ຄະນະໂຄສະນາອົບຮົມແຂວງຫົວພັນພົບປະແລກປ່ຽນບົດຮຽນກັບໂຄສະນາອົບຮົມແຂວງຫຼວງນໍ້າທາ

ສ້າງຂື້ນເມື່ອ ວັນອັງຄານ, 07 ມັງກອນ 2020 02:15

ຄະນະ​ໂຄສະນາ​ອົບຮົມ​ແຂວງ​ຫົວພັນພົບປະແລກປ່ຽນບົດຮຽນກັບໂຄສະນາອົບຮົມ​ແຂວງຫຼວງນໍ້າທາ

      ການພົບປະແລກປ່ຽນຖອດຖອນບົດຮຽນລະຫວ່າງຄະນະ​ໂຄສະນາ​ອົບຮົມ​ແຂວງ​ຫົວພັນ ​ແລະ ຄະນະ​ໂຄສະນາ​ອົບຮົມແຂວງຫຼວງນໍ້າທາ ໄດ້ຈັດຂຶ້ນໃນວັນທີ່ 25 ທັນວາປີ 2019 ນີ້ ຢູ່ທີ່ຫ້ອງປະຊຸມຂອງຫ້ອງວ່າການ ແຂວງຫົວພັນ ໂດຍການເປັນປະທານຂອງ ທ່ານ ເພີດ ມາປັນຍາ ຄະນະປະຈໍາພັກແຂວງ ຫົວໜ້າ​ຄະນະ​ໂຄສະນາ​ອົບຮົມ​ແຂວງຫົວພັນ, ທ່ານ ສິງແກ້ວ ແສນປັນຍາ ຮອງຫົວໜ້າຄະນະໂຄສະນາອົບຮົມແຂວງ ແລະ ຫົວໜ້າຂະແໜງ, ຮອງຂະແໜງ, ພ້ອມດ້ວຍພະນັກງານ, ວິຊາການທັງ​ສອງ​ຝາຍ​ເຂົ້າ​ຮ່ວມຈໍານວນ 18 ກ່ວາສະຫາຍ, ຍິງ 6 ສະຫາຍ.

      ພິທີພົບປະແລກປ່ຽນບົດຮຽນໃນຄັ້ງນີ້ ກ່ອນອື່ນ​ທ່ານ ເພີດ ມາປັນຍາ ຄະນະປະຈໍາພັກແຂວງ ຫົວໜ້າ​ຄະນະ​ໂຄສະນາ​ອົບຮົມ​ແຂວງຫົວພັນ ໄດ້ມີຄໍາເຫັນກ່າວຕ້ອນຮັບຄະນະຜູ້ແທນຂອງແຂວງຫຼວງນໍ້າທາ, ຫຼັງຈາກນັ້ນສອງຄະນະໄດ້ພັດປ່ຽນກັນລາຍງານ ສະພາບການລວມ, ຈຸດພິເສດ ແລະ ການພັດທະນາເສດຖະກິດ, ສັງຄົມໂດຍຫຍໍ້ ລາຍງາຍງານສະພາບການຈັດຕັ້ງປະຕິບັດວຽກງານວິຊາສະເພາະຂອງຄະນະໂຄສະນາອົບຮົມຂອງສອງແຂວງ, ເປັນຕົ້ນແມ່ນວຽກງານການສຶກສາອົບຮົມການເມືອງ - ແນວຄິດ ໃນຖັນແຖວພະນັກງານ, ສະມາຊິກພັກ, ການເກັບກໍາຫາງສຽງສັງຄົມ, ວຽກງານເຜີຍແຜ່ແນວທາງນະໂຍບາຍຂອງພັກ - ລັດ, ວຽກງານໂຄສະນາຜ່ານສື່, ວິທະຍຸ ແລະ ວຽກງານການຈັດຕັ້ງການຮຽນ, ການສອນທິດສະດີຊັ້ນຕົ້ນ 3 ເດືອນ, ວຽກງານຄວາມເຂັ້ມແຂງດ້ານວິຊາສະເພາະໃຫ້ພະນັກງານ - ລັດຖະກອນມີຄວາມຮູ້ຄວາມສາມາດທາງດ້ານທິດສະດີ ແລະ ວຽກງານອື່ນໆທີ່ສໍາຄັນ ເພື່ອເຮັດໃຫ້ການຈັດຕັ້ງປະຕິບັດວຽກງານໂຄສະນາຂອງສອງແຂວງໄດ້ຈັດຕັ້ງປະຕິບັດ ສອດຄ່ອງກັບພາວະຄວາມເປັນຈິງ ແລະ ສອດຄ່ອງກັບແນວທາງນະໂຍບາຍຂອງພັກ - ລັດ ນໍາເອົາບົດຮຽນທີ່ຖອດຖອນໄດ້ໄປຈັດຕັ້ງປະຕິບັດໃຫ້ເກີດຜົນສໍາເລັດປະກົດຜົນເປັນຈິງ ເພື່ອນໍາເອົາໄປພັດທະນາວຽກງານໂຄສະນາອົບຮົມແຂວງຫົວພັນ ແລະ ແຂວງຫຼວງນໍ້າທາ ໃຫ້ມີຄວາມໜັກແໜ້ນເຂັ້ມແຂງ. ເຊິ່ງເຮັດໜ້າທີ່ເປັນເສນາທິການທາງດ້ານການເມືອງ - ແນວຄິດ ໃນການປຸກລະດົມທົ່ວສັງຄົມເຂົ້າຮ່ວມໃນການຈັດຕັ້ງປະຕິບັດແນວທາງຂອງພັກ, ລະບຽບກົດໝາຍຂອງລັດ ຢ່າງເປັນຂະບວນກ້ວາງຂວາງ, ຜ່ານການຖອດຖອນບົດຮຽນຄັ້ງນີ້ ຍັງເປັນການຫັດແໜ້ນຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ ໃນການເສີມສ້າງຄວາມຮູ້ຄວາມສາມາດ, ປະສົບການໃນການເຮັດວຽກຕໍ່ໜ້າ. ຕອນທ້າຍຂອງພິທີສອງຝ່າຍໄດ້ມອບຂອງຂັວນທີ່ລະນຶກໃຫ້ເຊິ່ງກັນ ແລະ ກັນ, ຫຼັງຈາກນັ້ນທັງສອງຄະນະໄດ້ເດີນທາງໄປທ່ຽວຊົມສະຖານທີ່ສໍາຄັນທາງປະຫວັດສາດ, ທໍາມະຊາດເປັນຕົ້ນແມ່ນຖ້ຳຂອງບັນດາທ່ານຜູ້ນໍາ ແລະ ທ່ຽວຊົມທໍາມະຊາດຢູ່ເມືອງວຽງໄຊ.