51. ຄະນະໂຄສະນາອົບຮົມແຂວງຫົວພັນ ຈັດປະຊຸມປະເມີນແຜນກຳນົດພະນັກງານນຳພາ-ຄຸ້ມຄອງປະຈຳປີ 2021.

ລາຍລະອຽດ

ສ້າງຂື້ນເມື່ອ ວັນສຸກ, 12 ສິງຫາ 2022 07:15

ຂຽນໂດຍ ພູສັກ

ຄະນະໂຄສະນາອົບຮົມແຂວງຫົວພັນ ຈັດປະຊຸມປະເມີນແຜນກຳນົດພະນັກງານນຳພາ-ຄຸ້ມຄອງປະຈຳປີ 2021.

     ໃນວັນທີ່ 10 ສິງຫາ 2022 ຄະນະໂຄສະນາອົບຮົມແຂວງຫົວພັນໄດ້ຈັດກອງປະຊຸມປະເມີນແຜນກຳນົດພະ ນັກງານນຳພາ-ຄຸ້ມຄອງປະຈຳປີ 2021. ຢູ່ທີ່ຫ້ອງປະຊຸມຊັ້ນ 4 ຫ້ອງວ່າການປົກຄອງແຂວງຫົວພັນຫຼັງ​ເກົ່າ. ພາຍໃຕ້ການເປັນປະທານຂອງ ສະຫາຍ ຕົງລີ ເຕັ່ງ ກໍາມະການພັກແຂວງ, ຫົວໜ້າຄະນະໂຄສະນາອົບຮົບແຂວງ ມີຄະນະຈັດຕັ້ງແຂວງ, ກວດກາພັກລັດແຂວງ, ແລະ ມີພະນັກງານ-ສະມາຊີກພັກພາຍໃນຄະນະໂຄສະນາອົບຮົມແຂວງເຂົ້າຮ່ວມທັງໝົດ 20 ສະຫາຍ, ຍິງ 10 ສະຫາຍ.

