສະບານເມືອງຊຳເໜືອມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບປອດໄພໂດຍພື້ນຖານ.

• < ຕໍ່ໄປ
• ຕໍ່ໄປ >