    ໃນຂອງກອງປະຊຸມຍັງໄດ້ເຊື່ອມຊຶມມະຕິ 4 ຂອງສູນກາງ, ມະຕິ 8 ຂອງແຂວງ, ເຊື່ອມຊຶມດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ ແລະ ເອກະສານ ສືກສາອົບຮົມແມ່ຍິງ. ເພື່ອເປັນການປະຕິບັດ ຕາມຄຳແນະນຳເລກທີ່ 292/ຄຈສພ ວ່າດ້ວຍ ການສ້າງແຜນກຳນົດພະນັກງານນຳພາ-ຄຸ້ມຄອງ ຕ້ອງມີການປະເມີນຄືນແຜນກໍານົດໃນແຕ່ລະປີ. ປະເມີນບັນດາເປົ້າໝາຍທີ່ນອນໃນແຜນກຳນົດວ່າຍັງມີຄ່ານິຍົມກວມ50% ເພື່ອເປັນພື້ນຖານໃຫ້ຄະ ນະພັກແຕ່ລະຂັ້ນ ເປັນເຈົ້າການໃນການສືບຕໍ່ຊຸກຍູ້ຕິດຕາມບັນດາສະຫາຍທີ່ນອນໃນແຜນເຝິກຝົນຕົນເອງໃນທຸກດ້ານໃຫ້ຄົບຕາມມາດຖານເງື່ອນໄຂເຂົ້າສູ່ກອງປະຊຸມ 3 ຂັ້ນໃນຕໍ່ໜ້າ, ຮັບປະກັນໃນການດໍາເນີນວຽກງານພະນັກ ງານໄປຕາມລະບຽບແບບແຜນ, ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດຕິດພັນກັບການສ້າງແຜນບໍາລຸງ - ກໍ່ສ້າງ, ຄາດຄະເນສັບຊ້ອນ ແລະ ຈັດວາງພະນັກງານໃຫ້ໄດ້ຮັບຄຸນນະພາບດີຂຶ້ນ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນໄດ້ຮັບຮູ້, ເຂົ້າໃຈເຖິງຜົນສຳເລັດ, ຈຸດອ່ອນຄົງຄ້າງໃນການຈັດຕັ້ງປະຕິບັດມະຕິ 7 ສະໄໝທີ X ຂອງອົງຄະນະພັກແຂວງຫົວພັນ, ມະຕິ 3 ສະໄໝທີ XI ຂອງພັກ ແລະ ພ້ອມກັນຈັດຕັ້ງປະຕິບັດມະຕິ 8 ສະໄໝທີ X ຂອງອົງຄະນະພັກແຂວງ ແລະ ມະຕິ 4 ສະໄໝທີ XI ຂອງພັກຢ່າງຖືກຕ້ອງ. ເຫັນໄດ້ດ້ານຕັ້ງໜ້າ ເເລະ ດ້ານອ່ອນຄົງຄ້າງຂອງແຕ່ລະຂົງເຂດວຽກງານ, ພ້ອມນັ້ນຕ້ອງອອກແຮງແຂ່ງຂັນກັນສົ່ງເສີມຂະຫຍາຍຈຸດດີ-ດ້ານຕັ້ງໜ້າ ແລະ ສູ້ຊົນແກ້ໄຂຈຸດອ່ອນ-ຂໍ້ຄົງຄ້າງ. ເຮັດໃຫ້ພະນັກງານ, ສະມາຊິກພັກ, ພະ ນັກງານ-ລັດຖະກອນ, ກຳລັງປະກອບອາວຸດ ແລະ ປະຊາຊົນບັນດາເຜົ່າມີຄວາມເຊື່ອໝັ້ນຕໍ່ການນຳພາຂອງພັກ, ຕັດສິນໃຈສູ້ຊົນປະຕິບັດແຜນພັດທະນາເສດຖະກິດ-ສັງຄົມໃຫ້ປະກົດຜົນເປັນຈິງ ແລະ ໄດ້ນໍາເອົາເອກະສານມູນ ເຊື້ອຂອງແມ່ຍິງລາວ ແລະ ມາລະຍາດທາງສັງຄົມຂອງແມ່ຍິງເປັນການສຶກສາອົບຮົມສະມາຊິກແມ່ຍິງ, ເອື້ອຍນ້ອງແມ່ຍິງບັນດາເຜົ່າໃນທົ່ວແຂວງຫົວພັນເວົ້າລວມ ເວົ້າສະເພາະກໍ່ຄືໜ່ວຍແມ່ຍິງຄະນະໂຄສະນາອົບຮົມແຂວງຫົວພັນ ໄດ້ຮັບຮູ້, ເສີມຂະຫຍາຍມູນເຊື້ອຂອງແມ່ຍິງລາວເຂົ້າໃນການພັດທະນາ ແລະ ຕ້ານປະກົດການຫຍໍ້ທໍ້ຕ່າງໆ ໃນຖັນແຖວຂອງແມ່ຍິງແຂວງກໍ່ຄືການຈັດຕັ້ງປະຕິບັດຕາມແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ, ມະຕິ, ຄຳສັ່ງແຜນພັດທະນາເສດຖະກິດ - ສັງຄົມ, ສົນທິສັນຍາສາກົນ ທີ່ພົວພັນເຖິງການພັດທະນາ, ການປົກປ້ອງສິດ ຜົນປະໂຫຍດຂອງແມ່ຍິງ ແລະ ເດັກນ້ອຍ ພ້ອມທັງເປັນການອານຸລັກ ແລະ ສົ່ງເສີມມູນເຊື້ອວັດທະນາທຳ, ຮີດຄອງປະເພນີອັນດີງາມຂອງຊາດ ແລະ ຕັ້ງໜ້າເສີມຂະຫຍາຍຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນ ດາເຜົ່າໃນທົ່ວແຂວງຫົວພັນ.

ການເຊື່ອມຊຶມຄັ້ງນີ້, ເພື່ອເຮັດໃຫ້ພະນັກງານນໍາພາຄຸ້ມຄອງທຸກຂັ້ນ, ສະມາຊິກພັກ, ພະນັກງານ-ລັດຖະ ກອນ, ຮັບຮູ້ເຂົ້າໃຈ ໃນການຜັນຂະຫຍາຍມະຕິມະຕິ 4 ຂອງສູນກາງ, ມະຕິ 8 ຂອງແຂວງ, ດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ ແລະ ເອກະສານ ສືກສາອົບຮົມແມ່ຍິງ. ເປັນອັນລະອຽດ ນໍາໄປຜັນຂະຫຍາຍເຂົ້າໃນວຽກງານຕົວຈິງ ເພື່ອຈັດຕັ້ງປະຕິບັດໃຫ້ມີຜົນສໍາເລັດຢ່າງຈົບງາມ.

• < ຕໍ່ໄປ
• ຕໍ່ໄປ >